दैनिक जनमत

परंडा – परंडा तालुक्यातील सरणवाडी येथील युवकाला कोरोना झाल्याचे निष्पन्न झाल्यानंतर जिल्हा प्रशासन पूर्णपणे सतर्क झाले होते. आरोग्य विभागाने तातडीने बाधित व्यक्तीच्या संपर्कातील व्यक्तींच्या स्त्रावाचे नमुने चाचणीसाठी घेऊन विलासराव देशमुख शासकीय वैद्यकीय विज्ञान संस्था लातूर येथे  पाठवले होते आज त्यांचा अहवाल आला आहे. त्या सर्वांचे अहवाल निगेटीव्ह आले आहेत. बधिताच्या कुटुंबातील व्यक्ती, त्याच्यावर खाजगी रुग्णालयात उपचार करणारे डॉक्टर, खाजगी दवाखान्यात त्याच्या शेजारील व्यक्तीचे अहवाल घेण्यात आले होते. तसेच त्या व्यक्तीच्या संपर्कातील आणखी 23जणांना क्वारंटाईन करण्यात आले आहे. परंडा तालुक्यातील आसू ,पिंपळवाडी, पाचपिंपला  यागावतील त्या बाधित व्यक्ती ने फळे, भाजीपाला खरेदी केला असल्याने प्रशासन यावर लक्ष ठेवून आहे तसेच सोलापूर जिल्यातील करमाळा अनेक तालुक्यातील गावात हा रुग्ण फिरलेला असल्याने त्याचा तपास सुरू आहे  तर कोरंटाईन केलेल्या 23 जणांवर आरोग्य विभागाचे लक्ष आहे.

 आटपाडी दि.12 (प्रतिनिधी):

आटपाडी पोलिसांनी सांगली-सोलापूर जिल्हा सरहद्दीच्या उंबरगाव चेक पोस्ट नाक्यावर सोलापूरहून चिपळूणला जाणारा बादशहा गुटख्याची 29 पोती असलेला आयशर टेम्पो पकडून कारवाई केली. 7 मे रोजी पोलिसांनी अशीच कारवाई केली होती. एकाच आठवड्यात ही दुसरी कारवाई आहे.
सोमवार  दि.11 मे रोजी पहाटे 5.45 वाजता सांगली -सोलापूर जिल्हा सरहद्दीतील आटपाडी पोलीस ठाण्याच्या अखत्यारीतील उंबरगाव चेक पोस्ट नाक्यावरील पथकाने सोलापूरहुन चिपळूणला जाणारा एमएच 12 एचडी 5284 या क्रमांकाचा आयशर टेम्पो अडविला. काचेवर अत्यावश्यक सेवा, पशुखाद्य असे कागदी स्टिकर चिटकवला होता, परंतु अधिकृत परवाना काचेवर नव्हता. बंदोबस्तावर असलेल्या पोलिसांनी तपासणी केली. त्यांना पशुखाद्यऐवजी गुटख्याची पोती आढळून आली. 14 लाख रुपये किमतीच्या बादशाह गुटख्याची 29 पोती होती.
पोलीस पथकाने वाहन चालक खाजेभाई लाडलेसाहेब (वय 60, लोहगाव, पुणे )व बाबू मोमीन लाडलेसाहेब (वय 60 ,इंदिरानगर, मंद्रूप, सोलापूर) यांच्यासह आयशर टेम्पो व गुटख्याची पोती ताब्यात घेतली आहेत. या घटनेची माहिती  सांगली जिल्हा अन्न व सुरक्षा अधिकारी यांना कळवून आटपाडी पोलीस ठाण्यामध्ये गुन्हा नोंद करण्यात आला आहे.
 आटपाडी ठाण्याचे पोलीस निरीक्षक बजरंग कांबळे,सहाय्यक पोलीस निरीक्षक सुधीर पाटील, पोलीस उपनिरीक्षक अजित पाटील, उपनिरीक्षक कनकवाडी, पोलीस हवालदार नंदकुमार पवार, पोलीस नाईक रामचंद्र खाडे, पोलीस हवलदार दिग्विजय कराळे, परशराम देशमुखे ,अतुल माने, नितीन मोरे यांच्या पथकाने ही कारवाई केली. अधिक तपास पोलीस उपनिरीक्षक अजित पाटील करीत आहेत. आटपाडी पोलिसांनी आठवड्याभरात दोन वेळा अशी कारवाई करून 48 लाख रुपयांचा गुटख्यासह मुद्देमाल ताब्यात घेतला आहे.

