दैनिक जनमत

उस्मानाबाद –   निधन, राजीनामा, अनर्हता किंवा इतर अन्य कारणांमुळे ग्रामपंचायतीतील रिक्त झालेल्या जागांच्या पोटनिवडणूकांसाठी पारंपारिक पध्दतीने राबविण्यात यावयाचा निवडणूक कार्यक्रम निवडणूक आयोगाने जाहीर केला असून त्याबाबत आदेश देण्यात आले आहे.

 उस्मानाबाद जिल्ह्यात ११९ ग्रामपंचायतीमधील १७९ पदे विविध कारणांमुळे रिक्त आहेत.दिनांक १८/०२/२०२१ रोजी अंतिम मतदार यादी प्रसिध्द होणाऱ्या ग्रामपंचायतींपैकी खालील बाबींची पूर्तता करणाऱ्या ग्रामपंचायतींमधील रिक्त पदांच्या पोटनिवडणुक कार्यक्रम राबविण्यासाठी आदेशित करण्यात आले आहे.

१. ज्या ग्रामपंचायतीमध्ये कोवीड अॅक्टीव्ह रुग्ण संख्या नगण्य आहे.

२. ज्या ग्रामपंचायतीची मुदत संपण्यास सहा महिन्याचा पेक्षा जास्त कालावधी शिल्लक आहे. अश्याच ग्रामपंचायतीत रिक्त असलेल्या पदावर पोटनिवडणुका होणार आहेत.

निवडणुकीचे टप्पे

नागरिकांच्या मागासवर्ग प्रवर्गाची अतिरिक्त ठरलेली रिक्त  जागा सर्वसाधारण जागा म्हणून अधिसूचित करण्यासाठी पूर्वी सार्वत्रिक निवडणूकीसाठी प्रसिध्द केलेल्या अंतिम प्रभाग रचनेच्या अधिसूचनेमध्ये सुधारणा करण्याचा दिनांक  दिनांक २२/११/२०२१ (सोमवार) पर्यंत

तहसिलदार यांनी निवडणुकीची नोटीस प्रसिध्द करण्याचा दिनांक २२/११/२०२१ (सोमवार)

नामनिर्देशनपत्रे मागविण्याचा व सादर करण्याचा दिनांक व वेळ (नमुना अ अ मध्ये नमूद केलेल्या ठिकाणी) दिनांक ३०/११/२०२१ (मंगळवार) ते दिनांक ०६/१२/२०२१ (सोमवार) वेळ सकाळी ११.०० ते दु. ३.००

नामनिर्देशनपत्र छाननी करण्याचा दिनांक व वेळ (नमुना अ अ मध्ये नमूद केलेल्या ठिकाणी )दिनांक ०७/१२/२०२१ (मंगळवार) वेळ सकाळी ११.०० वाजल्यापासून छाननी संपेपर्यंत

नामनिर्देशनपत्र मागे घेण्याचा अंतिम दिनांक व वेळ (नमुना अ अ मध्ये नमूद केलेल्या ठिकाणी) दिनांक ०९/१२/२०२१ ( गुरुवार) दुपारी ३.०० वा. पर्यंत

निवडणूक चिन्ह नेमून देण्याचा तसेच अंतिमरित्या निवडणूक लढविणाऱ्या उमेदवारांची यादी प्रसिध्द करण्याचा दिनांक व वेळ दिनांक ०९/१२/२०२१ ( गुरुवार) दुपारी ३.०० वा. नंतर

आवश्यक असल्यास मतदानाचा दिनांक दिनांक २१/१२/२०२१ (मंगळवार) सकाळी ७.३० वा. पासून ते सायं. ५.३० वा. पर्यंत 

मतमोजणीचा दिनांक (मतमोजणीचे ठिकाण व वेळ जिल्हाधिकाऱ्यांच्या मान्यतेने तहसिलदार निश्चित करतील त्यानुसार राहील) दिनांक २२/१२/२०२१ (बुधवार)

