दैनिक जनमत

तासगाव आगारातील २४ चालक – वाहक कोरोना बाधित

मुंबईत सेवेदरम्यान लागण तासगाव आगारात खळबळ

तासगाव प्रतिनिधी

     मुंबई येथे बेस्ट वाहतूक सेवेला मदत म्हणून संपूर्ण महाराष्ट्रातील एसटी महामंडळाच्या प्रत्येक जिल्ह्यातील प्रत्येक डेपोतून हजारो बसेस व हजारो वाहक व चालक यांना मुंबई येथे एसटी महामंडळाची सेवा बजावण्यासाठी पाठवले होते. त्यापैकी सांगली जिल्ह्यातील ४२५  वाहक व चालक हे आपापल्या डेपोत परतले होते. परंतु या ४२५ पैकी १०२ वाहक व चालकांना कोरोनाची बाधा झाली असल्याची माहिती समोर आली आहे.

   यापैकी   तासगाव बस आगारातील तब्बल  २४ चालक आणि वाहकांना कोरोनाची बाधा झाली आहे. सोमवारी ४३ चालक – वाहकांच्या अँटीजन टेस्ट घेण्यात आल्या. यापैकी चालक – वाहक मिळून तब्बल २४ जणांचा अहवाल पाॅझिटिव्ह आला. १८ चालक – वाहकांचे अहवाल निगेटिव्ह आले.

       दरम्यान एकाच दिवशी २४ कर्मचा-यांचा अहवाल पाॅझिटिव्ह आल्याने तासगाव आगारात एकच खळबळ उडाली आहे. हे सर्वजण मुंबई येथे वाहतूक सेवेसाठी गेले असताना कोरोनाची बाधा झाल्याने चालक आणि वाहकांत घबराट पसरली आहे.

       मुंबईत लोकल सेवा बंद असल्याने बेस्ट च्या प्रवासी वाहतुकीसाठी सेवा बजावणा-या चालक आणि वाहकांवर मोठा ताण आहे. तो कमी करण्यासाठी राज्यातील सर्व एसटी बस स्थानकातून प्रत्येकी दहा गाड्यासह चालक व वाहक मुंबईत प्रवासी वाहतुकीची सेवा देण्यास पाठविण्यात आले होते. 

       तासगाव आगारातील ४५ चालक-वाहक मुंबईत सेवेसाठी गेले होते. ते परत आल्यानंतर सोमवारी ग्रामीण रुग्णालयात ४३ चालक आणि वाहकांची टेस्ट घेण्यात आली होती.

तर मुंबईहून सांगली जिल्ह्यात परतलेल्या ४२५ एसटी चालक व वाहक पैकी सांगली डेपो येथील ६, मिरज डेपो ६, इस्लामपूर डेपो ६, विटा डेपो १४, आटपाडी डेपो १५, जत डेपो १५, कवठेमहांकाळ डेपो १४, शिराळा डेपो १६, तर तासगाव डेपोतील २४ जणांना कोरोनाची लागण झाली असल्याने सांगली जिल्ह्यासह सर्व एसटी डेपो सह तासगाव डेपोत एकच खळबळ उडाली आहे.

तासगाव डेपोतील वाहक व चालक यांना पुन्हा आपल्या तासगाव डेपोत रुजू होण्यास परवानगी द्यावी या संदर्भात तासगाव तालुक्याचे राष्ट्रवादीचे युवा नेते रोहित दादा पाटील यांनी मुंबई येथे एस टी महामंडळाच्या मुख्य अधिकारी यांची भेट घेतली होती हे विशेष होय. त्यासंदर्भात रोहित दादा पाटील यांनी परिवहन मंत्री ॲड अनिल परब यांची भेट घेण्याचा प्रयत्न केला असता ते आजारी असल्याने त्यांची भेट होऊ शकली नव्हती. परंतु महाराष्ट्रातील सर्व डेपोतील चालक-वाहकांना परत पाठवण्याच्या संदर्भात त्यांनी युवा नेते रोहित दादा पाटील यांना शब्द दिला होता तो पूर्ण केला आहे‌. सांगली जिल्ह्यातील जे चालक व वाहक कोरोना बाधित आहेत त्यापैकी काही चालक-वाहक यांना रुग्णालयात दाखल केले आहे.तर काही चालक व वाहक यांना होम आयसोलेट केले आहे.