उस्मानाबाद –  ११ मे रोजी उस्मानाबाद जिल्ह्यातील परंडा तालुक्यात कोव्हीड १९ ( कोरोना) चा रुग्ण आढळून आला आहे. त्यानुसार प्रादुर्भाव रोखण्यासाठी परांडा तालुक्यात जिल्हाधिकारी दीपा मुधोळ मुंडे यांनी प्रतिबंधात्मक आदेश जारी केले आहेत त्यानुसार तालुक्यात ठराविक आस्थापना चालू ठेवण्याचे आदेश देण्यात आले आहेत त्यानुसार
 शासकीय / निमशासकीय कार्यालये , पिण्याचे पाणी पुरवठा व सांडपाणी निचरा व्यवस्थापन करणा – या आस्थापना, सर्व बँका , दूरध्वनी व इंटरनेट सेवा पुरवठा करणा – या आस्थापना, अन्न , भाजीपाला , दूध, किराणा पुरविणा – या आस्थापना ( सकाळी 8 ते दुपारी 2 या कालावधीतच सुरू राहतील ), दवाखाने , वैद्यकीय केंद्र व औषधी दुकाने ,विद्युत पुरवठा . ऑईल व पेट्रोलियम व ऊर्जा संसाधने , प्रसार माध्यमे , मिडीया ,अत्यावश्यक सेवा देणा – या आय . टी . आस्थापना . चालू राहणार आहेत वरील सर्व आस्थापना सोडून बाकी सर्व आस्थापना १७ मे पर्यंत बंद राहणार असल्याचे आदेशा मध्ये म्हटले आहे.

उस्मानाबाद – ग्रीन झोन असलेल्या उस्मानाबाद जिल्ह्यात कोरोनाने शिरकाव केला आहे. मुंबई येथून प्रवास करून आलेल्या व्यक्तीची कोरोना चाचणी पॉझीटिव्ह आल्याने पुन्हा एकदा जिल्ह्यात खळबळ उडाली आहे. २ एप्रिल रोजी उमरगा तालुक्यात पहिला रुग्ण आढळला होता त्यानंतर आणखी दोन रुग्ण आढळले होते काही दिवसापूर्वी ते कोरोनामुक्त झाले होते त्यानंतर जिल्हा ग्रीन झोन मध्ये गेला होता.

मगरवाडी  / प्रतिनिधी
      आज संकष्टी चुतुर्थी निम्मित    दि. १० मे रोजी श्री विठ्ठल रुक्मिणी मातेच्या गाभाऱ्यास ३१०० रत्नागिरी हापुस आंब्यानी  व आंब्याच्या पानांनी आकर्षक अशी आरास करण्यात आली त्यामुळे गाभाऱ्यास मनमोहक असे आमराईचे स्वरूप प्राप्त झाले.
आमराईत नटली विठू-रखुमाई

वैशाख संकष्टी चतुर्थी निमित्ताने पंढरपूरच्या श्री विठ्ठल रुक्मिणी मंदिरामध्ये आंब्याची नेत्रदीपक आरास करण्यात करण्यात आली आहे.
रत्नागिरी येथून खास मागविण्यात आलेल्या 3100  हापूस आंब्याने श्री विठ्ठलाचे गाभारा, चौखांबी आदी ठिकाणी आंब्याची आरास करण्यात आल्याने श्री विठ्ठल आमराईत उभा असल्याचा भास होत असून देवाचे हे लोभस रुप आज अधिकच खुलून दिसत आहे
श्री विठ्ठला प्रमाणे श्री रुक्मिणीमातेच्या गाभाऱ्यात आंब्याची मनमोहक अशी आरास करण्यात आली आहे.
कोरोनाचे विश्वावर ओढावलेले संकट दूर करण्यासाठी बा…विठ्ठलाच्या चरणी श्री विठ्ठल भक्त हरीश बैजल (अतिरिक्त पोलीस महानिरीक्षक महाराष्ट्र सायबर सेल) अजय सालुखे (उद्योगपती पुणे), उमेशभाई भुवा (सांगली) दीपकभाई शहा (सांगली) सुनील उंबरे (पंढरपूर) या भक्तांनी आंब्याची पूजा अर्पण केली आहे.

