दैनिक जनमत

उस्मानाबाद – आठवड्यातील तीन दिवस भाजीपाला आणि किराणा समान खरेदीचा जिल्हा प्रशासनाच्या निर्णयाने उस्मानाबाद करांच्या संयमाचा बांध फुटला असल्याची चर्चा आहे.
कोरोना च्या संकटामुळे सर्वत्र टाळेबंदी आहे. केंद्र सरकारने रुग्ण संख्येवर रेड , ऑरेंज, आणि ग्रीन झोन तयार केले आहेत. त्यानुसार उस्मानाबाद जिल्हा ग्रीन झोन मध्ये आहे. ग्रीन झोन चे श्रेय उस्मानाबाद जिल्ह्यातील नागरिकांनी पाळलेल्या नियम आणि संयम दोन्ही मुळे आहे. मात्र जिल्हा प्रशासनाने बाजारपेठ चालू ठेवण्यासाठी आठवड्यातील तीन दिवस ठरवले या निर्णयामुळे उस्मानाबाद शहरातील नागरिकांच्या संयमाचा बांध फुटला आणि बाजारात खरेदीसाठी एकच गर्दी उसळली. यात दोन व्यक्ती मध्ये अंतर ठेवण्याबाबत असणारा नियम पायदळी तुडवला गेला. शहरातील काळा मारुती परिसरात काही काळ वाहतूक कोंडीही झाली.  हा सारा प्रकार एका निर्णयामुळे होत असेल तर जिल्हा प्रशासनाने या निर्णयाचा पुनर्विचार करावा अशी मागणी होत आहे.

शेतकऱ्यांचे मोठे नुकसान

जिल्हा प्रशासनाने तीन दिवस भाजी पाला विक्री करण्याचा निर्णय घेतल्यामुळे भाजीपाला उत्पादक शेतकरी दररोज भाजीपाला बाजारात विक्री करू शकत नाहीत परिणामी भाजी नाशवंत माल असल्याने ती खराब होत असल्याचे शेतकऱ्यांचे म्हणणे आहे.

नियमांचे पालन व्हावे
कोरोना चा मुकाबला करण्यासाठी सरकार ज्या सूचना सांगत आहे त्याचे पालन करणे नागरिकांचे कर्तव्य आहे. आज उस्मानाबाद मध्ये झालेली गर्दी अनाठायी आहे. शासनाने आखून दिलेले नियम नागरिकांनी पाळावे असे आवाहन दैनिक जनमत च्या वतीने करण्यात येत आहे.