जिल्हाधिकारी कार्यालयामार्फत निवडणुकीच्या निकालाची अधिसूचना प्रसिध्द करण्याचा अंतिम दिनांक दिनांक २७/१२/२०२१ (सोमवार) पर्यंत

 १) दिनांक  २० नोव्हेंबर २०२१ रोजी  उस्मानाबाद  जिल्ह्यामध्ये शहरी भागामध्ये १३ लसीकरण केंद्रावर १८  वर्षाच्या वरील  नागरिकांना ऑन स्पॉट पद्धतीने मिळणार कोव्हॅक्सिन लसीचा डोस

उस्मानाबाद जिल्ह्यामध्ये दिनांक २० नोव्हेंबर २०२१ रोजी शहरी भागामध्ये १३ लसीकरण केंद्रावर १८ वर्षाच्या वरील  नागरिकांना कोव्हॅक्सिन लसीचा पहिला आणि दुसरा डोस दिला जाणार आहे.लाभार्थ्यांनी लसीकरणाला जाताना आपले आधार कार्ड/ पॅन कार्ड/ ड्रायव्हिंग लायसन्स/ पासपोर्ट /मतदाता कार्ड इत्यादी पैकी ओळख पत्र सोबत बाळगावे. या केंद्रांवर १८  वर्षाच्या वरील  वयोगटातील नागरिकांना तसेच जेष्ठ नागरिक, दुर्धर आजारी व्यक्ती ,दिव्यांगयांना प्राधान्याने   कोव्हॅक्सिन लसीचा पहिला डोस दिला जाणार आहे,तसेचज्या १८ वर्षाच्या वरील  लाभार्थ्यांना कोव्हॅक्सिन लसीचा पहिला डोस घेऊन २८ दिवस पूर्ण झालेले आहेत अशाच  लाभार्थ्यांना दूसरा डोस दिला जाणार असल्याने इतर लाभार्थ्यांनी लसीकरण केंद्रावर जाऊन गर्दी करू नये .

टिप :- उप जिल्हा रुग्णालय कळंब येथील कोव्हॅक्सिन लसीकरण सत्र या पुढे विद्या भवन हायस्कूल ऐवजी फुले आंबेडकर वाचनालय , कळंब या ठिकाणी होईल..

लसीकरणाची वेळ सकाळी ९ वाजल्यापासून दुपारी ५ वाजेपर्यंत आहे. दिनांक १९ नोव्हेंबर २०२१ रोजी सायंकाळी चार वाजल्यापासून ऑनलाईन बुकिंग करणे करिता स्लॉट्स खुले करण्यात आलेले आहेत. ऑनलाईन नोंदणी करून स्लॉट बुक केलेल्या नागरिकांसाठी आणि ऑन स्पॉट नोंदणी करून लस घेण्यासाठी आलेल्या लाभार्थ्यांसाठी स्वतंत्र रांगा ठेवण्यात येणार आहेत. ऑन स्पॉट नोंदणी करू इच्छित लाभार्थ्यांनी लसीकरणाला जाताना ज्या मोबाईल क्रमांकावर ऑन स्पॉट नोंदणी करायचे आहे तो मोबाईल सोबत बाळगावा. लसीकरण केंद्रावर प्रथम येणाऱ्या लाभार्थ्यांना क्रमाने लसीकरण केले जाणार आहे. यावेळी केंद्रावरील उपलब्ध डोसच्या संख्येच्या प्रमाणातच टोकण वाटप करण्यात येणार आहेत. लसीकरण केंद्राच्या ठिकाणच्या ग्रामपंचायत, नगरपालिका व पोलीस प्रशासन यांनी गर्दी नियंत्रित करून आरोग्य कर्मचाऱ्यांना नोंदणी आणि लसीकरणामध्ये मदत करावी आणि उपस्थित लाभार्थ्यांनी गर्दी न करता कोविड च्या मार्गदर्शक सूचनांचे पालन करत आणि शांतता व सुव्यवस्था अबाधित ठेवत लस घ्यावी असे आवाहन करण्यात येत आहे.