 मुख्यमंत्र्यांच्या तुळजाभवानी दर्शनाला भाजपचा आक्षेप

उस्मानाबाद – मुख्यमंत्री उध्दव ठाकरे यांनी तुळजापूर दौऱ्यात तुळजाभवानीचे दर्शन घेतले याला भाजपने आक्षेप घेतला असून ऑनलाईन दर्शन घ्यायला हवे होते याची आठवण करून दिली आहे.https://youtu.be/g6zkYDNT2Ic

उस्मानाबाद जिल्ह्यात अतिवृष्टीमुळे झालेल्या नुकसानीची पाहणी करण्यासाठी मुख्यमंत्री उध्दव ठाकरे आले होते. त्यांनी तुळजापूर तालुक्यातील काटगाव, कात्री, अपसिंगा या गावाची पाहणी केली आणि त्यानंतर पत्रकारांसोबत वार्तालाप करण्यासाठी शासकीय विश्रामगृहात ते तुळजापूर मध्ये आले होते. त्यांनतर त्यांनी ठाकरे घराण्याची कुलस्वामीनी असलेल्या तुळजाभवानीची महाद्वार येथे जात पूजा करून दर्शन घेतले. हाच मुद्दा पकडत भाजपने मुख्यमंत्र्यांना कोंडीत पकडण्याचा प्रयत्न केला आहे. नवरात्र सुरू होण्यापूर्वी प्रशासनाने देवीच्या भक्तांना तुळजापुरात न येण्याचे आवाहन केले होते तसेच तुळजापूर येथे प्रवेश बंदी देखील केली गेली आहे. त्यामुळे अनेक भक्त हे देवीच्या दर्शनापासून वंचित आहेत. असे असताना देखील मुख्यमंत्री उध्दव ठाकरे यांनी त्यांना असणाऱ्या विशेष अधिकाराचा वापर करत महाद्वारातून दर्शन घेतले आहे. यालाच भाजपने विरोध केला असून भाजयुमो चे जिल्हाध्यक्ष राजसिंह राजेनिंबाळकर यांनी देवीचे मंदिर भक्तांच्या दर्शनासाठी खुले करावे अशी मागणी केली आहे.

  कवठेएकंद येथे  भाजप पंचायत समिती सदस्य संतोष आठवले व कार्यकर्त्याकडून नाराजी व्यक्त करीत विधान परिषद विरोधी पक्ष नेते प्रवीण दरेकर यांचा निषेध

तासगाव प्रतिनिधी दि.२१

     ‘अतिवृष्टीमुळे राज्यासह  सर्व तालुक्यात सगळीकडे सारखंच नुकसान झाले आहे. तुमच्या गावात काय वेगळं असणार. तुमच्यातील नुकसान हे सगळीकडेच आहे.तसेच असणार. त्यामुळे काय पहायचे आहे’. भाजपचे विधानपरिषदेचे विरोध पक्षनेते प्रवीण दरेकर यांच्या या वक्तव्यावरून तासगाव तालुक्यातील कवठेएकंद येथील शेतकरी चांगलेच संतापले. तर दरेकरांना एवढी मग्रुरी कशाला पाहिजे, असा सवाल व्यक्त करीत भाजपच्या कार्यकर्त्यांनीच त्यांचा निषेध करीत घरचा आहेर दिला.   गेल्या आठवड्यात राज्यभरात जोरदार अतिवृष्टी झाली आहे. त्यामुळे शेतकऱ्यांचे अतोनात नुकसान झाले आहे. या नुकसानीची पाहणी करण्यासाठी विधानपरिषदेचे विरोधी पक्षनेते प्रवीण दरेकर आज सांगली जिल्ह्याच्या दौऱ्यावर आले होते. दरम्यान, दरेकर जिल्ह्याच्या दौऱ्यावर आल्यानंतर कवठेएकंद येथे भेट देणार होते. कवठेएकंद येथील शेतकऱ्यांची भेट व पाहणीचे नियोजन दुपारी साडेबारा वाजता नियोजित होते. त्यामुळे गावातील भाजपचे पंचायत समितीचे सदस्य संतोष आठवले यांच्यासह सर्व भाजपच्या पदाधिकारी, कार्यकर्त्यांनी दरेकरांना नुकसान झालेले क्षेत्र दाखवण्याचे नियोजन केले होते. शिवाय गावातील अतीनुकसान झालेल्या कुटुंबांना मदतीचे किट देण्याचे नियोजनही भाजपच्या कार्यकर्त्यांनी केले होते. हे किट दरेकरांच्या हस्ते देण्यात येणार होते. मात्र दरेकर यांना कवठेएकंद येथे नुकसान ग्रस्त शेतकरी व नागरिकांचे घरांचे नुकसान पाहणी दौरा आयोजित केला होता. परंतु येण्यास साडेचार वाजले तरीही दरेकर आले नसल्याने. शेतकरी, भाजपचे पदाधिकारी, कार्यकर्ते दरेकर यांची वाट पाहून कंटाळले होते. मात्र कवठेएकंदमार्गे सांगलीला जाताना दरेकर कवठेएकंद येथे थांबले नाहीत. केवळ गाडी थांबवली. गाडीची काच खाली घेतली. यावेळी भाजपच्या कार्यकर्त्यांनी व शेतकऱ्यांनी दरेकर यांना नुकसानीची पाहणी करा. शिवाय नुकसानग्रस्तांना मदतीचे किट तुमच्या हस्ते द्या, अशी मागणी केली.