उस्मानाबाद दि 5 : कोरोना विषाणूचा प्रादुर्भाव रोखण्यासाठी लागू करण्यात आलेले टाळेबंदी शिथिल तेचे सर्वाधिकार जिल्हाधिकार्‍यांना बहाल करणे हे सर्वस्वी चुकीचे असून राज्य शासनाने तयार केलेल्या झोन नुसार एकच नियमावली करून त्याची काटेकोर अंमलबजावणी करण्याचे आदेश जिल्हाधिकाऱ्यांना देणे योग्य आहे असे स्पष्ट मत जनता दल सेक्युलर चे प्रदेश कार्याध्यक्ष तथा प्रवक्ते ऍड रेवन भोसले यांनी प्रसिद्धीपत्राद्वारे व्यक्त केले आहे.
   महाराष्ट्रात विविध भागात जिल्हाधिकारी टाळेबंदी संदर्भात दररोज निरनिराळे आदेश काढून सर्वत्र गोंधळाची स्थिती निर्माण करत आहेत .प्रत्येक जिल्हाधिकाऱ्यांनी टाळेबंदी च्या कालावधीत पुरवठा विभागामार्फत मागेल त्याला अन्नधान्य पुरवठा करून गोरगरीब, मजूर व कष्टकरी कामगारांना वाचवण्याचा प्रयत्न करणे गरजेचे आहे परंतु असे न करता टाळेबंदी च्या नावाखाली दंडुक्याच्या धाक दाखवून घराबाहेर न पडण्याची अंमलबजावणी मात्र काटेकोरपणे केली जात आहे. करोना साथरोग नियंत्रण कायद्यानुसार दिलेल्या सवलती सर्व जिल्ह्यात समान असणे गरजेचे आहे. काही जिल्ह्यात दारूबंदी तर काही ठिकाणी दारूविक्री असे विसंगत धोरण ठेवू नये .सरकारच्या या विसंगत धोरणामुळे हातावर पोट असणाऱ्या मजुर, गोरगरीब व कष्टकरी कामगारावर उपासमारीची वेळ आली आहे. कोरोना विषाणू संदर्भात टाळेबंदी लागू झाल्यापासून केंद्र व सर्व राज्य सरकारे हे दररोज नवनवे आदेश काढून जनतेमध्ये संभ्रमाचे वातावरण तयार करत आहेत. त्यातच आता जिल्हाधिकाऱ्यांना सर्वाधिकार दिल्यामुळे ते आता आपल्या मर्जीप्रमाणे व मनमानी नुसार टाळेबंदी शिथिल तेचे आदेश काढून सर्वसामान्य जनतेला वेठीस धरत आहेत. अशा परिस्थितीत कोरोना विषाणूचा संसर्गामुळे नव्हे तर विविध अटी ,शर्ती ,नियम लावून घरातच पोलिसांच्या दंडुके याद्वारे कोंडून अन्नधान्य अभावी गोरगरिबांचे मृत्यू होतील अशी भीतीही अॅड भोसले यांनी व्यक्त केली आहे .राज्यातील एक जिल्हाधिकारी वर्तमान पत्राचे वितरण होऊ देणार नाही म्हणतात तर दुसरे जिल्हाधिकारी सकाळी दहानंतर वर्तमानपत्र विकू देणार नाही असे बोलतात ,अशा प्रकारचे अधिकार जिल्हाधिकाऱ्यांना दिले कोणी? जिल्हाधिकाऱ्यांच्या अशा मनमानी वर्तणुकीमुळे महाराष्ट्रात रोगापेक्षा इलाज भयंकर अशी स्थिती निर्माण झाली आहे. त्यामुळे राज्य सरकारने जिल्हाधिकाऱ्यांना अशा प्रकारचे अनिर्बंध अधिकार देऊ नयेत .सर्वसामान्य जनतेच्या हिताचे रक्षण करण्या ऐवजी जनतेचे न्याय हक्क हिरावून घेण्याची च शक्यता अधिक आहे. अशा सर्व अधिकारामुळे जिल्ह्यात कायदा व सुव्यवस्था रसातळाला जाण्याची जास्त शक्यता निर्माण होण्याची भीती असते. तरी राज्य शासनाने टाळेबंदी शिथिल तेचे संदर्भात दिलेले सर्व अधिकार काढून घेऊन राज्यात सर्व जिल्ह्यांमध्ये एकच धोरण अवलंबण्याची व त्याची काटेकोरपणे अंमलबजावणी करण्याची मागणी अॅड भोसले यांनी केली आहे.

उस्मानाबाद – तालुक्यातील चिखली येथील  पोलिसाच्या संपर्कातील व्यक्तींचे कोरोना चाचणीचे  अहवाल निगेटीव्ह आले आहेत तर एक रिपोर्ट अद्याप प्रलंबित असल्याची माहिती आहे. मात्र तूर्तास उस्मानाबादकरांना दिलासा मिळाला आहे. दि  २ मे रोजी सोलापूर येथे पोलीस सेवेत असलेल्या व्यक्तीची कोरोना चाचणी पाॅझीटीव्ह आल्याची बामती आल्यानंतर जिल्ह्यात मोठी खळबळ उडाली होती. जिल्हा प्रशासनाने तातडीने चिखली हे गाव सिल करून संबंधित व्यक्तीच्या घरातील व्यक्तींना दवाखान्यात दाखल करून त्यांची चाचणी केली होती. त्याचा अहवाल आज निगेटीव्ह आला असल्याची माहिती जिल्हा शल्यचिकित्सक डॉ. राजाभाऊ गलांडे यांनी दिली. तसेच आज एकूण वीस जणांचे अहवाल आले आहेत सर्व अहवाल निगेटीव्ह असल्याने जिल्ह्यासाठी दिलासा देणारी बातमी आहे. 

