धाराशिव, प्रतिनिधी : शिधापत्रिका तसेच पुरवठा विभागाशी संबंधित सर्व सेवा आता पूर्णपणे ऑनलाईन पद्धतीने उपलब्ध असून नागरिकांनी कोणत्याही एजंट, दलाल किंवा मध्यस्थांकडे कागदपत्रे देऊ नयेत, असे आवाहन तहसील प्रशासनाने केले आहे.
महाराष्ट्र शासनाने १६ मे २०२३ रोजीच्या शासन निर्णयानुसार केशरी, पिवळी व शुभ्र रंगाच्या पुस्तकी शिधापत्रिका बंद करून त्याऐवजी डिजिटल ऑनलाईन शिधापत्रिका प्रणाली लागू केली आहे. यानुसार AAY, PHH, APL Farmer, NPH आणि APL White या प्रकारच्या शिधापत्रिका नागरिकांना ऑनलाईन उपलब्ध करून देण्यात येत आहेत.
पुरवठा विभागातील सर्व कामकाज महाराष्ट्र शासनाच्या ऑनलाईन प्रणालीद्वारे केले जात असून शिधापत्रिकेतील नाव कमी करणे, नवीन नाव समाविष्ट करणे, नवीन शिधापत्रिका मिळविणे, शिधापत्रिकेची दुय्यम प्रत काढणे तसेच इतर विविध सेवा नागरिकांना घरबसल्या उपलब्ध आहेत.
यासाठी नागरिकांनी शासनाच्या अधिकृत संकेतस्थळावर जाऊन स्वतः अर्ज सादर करावा. आवश्यक शुल्कही शासनाच्या GRAS प्रणालीद्वारे थेट भरता येते. NPH शिधापत्रिकेसाठी ५० रुपये तर APL White शिधापत्रिकेसाठी १०० रुपये शुल्क निश्चित करण्यात आले आहे. तसेच विविध शासकीय प्रमाणपत्रे व योजनांसाठी शासनाने निश्चित केलेले शुल्कच भरावे, असे प्रशासनाने स्पष्ट केले आहे.
नागरिकांना ऑनलाईन अर्ज करण्यास अडचण असल्यास शासनमान्य सुविधा केंद्रांची मदत घेता येईल. मात्र कोणत्याही अनधिकृत एजंट किंवा दलालांकडे कागदपत्रे देऊन आर्थिक फसवणुकीला बळी पडू नये, असे प्रशासनाने म्हटले आहे.
नायब तहसीलदार सामाजिक सहाय्य योजना श्री. एम. जी. शिंदे, नायब तहसीलदार महसूल-२ तथा पुरवठा निरीक्षण अधिकारी श्रीमती विशाखा बलकवडे आणि तहसीलदार डॉ. मृणाल जाधव यांनी नागरिकांना सतर्क राहून सर्व सेवा अधिकृत माध्यमातूनच घेण्याचे आवाहन केले आहे.
- आ. रोहित पाटील यांच्या पाठपुराव्याला यश; भूसंपादनग्रस्त शेतकऱ्यांचे धरणे आंदोलन स्थगित
- एजंट-दलालांकडे कागदपत्रे देऊ नका; शिधापत्रिका व शासकीय सेवांसाठी थेट ऑनलाईन अर्ज करा : तहसीलदार मृणाल जाधव यांचे आवाहन
- आमची लढाई आरएसएससोबत नाही; काँग्रेसच्या उमेदवाराचे अजब विधान
- विधान परिषदेसाठी दत्ताभाऊ कुलकर्णींची ताकद वाढली; तीन जिल्ह्यांतील 252 सदस्यांचा पाठिंबा असल्याची चर्चा
- रामाच्या आणि कृष्णाच्या आशीर्वादानं चालणाऱ्या महाविद्यालयात छेडछाडीच्या प्रकरणात प्रभारी प्राचार्य पुतण्याने वाचवलं काकाला!