दैनिक जनमत

उस्मानाबाद- उस्मानाबाद जिल्ह्यात कोरोनाचा संशयित रूग्ण आढळल्याने मोठी खळबळ उडाली आहे. मात्र तो रूग्ण कोरोनाचा नसल्याचे जिल्हा शल्य चिकीत्सक राजाभाऊ गलांडे यांनी दैनिक जनमतशी बोलताना सांगीतले. 
याबाबत माहिती अशी की, हा रूग्ण गेल्या काही दिवसात पिंपरी चिंचवड येथे कामानिमीत्त नातेवाईकांकडे गेला होता.समुद्रवाणी येथे गावी परतल्यानंतर केवळ ती व्यक्ती  पिंपरी चिंचवड आणि पुणे येथून प्रवास करून आल्याने त्यांना समुद्रवाणी येथील आरोग्य केंद्रात तपासणीसाठी गेले असता डॉक्टरांनी उस्मानाबाद येथे त्यांना पाठवले. मात्र उस्मानाबाद येथे जिल्हा रूग्णालयात कोरोना वार्डच बंद असल्याने त्यांना काही काळ ताटकाळत उभे रहावे लागले. यातून जिल्हा आरोग्य यंत्रणेची बेफिकीरी दिसून आली. केवळ ढिसाळ यंत्रणेमुळे त्या रूग्णाला ताटकाळत उभे रहावे लागले अशी चर्चा आहे. मुख्यमंत्र्यांनी दोन दिवसापूर्वी जिल्ह्यातील परिस्थितीचा आढावा घेतला होता त्यात त्यांना यंत्रणा सज्ज असल्याचे सांगीतले गेले . तसेच आज पालकमंत्री शंकरराव गडाख यांनीही आढवा घेतला  त्यांनाही यंत्रणा सज्ज असल्याचे सांगण्यात आले होते. मात्र एका आलेल्या रूग्णाने शासकीय यंत्रणेचा कागदी घोडे नाचवण्याचा प्रकार उघड केला आहे. मात्र अनाहुतपणे घडलेले हे मॉक ड्रील जिल्हा यंत्रणेला धडा शिकवून जाणारे आहे. त्या रूग्णाची तातडीने तपासणी न करणार्‍या डॉक्टरांवर काय कारवाई होते हे आता पहावे लागणार आहे. खरच त्या व्यक्तीला जबरदस्तीने दवाखान्यात पाठवण्यात आले आहे का याची माहिती समुद्रवाणी येथील जबाबदार नागरीकांना विचारली असता त्यांनी ते काल पुण्याहून आले आहेत. थोडीशी सर्दी आणि खोकला त्यांना होता मात्र तपासणीसाठी तयार नसल्याने त्यांचे शेजारी आणि नातेवाईकांनी दवाखान्यात पाठवले आहे असे गावकर्‍यांनी सांगीतले. तसेच त्या व्यक्तीला कोणतीही लक्षणे नसताना समुद्रावानी येथील आरोग्य अधिकाऱ्यांनी रुग्णाला उस्मानाबाद येथे का पाठवले असा प्रश्न विचारला जात आहे.
ती व्यक्ती ठिकठाक- जिल्हा शल्यचिकीत्सक 
समुद्रवाणी येथून आलेली व्यक्ती ठिकठाक असून त्यांच्यामधे कोरोनाची कोणतीच लक्षणे नाहीत. ते पिंपरी चिंचवड येथून प्रवास करून आल्याने त्यांना नातेवाईकांनी जबरदस्तीने दवाखान्यात पाठवले होते. त्यांची तपासणी केली आहे. कोरोनाची कोणतीच लक्षणे न आढळल्याने त्यांना गावी पाठण्यात येणार आहे. लक्षणे नसल्याने विलगीकरण कक्षात ठेवण्याची गरज नसल्याचे तसेच आरोग्य यंत्रणेने तपासणीसाठी कुचराई न केल्याचे  जिल्हा शल्यचिकीत्सक राजाभाऊ गलांडे यांनी सांगीतले. 

आरोग्यमंत्री राजेश टोपे यांची विधानसभेत माहिती

मुंबई, दि. 14: राज्यात कोरोना विषाणूच्या प्रादुर्भाव रोखण्यासाठी साथरोग प्रतिबंध कायदा लागू झाला असून खबरदारीचा उपाय म्हणून सर्व महापालिका, नगरपालिका, नगरपंचायती या शहरी क्षेत्रातील सर्व शाळा, महाविद्यालये आणि अंगणवाड्या 31 मार्च पर्यत बंद करण्याचा निर्णय घेण्यात आला आहे. याकाळात परीक्षा सुरू राहतील. ग्रामीण भागातील शाळा, महाविद्यालये सुरू राहतील. अशी माहिती आरोग्यमंत्री राजेश टोपे यांनी आज विधानसभेत निवेदनाद्वारे दिली. दरम्यान, राज्यात कोरोनाचे 26 रुग्ण आढळून आल्याचे आरोग्यमंत्र्यांनी यावेळी सांगितले.

यासंदर्भात निवेदन करतांना आरोग्यमंत्री टोपे म्हणाले की, कोरोनाचे रुग्ण आढळून येत असल्याने वेळीच हा संसर्ग रोखण्यासाठी राज्यात साथरोग प्रतिबंध कायदा लागू असून राज्यातील चित्रपटगृहे, नाट्यगृहे, तरणतलाव, व्यायामशाळा बंद करण्याचा निर्णय घेण्यात आला आहे. यासंदर्भात राज्यातील सर्व जिल्हाधिकारी, महापालिका आयुक्त, पोलिस प्रशासन यांना राज्य शासनाने सूचना निर्गमीत केल्या आहेत.

