तुंगत (विकास सरवळे): आषाढी यात्रेनिमित्त लाखो वारकरी श्री विठ्ठलाच्या दर्शनासाठी पंढरपुरात दाखल होत असताना, शेती क्षेत्रालाही नवी दिशा देणारा श्रीमंत सुधाकरपंत परिचारक कृषी महोत्सव यंदा सलग ११ व्या वर्षी मोठ्या उत्साहात आयोजित करण्यात आला आहे. भक्ती आणि शेती यांचा सुंदर संगम घडविणारा हा महोत्सव शेतकरी, कृषी उद्योजक आणि ग्रामीण भागातील नागरिकांसाठी विशेष आकर्षण ठरणार आहे.
यंदाच्या कृषी महोत्सवाचे उद्घाटन राज्याचे मुख्यमंत्री यांच्या हस्ते होणार असून, त्यांच्यासमवेत राज्यातील अनेक मंत्री, लोकप्रतिनिधी, कृषी विभागातील वरिष्ठ अधिकारी, कृषी विद्यापीठांचे तज्ज्ञ तसेच विविध क्षेत्रातील मान्यवर उपस्थित राहणार आहेत. त्यामुळे या महोत्सवाकडे संपूर्ण राज्याचे लक्ष लागले आहे.
या महोत्सवात आधुनिक शेती तंत्रज्ञान, अत्याधुनिक कृषी अवजारे, सिंचन पद्धती, सेंद्रिय शेती, फळबाग व्यवस्थापन, पशुसंवर्धन, दुग्ध व्यवसाय, कृषी प्रक्रिया उद्योग, ड्रोन तंत्रज्ञान, कृषी यांत्रिकीकरण तसेच शासनाच्या विविध कृषी योजनांची माहिती शेतकऱ्यांना एकाच ठिकाणी उपलब्ध करून दिली जाणार आहे.
विशेष म्हणजे, आषाढी यात्रेसाठी पंढरपुरात आलेल्या लाखो शेतकरी वारकऱ्यांना विठ्ठलाच्या दर्शनासोबत शेतीविषयक आधुनिक ज्ञान मिळावे, नवीन तंत्रज्ञानाची माहिती व्हावी आणि शेती अधिक समृद्ध करण्यासाठी आवश्यक मार्गदर्शन मिळावे, या उद्देशाने या महोत्सवाचे आयोजन करण्यात आले आहे.
कृषी महोत्सवात नामांकित कंपन्यांचे स्टॉल, बियाणे, खते, कृषी यंत्रसामग्री, ठिबक सिंचन, शेतीपूरक उद्योग, बचत गट, कृषी स्टार्टअप्स तसेच कृषी संशोधन संस्थांचे माहिती केंद्र उभारण्यात आले असून शेतकऱ्यांना तज्ज्ञांकडून थेट मार्गदर्शन मिळणार आहे. याशिवाय कृषी क्षेत्रातील यशस्वी शेतकऱ्यांचे अनुभव, प्रात्यक्षिके आणि विविध विषयांवरील मार्गदर्शनपर व्याख्यानेही आयोजित करण्यात आली आहेत.
गेल्या दहा वर्षांत हजारो शेतकऱ्यांनी या कृषी महोत्सवाचा लाभ घेतला असून, अनेकांनी आधुनिक शेतीचा स्वीकार करून उत्पादनात वाढ आणि आर्थिक प्रगती साधली आहे. त्यामुळे यंदाच्या ११ व्या कृषी महोत्सवाबाबतही शेतकरी वर्गामध्ये मोठी उत्सुकता निर्माण झाली आहे. आषाढी यात्रेच्या धार्मिक वातावरणात “भक्तीबरोबरच प्रगत शेतीची वाटचाल” हा संदेश देणारा श्रीमंत सुधाकरपंत परिचारक कृषी महोत्सव शेतकरी आणि वारकरी यांच्यासाठी निश्चितच प्रेरणादायी ठरणार असल्याचे आयोजकांनी सांगितले आहे.
- विठ्ठल दर्शनासोबत आधुनिक शेतीचे पंढरीत दर्शन (श्रीमंत सुधाकरपंत परिचारक कृषी महोत्सवाचा जय्यत तयारी मुख्यमंत्र्यांच्या हस्ते उद्घाटन)
- पि.एम.श्री.जि.प.कें.प्रा.पारा शाळेतील पोषण आहारात अळ्या आढळल्याचा पालकांचा आरोप; अन्न व औषध पथकाकडून अन्नधान्याची तपासणी
- १३ वर्षांची प्रतीक्षा संपली; तासगाव बायपास रस्ता भूसंपादनाला अखेर गती
- मुख्यमंत्री ना देवेंद्र फडणवीस यांच्या सहकार्याने नूतन एमआयडीसीत ₹1100 कोटींची गुंतवणूक होणार – आम.रोहीत पाटील
- शेतीच्या वादातून चुलत्याचा खून; डोळ्यात मिरची पावडर टाकून तलवारीने वार