चार आरोपी अटकेत; ४ लाख ४८ हजारांचा मुद्देमाल जप्त, पवनचक्की चोरीचे चार गुन्हे उघड
वाशी (राहुल शेळके) : पवनचक्कीच्या पॉइंटवरून कॉपर केबल, कॉपर रॉड, तार आदी साहित्य चोरी करणाऱ्या सराईत टोळीला स्थानिक गुन्हे शाखेच्या पथकाने शिताफीने ताब्यात घेतले. आरोपींकडून पवनचक्कीचे चोरीचे साहित्य आणि गुन्ह्यात वापरण्यात आलेली बोलेरो जीप असा एकूण ४ लाख ४८ हजार रुपयांचा मुद्देमाल जप्त करण्यात आला आहे. या कारवाईत पवनचक्की चोरीचे चार गुन्हे उघडकीस आले आहेत.
दि. ७ ऑगस्ट रोजी स्थानिक गुन्हे शाखेचे पथक मालमत्तेविषयक गुन्हे उघडकीस आणण्यासाठी पेट्रोलिंग करीत होते. त्यावेळी अनसुर्डा शिवारातील फॉरेस्ट परिसरात पवनचक्कीच्या पॉइंटवरून चोरी करणारी टोळी दाट झाडीमध्ये थांबली असल्याची गुप्त माहिती पोलिसांना मिळाली.
या माहितीच्या आधारे पोलिसांनी वाहने काही अंतरावर थांबवून पायी जात संशयितांचा शोध घेतला. पोलिसांची चाहूल लागताच काही इसम झाडीतून पळून जाण्याचा प्रयत्न करू लागले. मात्र, पोलिसांनी पाठलाग करून चौघांना शिताफीने ताब्यात घेतले.
ताब्यात घेतलेल्या संशयितांची अभिलेखावरून माहिती घेतली असता, त्यांच्या विरोधात धाराशिव जिल्ह्यासह इतर जिल्ह्यांमध्येही चोरीचे गुन्हे दाखल असल्याचे निदर्शनास आले. त्यानंतर पवनचक्की चोरीबाबत चौकशी केली असता, नंदू रामा शिंदे (रा. खामकरवाडी) याने खामकरवाडी येथील नवीन बांधकाम सुरू असलेल्या ठिकाणी पवनचक्कीचे चोरी केलेले साहित्य ठेवले असल्याची माहिती दिली.
पोलिसांनी तत्काळ खामकरवाडी येथे जाऊन कॉपर केबल वायर, कॉपर रॉड, तार आदी साहित्य ताब्यात घेतले. या मुद्देमालाबाबत अधिक तपास केला असता, वाशी आणि येरमाळा पोलीस ठाण्यांमध्ये पवनचक्की चोरीचे गुन्हे दाखल असल्याचे समोर आले.
या कारवाईत अनिल नाना काळे (वय ४०, रा. मस्सा), नंदू रामा शिंदे (रा. खामकरवाडी), बबलू ऊर्फ राम शिवाजी शिंदे (वय २९, रा. खामकरवाडी) आणि शाम ऊर्फ बाबा शंकर शिंदे (वय २८, रा. खामकरवाडी) यांना ताब्यात घेण्यात आले.
आरोपींकडून पवनचक्कीचे कॉपर केबल वायर, कॉपर रॉड, तार तसेच चोरीसाठी वापरण्यात आलेली बोलेरो जीप असा एकूण ४ लाख ४८ हजार रुपयांचा मुद्देमाल जप्त करण्यात आला असून, तो वाशी पोलीस ठाण्यात जमा करण्यात आला आहे. या कारवाईमुळे पवनचक्की चोरीचे चार गुन्हे उघडकीस आले आहेत.
वरिष्ठांच्या मार्गदर्शनाखाली कारवाई
ही कारवाई पोलीस अधीक्षक श्रीमती रितू खोखर आणि अपर पोलीस अधीक्षक सचिन पांडकर यांच्या मार्गदर्शनाखाली करण्यात आली. स्थानिक गुन्हे शाखेचे पोलीस निरीक्षक विनोद इज्जपवार आणि सपोनि सचिन खटके यांच्या नेतृत्वाखाली पथकाने ही कारवाई केली.
कारवाईत पोलीस हवालदार विनोद जानराव, नितीन जाधवर, दयानंद गादेकर, पोलीस नाईक बबन जाधवर, पुष्कर मुंगळे, चापोहे महेबुब अरब, प्रकाश बोईनवाड आणि रोहित दंडनाईक यांनी सहभाग घेतला.
- पवनचक्कीचे साहित्य चोरणारी सराईत टोळी स्थानिक गुन्हे शाखेच्या जाळ्यात
- परंड्यात अवैध शस्त्र बाळगणारे दोन अल्पवयीन पोलिसांच्या जाळ्यात; मॅगजिनसह अग्निशस्त्र जप्त
- परंड्यात महावितरणचा ट्रान्सफॉर्मर चोरट्यांनी केला लक्ष्य; ६० किलो कॉपर तार आणि ऑईल चोरीला
- विठ्ठल दर्शनासोबत आधुनिक शेतीचे पंढरीत दर्शन (श्रीमंत सुधाकरपंत परिचारक कृषी महोत्सवाचा जय्यत तयारी मुख्यमंत्र्यांच्या हस्ते उद्घाटन)
- पि.एम.श्री.जि.प.कें.प्रा.पारा शाळेतील पोषण आहारात अळ्या आढळल्याचा पालकांचा आरोप; अन्न व औषध पथकाकडून अन्नधान्याची तपासणी