२) दिनांक २० नोव्हेंबर २०२१ रोजी उस्मानाबाद जिल्ह्यामध्ये उपजिल्हा रुग्णालय ,ग्रामीण रुग्णालय अंतर्गत शहरी भागातील १७ लसीकरण केंद्रावर १८ वर्षाच्या वरील नागरिकांना ऑन स्पॉट पद्धतीने मिळणार कोविशील्ड लसीचा डोस

उस्मानाबाद जिल्ह्यामध्ये दिनांक २० नोव्हेंबर २०२१ रोजी १७ लसीकरण केंद्रावर १८ वर्षाच्या वरील नागरिकांना कोविशील्ड लसीचा पहिला आणि दुसरा डोस दिला जाणार आहे.लाभार्थ्यांनी लसीकरणाला जाताना आपले आधार कार्ड/ पॅन कार्ड/ ड्रायव्हिंग लायसन्स/ पासपोर्ट /मतदाता कार्ड इत्यादी पैकी ओळख पत्र सोबत बाळगावे. या केंद्रांवर १८ वर्षाच्या वरील वयोगटातील नागरिकांना तसेच जेष्ठ नागरिक, दुर्धर आजारी व्यक्ती ,दिव्यांग यांना प्राधान्याने कोविशील्ड लसीचा पहिला डोस दिला जाणार आहे,तसेचज्या १८ वर्षाच्या वरील लाभार्थ्यांना कोविशिल्ड लसीचा पहिला डोस घेऊन ८४ दिवस पूर्ण झालेले आहेत अशाच लाभार्थ्यांना दूसरा डोस दिला जाणार असल्याने इतर लाभार्थ्यांनी लसीकरण केंद्रावर जाऊन गर्दी करू नये .

लसीकरणाची वेळ सकाळी ९ वाजल्यापासून दुपारी ५ वाजेपर्यंत आहे. तसेच ऑन स्पॉट नोंदणी करून लस घेण्यासाठी आलेल्या लाभार्थ्यांसाठी स्वतंत्र रांगा ठेवण्यात येणार आहेत. ऑन स्पॉट नोंदणी करू इच्छित लाभार्थ्यांनी लसीकरणाला जाताना ज्या मोबाईल क्रमांकावर ऑन स्पॉट नोंदणी करायचे आहे तो मोबाईल सोबत बाळगावा. लसीकरण केंद्रावर प्रथम येणाऱ्या लाभार्थ्यांना क्रमाने लसीकरण केले जाणार आहे. यावेळी केंद्रावरील उपलब्ध डोसच्या संख्येच्या प्रमाणातच टोकण वाटप करण्यात येणार आहेत. लसीकरण केंद्राच्या ठिकाणच्या ग्रामपंचायत, नगरपालिका व पोलीस प्रशासन यांनी गर्दी नियंत्रित करून आरोग्य कर्मचाऱ्यांना नोंदणी आणि लसीकरणामध्ये मदत करावी आणि उपस्थित लाभार्थ्यांनी गर्दी न करता कोविड च्या मार्गदर्शक सूचनांचे पालन करत आणि शांतता व सुव्यवस्था अबाधित ठेवत लस घ्यावी असे आवाहन करण्यात येत आहे.

उस्मानाबाद

केंद्र सरकार मधील भारतीय जनता पार्टीच्या सरकारने शेतकरी विरोधी तीन काळे कायदे पारित केले होते त्या कायद्याला विरोध दर्शविण्यासाठी काँग्रेससह विरोधी पक्ष गेली १४ महिन्यापासून दिल्लीच्या सीमेवर ठाण मांडून बसले होते अखेर केंद्र सरकारने हे प्रस्तावित केलेले काळे कायदे तत्वतः मागे घेत असल्याचे जाहीर केले केंद्र सरकार अखेर शेतकरी व विरोधकांच्या आंदोलना समोर झूकले म्हणून उस्मानाबाद जिल्हा काँग्रेस कमिटी उस्मानाबाद च्यावतीने रयतेचे राजे छत्रपती शिवाजी महाराज यांच्या अश्वारूढ पुतळ्यास पुष्पहार अर्पण करून   आणि फटाके फोडून आनंदोत्सव साजरा करण्यात आला 