मात्र, दरेकर यांनी गाडीतून खाली न उतरताच केवळ आपल्या आलिशान गाडीची काच खाली करून ‘सगळीकडे सारखेच नुकसान झाले आहे. तुमच्यात काय वेगळं असणार. त्यामुळे इथे काय पहायचे’, असे वक्तव्य केले आणि शेतकऱ्यांची कोणतीही विचारपूस न करता गाडीच्या काचा वर करीत एसीची हवा खात ते निघून गेले.   दरेकरांच्या या वक्तव्यावर कवठेएकंद येथील शेतकरी व भाजपच्या कार्यकर्त्यांनी एकत्रित येऊन सडकून टीका केली आहे. संतप्त शेतकरी व कार्यकत्यांनी दरेकरांचा निषेध केला आहे. दरेकर यांना भाजपच्याच कार्यकर्त्यांकडून दिल्या गेल्या या घरच्या आहेराबाबत चर्चा आहे. यावेळी दीपक घोरपडे, दीपक जाधव, जयवंत माळी, बाळासो शिरोटे, बाळासो पवार, राहुल शिरोटे, गुंडाभाऊ मेणगुदले, आनंदराव काळे, संजय शिरतोडे, महादेव काळे यांच्यासह भाजपचे पदाधिकारी, कार्यकर्ते, शेतकरी उपस्थित होते.

दरेकरांना एवढी मग्रुरी कशाला पाहिजे : संतोष आठवले पं.स. सदस्य

  कवठेएकंद परिसरात अतिवृष्टीमुळे शेतकऱ्यांवर भयाण संकट कोसळले आहे. शेतकऱ्यांना मदतीची व आधाराची गरज आहे. मात्र भाजपचे विधानपरिषदेचे विरोधी पक्षनेते प्रवीण दरेकर यांनी कवठेएकंद येथे गाडीतून उतरण्याचीही तसदी घेतली नाही. ते भुर्रकन निघून गेले. कवठेएकंद येथील भाजपच्यावतीने नुकसानग्रस्तांना मदतीचे किट दरेकर यांच्याहस्ते देण्यात येणार होते. मात्र त्यासाठीही त्यांनी वेळ दिला नाही. ते जरी आमच्या पक्षाचे असले तरी त्यांना एवढी मग्रुरी कशाची आली आहे, असा संतप्त सवाल भाजपचे पंचायत समितीचे सदस्य संतोष आठवले यांनी केला आहे. दरेकरांच्या या वागणुकीचा त्यांनी निषेध केला आहे.