 आटपाडी दि.10(प्रतिनिधी):

कर्नाटकातून कराडला आयशर टेम्पोमधून सुमारे 14 लाख,52 हजार रुपये किंमतीचा गुटखा घेऊन जात असताना आटपाडी पोलिसांनी सांगली-सोलापूर जिल्हा सरहद्दीवरील उंबरगाव चेक पोस्ट नाक्यावर पकडून कारवाई केली. 7 मे रोजी रात्री 2 वाजता ही घटना घडली. 9 मे रोजी आटपाडी पोलिस ठाण्यात चालकावर गुन्हा दाखल करण्यात आला असून गुटख्याच्या पोत्यांसह आयशर टेम्पो ताब्यात घेण्यात आला आहे.
कर्नाटक राज्यातून रेडझोन असलेल्या सोलापूर जिल्ह्यातून सांगली जिल्ह्याच्या हद्दीत प्रवेश करताना उंबरगाव चेक पोस्ट नाक्यावर कराडकडे गुटखा घेऊन जाणारा आयशर टेम्पो (क्रमांक एम एच 46 बी एफ 4235) पोलिसांनी तपासणीसाठी थांबविला. टेम्पोच्या काचेवर अत्यावश्यक सेवा,मेडिकल असा स्टिकर लावलेला होता. परंतु आरटीओचा  परवाना नव्हता,अधिकृत पत्र काचेवर चिकटवले नव्हते. त्यामुळे दाट संशय आल्याने पोलीस शिपाई नाईक, घोरपडे, विशाल चव्हाण,देशमुखे व पोलीस मित्र यांनी कसून तपासणी केली. त्या टेम्पोच्या हौदात मागील बाजूस भुशाची पोती व त्यापुढील आतील बाजूस गुटख्याची पोती असल्याचे आढळून आले.टेम्पोचालक रूपचंद प्रेमचंद पांडे (वय 40,रा. महु,मध्य प्रदेश) याच्यासह 10 लाख रुपये किंमतीचा आयशर टेम्पो व 14 लाख,52 हजार, 288 रुपये किंमतीचा गुटखा ताब्यात घेतला.
परंतु हा गुन्हा नोंद होण्यास दोन दिवस उशीर लागला.महाराष्ट्रामध्ये प्रतिबंधित असणारा गुटखा असल्याचे निष्पन्न झाल्यानंतर अन्न सुरक्षा अधिकारी मेघना समाधान पवार यांच्या फिर्यादीनुसार भारतीय दंड संहितेच्या विविध कलमानुसार तसेच अन्न सुरक्षा व मानके अधिनियमांच्या विविध नियमाखाली  9 मे रोजी आटपाडी पोलीस ठाण्यात गुन्हा नोंद केला आहे.
पोलीस अधिक्षक सुहेल शर्मा व अप्पर पोलीस अधीक्षक श्रीमती मनीषा दुबले यांच्या सूचनेनुसार विटा विभागाचे उपविभागीय पोलिस अधिकारी अंकुश इंगळे व आटपाडी पोलिस ठाण्याचे पोलीस निरीक्षक बजरंग कांबळे यांच्या मार्गदर्शनाखाली सहाय्यक पोलीस निरीक्षक सुधीर पाटील, पोलीस उपनिरीक्षक अजित पाटील, पोलीस उपनिरीक्षक कनकवाडी, पोलीस हवालदार नंदकुमार पवार, पोलीस नाईक खाडे, कराळे, पोलीस शिपाई देशमुखे, मोरे, अतुल माने या पथकाने कारवाई केली. अधिक तपास पोलीस उपनिरीक्षक अजित पाटील करीत आहेत.