परंडा (दि. ८ ऑगस्ट) : परंडा शहरासह परिसरामध्ये बेकायदेशीर शस्त्र बाळगणाऱ्यांवर पोलीस प्रशासनाने कठोर कारवाईचा बडगा उगारला आहे. गोपनीय बातमीच्या आधारे पोलिसांनी केलेल्या धडक कारवाईत सीना नदी पात्रातून प्रतिबंधित अग्निशस्त्र (पिस्तूल) बाळगणाऱ्या दोन अल्पवयीन मुलांना ताब्यात घेण्यात आले असून, त्यांच्यासह एका अन्य व्यक्तीविरोधात परंडा पोलीस ठाण्यात गुन्हा दाखल करण्यात आला आहे.
पोलिसांकडून मिळालेल्या माहितीनुसार, शुक्रवारी दि. ७ ऑगस्ट रोजी सायंकाळी परंडा पोलीस ठाण्यातील गोपनीय पथकाला माहिती मिळाली की, परंडा शहर आणि भोत्रा शिवारादरम्यान काही इसम बेकायदेशीरपणे प्रतिबंधित शस्त्र बाळगून वावरत आहेत. या माहितीची गंभीर दखल घेत पोलीस निरीक्षक आसाराम चोरमले यांच्या मार्गदर्शनाखाली पोलीस पथकाने तातडीने भोत्रा शिवारातील सीना नदी पात्रात सापळा रचला.
पंच व शासकीय पथकाच्या मदतीने नदी पात्रात शोध घेतला असता, तेथे दोन तरुण संशयास्पद हालचाली करताना आढळले. पोलिसांनी त्यांना ताब्यात घेऊन त्यांची विचारपूस केली व पंचांसमक्ष झडती घेतली. यादरम्यान एका अल्पवयीन मुलाच्या कंबरेला लोखंडी धातूचे मॅगजिन असलेले एक अग्निशस्त्र (पिस्तूल) मिळून आले. चौकशीदरम्यान हे शस्त्र सुजित पवार (रा. भोत्रा) याने आणून दिल्याची माहिती समोर आली.
जप्त करण्यात आलेला मुद्देमाल
अग्निशस्त्र : लोखंडी धातूचे मॅगजिनसह एक अग्निशस्त्र, ज्याच्या ग्रिपवर प्लॅस्टिकची पट्टी असून त्यावर स्टार चिन्ह आहे. जुन्या वापरातील या अग्निशस्त्राची अंदाजे किंमत २० हजार रुपये आहे. पोलीस पथकाने पंचांसमक्ष कायदेशीर प्रक्रिया पूर्ण करत सदर अग्निशस्त्र जप्त केले आणि त्यावर पंच व पोलिसांच्या स्वाक्षऱ्यांचे लेबल लावून बंद पाकिटात सील केले.
कायदेशीर कारवाई
जिल्हाधिकारी, धाराशिव यांच्या शस्त्रबंदी आदेशाचे उल्लंघन केल्याप्रकरणी आणि विनापरवाना घातक शस्त्र बाळगल्याप्रकरणी दोन्ही अल्पवयीन मुलांसह सुजित पवार (रा. भोत्रा) यांच्यावर कलम ३, २५ भारतीय शस्त्र अधिनियम तसेच कलम १३५ मुंबई पोलीस अधिनियम अन्वये गुन्हा दाखल करण्यात आला आहे. या प्रकरणाचा पुढील तपास परंडा पोलीस करत आहेत.
- पवनचक्कीचे साहित्य चोरणारी सराईत टोळी स्थानिक गुन्हे शाखेच्या जाळ्यात
- परंड्यात अवैध शस्त्र बाळगणारे दोन अल्पवयीन पोलिसांच्या जाळ्यात; मॅगजिनसह अग्निशस्त्र जप्त
- परंड्यात महावितरणचा ट्रान्सफॉर्मर चोरट्यांनी केला लक्ष्य; ६० किलो कॉपर तार आणि ऑईल चोरीला
- विठ्ठल दर्शनासोबत आधुनिक शेतीचे पंढरीत दर्शन (श्रीमंत सुधाकरपंत परिचारक कृषी महोत्सवाचा जय्यत तयारी मुख्यमंत्र्यांच्या हस्ते उद्घाटन)
- पि.एम.श्री.जि.प.कें.प्रा.पारा शाळेतील पोषण आहारात अळ्या आढळल्याचा पालकांचा आरोप; अन्न व औषध पथकाकडून अन्नधान्याची तपासणी