    यावेळी जिल्हाध्यक्ष ॲड.धिरज पाटील, संघटक राजाभाऊ शेरखाने,कार्याध्यक्ष खलील सय्यद, उपाध्यक्ष प्रशांत पाटील, सचिव जावेद काझी, ॲड.विश्वजीत शिंदे ॲड.राहुल लोखंडे ॲड.अतुल देशमुख बालाजी नायकल प्रभाकर लोंढे कपील भाई ॲड.गणपती कांबळे अहमद चाऊस यांचेसह काँग्रेसचे पदाधिकारी कार्यकर्ते यावेळी मोठ्या संख्येने उपस्थित होते.

विद्युत रोषणाई मुळे दर्गाह उजळला

कारी: दि१९ प्रतिनिधी

उस्मानाबाद तालुक्यातील कारी येथील हिंदू-मुस्लीम एकतेचे प्रतीक असलेले ग्रामदैवत हजरत बरकत अली शह बाबा यांच्या उरुसास गुरुवारी मोठ्या उत्साहात प्रारंभ झाला.उरूस निमित्त दर्गाहला आकर्षक विद्युत रोषणाई करण्यात आल्याने परिसर उजळून निघत आहे.गुरुवारी संदल मिरवणूक, शुक्रवारी चिराग यादिवशी उरूस कमिटीकडून भाविकांना प्रसादाचे आयोजनही करण्यात आले होते., ग्रामस्थांनी हजरत बरकत अली शहा बाबा यांच्या दर्गाहवर जाऊन चादर चढवून आशीर्वाद घेतले.तसेच शनिवारी सकाळी पारंपारिक पद्धतीने दुवाचा कार्यक्रम पार पडून उरुसाची सांगता होणार आहे.

यावेळी माजी सरपंच इम्रान मुलाणी, ग्रा. पं. सदस्य ईलाई मुलाणी, तय्यब सय्यद , तांदूळजाचे मौलाना गुलाब हुसेन, रिजवान सय्यद राजू आतार, सुभाष पाटील,खंडू शिंदे, संतोष कावळे, शीराज मुलाणी, अलीम मुजावर, रमजान मुजावर, सोहेल मुलाणी, सय्यम सय्यद, शहाजान कोतवाल, अझहर मुलाणी, रमजान आतार, अस्लम शेख, राजू शेख, निहाल मुलाणी, सज्जाद मुलाणी, अजिज मुलाणी, बशीर मुलाणी,आदम मुलाणी, मुख्तार मुलाणी, जमीर मुलाणी आदीची उपस्थिती होती.

सलगरा (प्रतिक भोसले ) – लग्न समारंभासाठी जात असताना अपघात होऊन पती पत्नीचा जागीच मृत्यू झाला असून ११ वर्षाचा मुलगा गंभीर जखमी झाला आहे.

सचिन भावसार (४०) आणि राणी भावसार (३४) मुलगा कौस्तुभ(११) रा. देऊळगाव राजा ह.मु. औरंगाबाद तिघे औरंगाबादहून गुंजोटी ता. उमरगा येथे लग्नसमारंभासाठी पहाटे एम एच २० सी एस ०६७० या चार चाकी वाहनातून निघाले होते सकाळी ८.३० गंधोरा पाटीजवळ झाडावर गाडी धडकली यात पती पत्नी दोघांचा मृत्यू झाला असून मुलगा कौस्तुभ याच्या पायाला गंभीर दुखापत झाली आहे. हा अपघात भरधाव वेगाने गाडी चालवताना वाहनावरील ताबा सुटल्याने झाल्याचा अंदाज व्यक्त केला जात आहे. मयत पती पत्नी चे शव नातेवाईकांच्या ताब्यात दिले असून गंभीर दुखापत झालेल्या मुलाला तुळजापूर येथे उपचारासाठी नेण्यात आले आहे. घटनास्थळी महामार्ग पोलिस मदत केंद्र नळदुर्ग चे सहायक पोलीस निरीक्षक उमाजी राठोड आणि त्यांचे पथक दाखल झाले असून. पुढील तपास करत आहेत.