राज्यातील शहरी भागातील सर्व शाळा, महाविद्यालये, अंगणवाड्या देखील 31 मार्चपर्यंत बंद ठेवण्याचे निर्देश देण्यात आले आहे. याकाळात मंडळ परिक्षा सुरू राहतील, असे स्पष्ट करताना परिक्षांच्या काळात आजारी विद्यार्थी शाळांमध्ये येणार नाहीत याची खबरदारी पालक आणि शाळांनी घ्यायची आहे.

राज्यात पुढील आदेश होईपर्यंत सर्व शासकीय, व्यावसायीक, यात्रा, धार्मीक, क्रिडा विषयक कार्यक्रम रद्द करण्याचे निर्देशही प्रशासनाला देण्यात आले असून गांभीर्य ओळखून सर्वांनी साथरोग प्रतिबंधासाठी प्रशासनाला सहकार्य करावे, असे आवाहनही आरोग्यमंत्र्यांनी यावेळी केले.

दरम्यान, राज्यात आतापर्यंत 26 रुग्ण आढळून आले असून पुणे येथे 10, मुंबई 5, रायगड 1, कल्याण 1, अहमदनगर 1, नागपूर 4, ठाणे 1, यवतमाळ 2, कल्याण 1 रुग्ण आढळून आले आहेत.

नवी दिल्ली,
पंतप्रधान नरेंद्र मोदी यांच्या अध्यक्षतेखाली झालेल्या वित्तीय व्यवहारविषयक मंत्रिमंडळ समितीच्या बैठकीत 2020 या वर्षाच्या हंगामासाठी खोबऱ्याच्या किमान हमीभावाला मंजुरी देण्यात आली.
सर्वसाधारण दर्जाच्या वाटी खोबऱ्याची किमान आधारभूत किंमत प्रति क़्विटल 9,521 वरून 9,960 रुपयांपर्यंत वाढवण्यात आली आहे. तर संपूर्ण खोबरे डोलची किंमत प्रति क़्विटल . 9,920 वरुन 10,300 रुपये एवढी केली आहे. यामुळे खोबरे उत्पादकांना वाटी खोबऱ्यावर  क़्विटलमागे 439 रुपये तर खोबरेडोलावर क़्विटलमागे 380 रुपयांचा लाभ होणार आहे.
देशभरात तयार होणाऱ्या खोबऱ्याचा सरासरी उत्पादन खर्च लक्षात घेऊन वाटी खोबऱ्याच्या उत्पादनातील 50 टक्के खर्च आणि खोबरे डोल उत्पादनातील 55 टक्के खर्च भरून निघावा, या उद्देशाने हा हमीभाव निश्चित करण्यात आला आहे.
कृषी उत्पादने खर्च आणि किंमत आयोगाच्या (CACP). शिफारशींवर आधारित हा हमीभाव देण्यात आला आहे.
देशातील कृषी उत्पादनांच्या खर्चाच्या दीडपट हमीभाव देण्याच्या तत्वावर हा हमीभाव वाढवण्यात आला आहे.
खोबरे उत्पादनात भारत जगात पहिल्या क्रमांकावर आहे.

साली घोषीत केलेल्या उस्मानाबाद- तुळजापूर-सोलापूर रेल्वे लाईनच्या कामास गती मिळण्यासाठी एक नोडल अधिकारी नेमुन संबधित रेल्वे विभागास रेल्वे लाईनचे काम जलदगतीने करावे यासाठी सुचना देण्यात याव्यात, उस्मानाबाद जिल्हयातून धावणारी लातूर-मुंबई अशी एकच रेल्वे गाडी आहे. लातूर जिल्हयातूनच सदरची रेल्वेगाडी प्रवाशांनी पुर्णपणे भरून येते त्यामुळे उस्मानाबाद जिल्हयातील प्रवाशांना जागा उपलब्ध होत नाही. मोठया प्रमाणात प्रवाशांची संख्या असताना देखिल पुणे किंवा मुंबईला ये-जा करण्यासाठी रेल्वेगाडया मुबलक प्रमाणात उपलब्ध नसल्यामुळे रेल्वेच्या अर्थसंकल्पीय चर्चेच्या माध्यमातून संसदेत खा. ओमप्रकाश राजेनिंबाळकर यांनी पुणे उस्मानाबाद लातूर इंटरसिटी सुरू करावी अशी मागणी मा. रेल्वे राज्यमंत्री यांना केली. त्याचप्रमाणे कळंब रोड स्टेशन किंवा ढोकी स्टेशन रेल्वे स्थानकावर एक्सप्रेस गाडयांना थांबा देण्यात यावा अशी देखील यावेळी मागणी करण्यात आली. त्याचप्रमाणे उस्मानाबाद ​रेल्वे स्थानकावर रॅक पाईंट उपलब्ध असून प्लॅटफॉर्म व आवश्यक शेड उपलब्ध करून देण्यात यावे अशा प्रकारच्या मागण्या खासदार ओमप्रकाश राजेनिंबाळकर यांनी रेल्वेच्या अर्थसंकल्पीय चर्चेच्या माध्यमातून संसदेत मांडल्या.