अवकाळी पावसामुळे तासगाव तालुक्यातील सत्तर ते ऐंशी टक्के शेत जमिनीचे शेतकऱ्यांचे नुकसान झाले आहे बरेच गावांमध्ये ओढ्याचे पुराचे पाणी घरांमध्ये शिरल्यामुळे घराचे नुकसान झाले आहे. कवठे एकंद येथील हद्दीतील शेतीच्या व घराच्या नुकसान झाले आहे.त्या पार्श्वभूमीवर महा विकास आघाडीचे कृषी राज्यमंत्री ना डॉक्टर विश्वजित कदम यांनी राष्ट्रवादी काँग्रेस पक्षाचे व काँग्रेस पक्षाचे कार्यकर्ते यांच्या समवेत कवठे एकंद येथे दौरा केला होता नुकसान झालेल्या द्राक्ष शेतीचे व बौद्ध  समाजातील घरांचे झालेले नुकसानीची पाहणी केली होती. तासगाव कवठेमहांकाळ च्या आमदार श्रीमती सुमनताई पाटील यांनीही राष्ट्रवादी कार्यकर्ते समवेत कवठे एकंद गावाचा दौरा करून तहसीलदार व गटविकास अधिकारी यांना योग्य त्या सूचना दिलेल्या आहेत. परंतु विरोधी पक्ष भाजपाकडून विधान परिषद विरोधी पक्ष नेते प्रवीण दरेकर यांनाही  कवठे एकंद येथे आणण्याचा भाजप कार्यकर्त्यांचा प्रयत्न होता परंतु ते आले परंतु नुकसानग्रस्त शेतकरी व नागरिक यांची भेट न घेता उर्मट भाषा वापरून निघून गेले यामुळे कवठे एकंद गावच्या भाजपचे कार्यकर्ते व पंचायत समिती सदस्य संतोष आठवले यांच्या जिव्हारी ही गोष्ट लागली आहे असे म्हटले तर वावगे ठरू नये, लवकरच कवठे एकंद गावच्या ग्रामपंचायतीच्या निवडणुका होऊ घातल्या असल्याने प्रत्येक पक्षाचे कार्यकर्ते हे येन केन प्रकारे शेतकरी व  लोकांपर्यंत पोहोचून त्यांना मदत कशी मिळेल यासाठी प्रयत्नशील आहेत असे दिसत आहे.

उस्मानाबाद – मुख्यमंत्री उध्दव ठाकरे आज उस्मानाबाद दौऱ्यावर आहेत. अतिवृषटी झालेल्या भागांची ते पाहणी करणार आहेत. मात्र मुख्यमंत्र्यांच्या दौऱ्यात पत्रकारांना वाळीत टाकण्याचा घृणास्पद प्रकार घडला आहे. जिल्हा माहिती कार्यालयाकडून पोलीस प्रशासनाला ४३ पत्रकारांची यादी पाठवण्यात आली. मात्र त्यातील केवळ मोजक्याच पत्रकारांना पासेस देण्यात आल्याचे उघडकीस आले आहे.आज सकाळी पत्रकार पास घेण्यासाठी जिल्हा माहिती कार्यालयात गेले असतात तेथील कर्मचारी पवार यांनी छोट्या पत्रकारांना पास दिले नाहीत. या संतापजनक प्रकारानंतर जिल्हा पोलिस अधीक्षकांना संपर्क केला असता त्यांनी पोलीस निरीक्षक बाबर यांना संपर्क करण्यास सांगितले. बाबर यांना संपर्क साधला असता आम्ही जिल्हा माहिती कार्यालयाकडून आलेल्या यादीनुसार पास दिले असल्याचे सांगितले. माहिती कार्यालय सांगते यादी पाठवली, श्री बाबर म्हणतात पास दिले मग नावांची छाटणी कोणी केली? तो करण्यामागे त्यांचा काय उद्देश होता? पत्रकारांना मुख्यमंत्र्यांच्या दौऱ्यात सहभागी का करून घेतले नाही? असे अनेक प्रश्न उपस्थित होत आहेत. पत्रकारांना पास देताना नेमका कोणता निकष लावण्यात आला? मोजक्याच लोकांना पास द्यायचे होते तर सर्वांकडून फोटो का मागवण्यात आले? याचे उत्तर प्रशासनाला द्यावे लागणार आहे. पत्रकारांसोबत असा भेदभाव केव्हाच झाला नव्हता. मुख्यमंत्री स्वतः एका वर्तमानपत्राचे संपादक राहिले आहेत. त्यांच्याच दौऱ्यात पत्रकारांना दूजाभाव मिळत असेल तर इतरांकडून काय अपेक्षा करणार.

दूजाभाव करणाऱ्या प्रशासनातील अधिकारी कर्मचारी यांचा शोध घेऊन उचित कारवाई करण्यात यावी. वृत्तपत्र लोकशाहीचा चौथा स्तंभ आहेत. ती एक मोठी व्यापक चळवळ आहे. त्यांच्या हक्काना नख लावण्याचा प्रकार लाजिरवाणा आहे.

बिभीषण लोकरे

 संपादक दैनिक मराठवाडा केसरी