तासगाव – ( राहुल कांबळे)
सध्या भारत देशाचे महाराष्ट्रात व प्रमुख मुंबई येथे कोरोनाच्या पार्श्वभूमीवर संपूर्ण महाराष्ट्रात या विषाणूने थैमान घातले आहे. आपले महाविकास आघाडीचे सरकार मुख्यमंत्री  उद्धव ठाकरे यांच्या नेतृत्वाखाली चांगल्याप्रकारे काम करीत आहेत या महामारी विरोधात पूर्ण ताकदीनिशी मुकाबला करीत आहेत या आजाराशी लढा देण्यासाठी झटणारे पोलीस डॉक्टर नर्सेस व आशा वर्कर्स व संबंधित त्या धर्तीवर घटकांचा केंद्र शासन ५० लाख रुपये रकमेचा विमा उतरवला आहे त्याच धर्तीवर महाराष्ट्र शासन अंगणवाडी सेविका यांचा २५ लाख रकमेचा विमा उतरण्याचा निर्णय महाराष्ट्र शासनाने घेतला आहे त्याबद्दल त्यांचे मनापासून आम्ही अभिनंदन तसेच लॉक डाऊन  काळात पोलीस डॉक्टर नर्स त्यांच्याबरोबर  संपूर्ण महाराष्ट्रात पत्रकार बांधव त्यामध्ये प्रिंट मीडिया व इलेक्ट्रॉनिक मीडिया आघाडीवर असल्याने आपणास घरबसल्या टीव्ही व सोशल मीडियाच्या माध्यमातून आपल्या देशातील आपल्या राज्यातील व आपल्या भागातील इतंभूत माहिती मिळत आहे. मुंबई येथे कोरोना संदर्भात माहिती मिळवण्या साठी पत्रकार बांधव कार्यरत आहेत.त्यातच इलेक्ट्रॉनिक मीडियाचे ५० पत्रकार बांधवांना कोरोना विषाणूची लागण झाली आहे. त्यांच्यावर सध्या मुंबई येथे उपचार सुरू आहेत ते सर्वजण सुखरूप आहेत त्याच पार्श्वभूमीवर संपूर्ण राज्यात पत्रकार बांधव जीवाची पर्वा न करता जनतेच्या हितासाठी जनजागृतीच्या माध्यमातून आपले कर्तव्य पार पाडीत आहेत. आपला स्वतःचा जीव धोक्यात घालून कर्तव्य पार पाडत आहेत आपला स्वतःचा जीव धोक्यात घालून कर्तव्याला प्राधान्य देत आहेत म्हणून या पत्राद्वारे महाराष्ट्र सरकारचे प्रमुख म्हणून आपल्याकडे या पत्राद्वारे आग्रही मागणी करीत आहे.  संपूर्ण राज्यातील पत्रकार बांधवांचा ५० लाख रुपये रकमेचा महाराष्ट्र शासनाने विमा उतरवावा अशी आग्रही मागणी आमदार सुमनताई पाटील यांनी केली आहे. महाराष्ट्राचे लोकनेते माजी उपमुख्यमंत्री तथा  गृहमंत्री स्व. आर. आर. आबा पाटील यांनी सदैव महाराष्ट्रात आपल्या मंत्रिपदाच्या कार्यकाळात  जनतेच्या हिताचे कामे केली होती. त्यामध्ये प्रामुख्याने ग्रामीण भागातील दुष्काळी जनता, शिक्षक ,पोलीस प्रशासन इत्यादींच्या बाबतीत सकारात्मक विचार केला होता त्यांचे अकाली निधनानंतर आज राज्याच्या राजकारणात कधी नव्हे एवढी पोकळी निर्माण झाल्याचे राजकीय विश्लेषक आपले मत व्यक्त करीत आहेत अशातच स्व.आबांच्या पत्नी तासगाव कवठेमहांकाळ च्या लोकप्रिय आमदार श्रीमती सुमन ताई आर. पाटील यांनी संपूर्ण महाराष्ट्रातील पत्रकारांचा ५० लाख रु. रकमेचा विमा उतरवावा अशी मागणी मुख्यमंत्री यांच्याकडे पत्राद्वारे केल्याने स्व आबांच्या पश्चात आमदार सुमन ताई पाटील या त्यांच्या पावलावर पाऊल टाकत आहेत असे म्हटले तर वावगे ठरू नये. तरी या रास्त व आग्रही मागणीचा महाराष्ट्राचे कर्तव्यदक्ष मुख्यमंत्री ना उद्धवजी ठाकरे साहेब यांनी याबाबत तातडीने सकारात्मक निर्णय घेतील अशी तमाम महाराष्ट्रातील पत्रकारांची अपेक्षा आहे.

उस्मानाबाद – उस्मानाबाद तालुक्यातील चिखली या गावचा रहिवासी असलेल्या आणि सध्या सोलापूर येथे सेवेत असलेल्या आणि नुकतीच सुट्टी संपवून सोलापूर येथे गेलेल्या पोलीस कर्मचाऱ्याचा कोरोना रिपोर्ट  पाॅझिटीव्ह आल्याने खळबळ उडाली आहे.
याबाबत माहिती अशी की, चिखली येथे हा पोलीस कर्मचारी २४ एप्रिल च्या दरम्यान सुट्टीनिमित्त गावी आला होता. त्यानंतर तो सोलापूर येथे गेल्यानंतर त्याची चाचणी घेतली ती पाॅझिटीव्ह आली आहे. याबाबत जिल्हा शल्य चिकीत्सक राजाभाऊ गलांडे यांच्याशी संपर्क साधला असता त्यांनी संबंधित व्यक्तीच्या संपर्कातील व्यक्तींना उस्मानाबाद येथे तपासणीसाठी आणण्यात आले आहे असे सांगितले. तत्पूर्वी चिखली हे गाव सिल केले असून प्रशासनाकडून योग्य ती खबरदारी घेतली जात असल्याची माहिती आहे.