 कसबे तडवळे – उस्मानाबाद तालुक्यातील कसबे तडवळे येथे शिवसेनेचे युवा नेते ग्रामपंचायत सदस्य विशाल जमाले यांच्या वाढदिवसानिमित्त आज दिनांक19 नोव्हेंबर रोजी सायंकाळी ठीक 6.00वाजता बाजारपेठ येथे शेतकऱ्यांसाठी वरदान ठरलेले महाराष्ट्रातील सुप्रसिद्ध हवामान अभ्यासक व शेती तज्ञ  पंजाबराव डख यांचे शेतकऱ्यांच्या शेतातील रब्बी हंगामातील हरभरा पिकाचे उत्पादन वाढीसाठी शेतकऱ्यांना मार्गदर्शन होणार आहे.

तर दिनांक 24 नोव्हेंबर रोजी संध्याकाळी ठीक 6.00 वाजता शिवाजी चौक येथे महाराष्ट्रातील प्रख्यात शिवशाहीर संतोष साळुंके टीव्ही स्टार यांच्या बहारदार पोवाड्याचा कार्यक्रम यासह विविध कार्यक्रमाचे आयोजन करण्यात आले आहे.तरी याचा सर्व शेतकरी बंधू व शिवप्रेमींनी याचा आवश्यक लाभ घ्यावा.असे अवाहन विशाल दादा जमाले मित्र परिवाराच्या वतीने करण्यात आले.

खासदारांनी बँकेत जाऊन घेतला समाचार!

उस्मानाबाद – उस्मानाबाद शहरातील स्टेट बँक ऑफ इंडिया ची मुजोरी कशी चालते याचा अनुभव अनेक शहरवासीयांना यापूर्वी आला आहे. मात्र आज वेगळाच प्रकार समोर आल्याने खुद्द खासदार ओमप्रकाश राजेनिंबाळकर यांना बँकेत यावे लागले.

धारूर येथील शेतकरी विश्वनाथ पवार आणि तुकाराम मोरे यांची पीक कर्जाची फाईल डेप्युटी मॅनेजर कांबळे यांनी तोंडावर फेकून मारली कारण दोन्ही शेतकऱ्यांनी बळजबरी माथी मारत असलेल्या १०२५० रू हेल्थ इन्शुरन्स घेण्यास नकार दिला होता. हा घडलेला प्रकार त्यांनी खासदार ओमप्रकाश राजेनिंबाळकर यांना देखील फोनवर सांगितला डेप्युटी मॅनेजर यांना फोनवर बोलण्याची विनंती केली मात्र त्यांनी नकार दिल्याने खुद्द ओमराजे निंबाळकर बँकेत आले. यापूर्वी पीक कर्ज घेणाऱ्या किती शेतकऱ्यांना बळजबरी ने हे हेल्थ इन्शुरन्स घेण्यास भाग पाडले याची चौकशी करण्याची आणि त्याचा अहवाल देण्याची मागणी त्यांनी डी डी आर यांच्याकडे केली. तसेच शेतकऱ्यांच्या बाबतीत जो फाईल तोंडावर फेकण्याचा प्रकार घडला त्याचे सीसीटिव्ही फुटेज घेऊन वरिष्ठांकडे तक्रार करणार असल्याचे त्यांनी म्हटले आहे. तसेच येत्या अधिवेशनात शेतकऱ्यांना बँकांकडून जी वागणूक मिळते जो त्रास सहन करावा लागतो त्याबद्दल तारांकित प्रश्न विचारणार असल्याचे त्यांनी म्हटले आहे. आज घडलेल्या प्रकाराबद्दल एस बी आय मुख्य शाखा यांना विचारले असता त्यांनी अधिक माहिती देण्यास बाईट देण्यास नकार दिला.