दैनिक जनमत

उस्मानाबाद – जिल्ह्यात लस न घेणाऱ्या अधिकारी आणि कर्मचाऱ्यांच्या कार्यवाहीचा बडगा उगारण्यात येण्याची शक्यता आहे. जिल्हाधिकारी कौस्तुभ दिवेगावकर यांनी जिल्ह्यातील सर्व विभाग प्रमुखांना पत्र लिहून लस न घेणाऱ्या अधिकारी कर्मचारी आणि त्यांच्या कुटुंबीयांनी देखील लस घेतली आहे का नाही याची माहिती मागवली आहे. तसेच ज्या अधिकारी कर्मचाऱ्यांनी लस घेतली नाही त्यांचे वेतन का रोखू नये असा खुलासा देखील घेतला जाणार आहे.

दिनांक १६ जानेवारी २०२१ पासून कोविड १९ लसीकरण मोहिम राबविली जात आहे. तथापी अद्यापही जिल्हयातील पहिली मात्रा न मिळालेल्या लोकांची टक्केवारी ३७% इतकी आहे ही अत्यंत गंभीर बाब आहे. आज रोजी जिल्ह्यात सर्व आरोग्य संस्थांमध्ये कोव्हीड- १९ प्रतिबंधात्मक लसीकरण सत्रांच्या माध्यमातुन सर्व १८ वर्षे वयावरील नागरीकांसाठी मोफत लसीकरणाची सुविधा उपलब्ध असूनही काही शासकिय अधिकारी / कर्मचारी व त्यांचे कुटुंबिय यांनी अद्याप लस घेतली नसल्याचे आढळून येते ही बाब अत्यंत खेदजनक आहे. सर्व कर्मचारी, त्यांचे कुटूंबिय व जवळचे नातेवाईक यांनी लस घेतली किंवा नाही याचे लेखी प्रमाणपत्र घ्यावे. तसेच लस घेतली नसल्यास वेतन का रोखू नये या बाबतचा खुलासा संबंधिताकडून घ्यावा. या सुचनेप्रमाणे कार्यवाही अनुसरण्यात यावी आणि आपल्या अधिनस्त सर्व शासकिय अधिकारी / कर्मचारी व त्यांचे कुटुंबिय यांचे तात्काळ लसीकरण पुर्ण करून घ्यावे. आपल्या अधिनस्त शासकिय अधिकारी / कर्मचारी व त्यांचे कुटुंबिय यापैकी लसीकरणापासून कोणीही वंचित राहिल्याचे आढळल्यास यासाठी आपणास सर्वस्वी जबाबदार धरण्यात येऊन योग्य ती प्रशासकीय कार्यवाही अनुसरण्यात येईल असे पत्रात म्हटले आहे.

उस्मानाबाद – वैशिष्ट्यपूर्ण योजनेअंतर्गत उस्मानाबाद शहरातील दोन उद्यानाच्या विकासासाठी आणि एका नव्याने करण्यात येणाऱ्या उद्यानासाठी सात कोटींचा निधी नगरविकास विभागाने मंजूर केला आहे, अशी माहिती आमदार कैलास पाटील यांनी दिली.

 शिवसेनेचे पालकमंत्री शंकरराव गडाख, आमदार प्रा. तानाजीराव सावत, खासदार ओमप्रकाश राजेनिंबाळकर, आमदार कैलास घाडगे पाटील, नगराध्यक्ष मकरंद राजेनिंबाळकर यांनी नगर विकास विभागाकडे सातत्याने पाठपुरावा केल्याने निधी मंजूर करण्यात आला आहे. 

या निधीतून शहरातील राष्ट्रमाता जिजामाता उद्यान, छत्रपती संभाजी महाराज उद्यान या दोन उद्यानाचा विकास करण्यात येणार असून, नगर परिषद शाळा क्रमांक 18 येथे नव्याने उद्यान विकसित करण्यात येणार आहे.

राज्यातील नगर परिषदाना वैशिष्ट्यपूर्ण कामासाठी विशेष अनुदान देण्यात येते. या योजनेअंतर्गत उस्मानाबाद नगरपालिकेला सात कोटींचा निधी नगर विकास विभागाने मंजूर केला आहे. या मंजूर निधीतून शहरातील राष्ट्रमाता जिजामाता उद्यानाच्या विकासासाठी तीन कोटी रुपये, नगरपालिका शाळा क्रमांक 11 जवळील छत्रपती संभाजी महाराज उद्यानाच्या विकासासाठी दोन कोटी रुपये मंजूर करण्यात आले आहेत. तर नगरपालिका शाळा क्रमांक 18 जवळ नवीन उद्यान विकसित करण्यासाठी दोन कोटी रुपयांचा निधी मंजूर करण्यात आला आहे. उस्मानाबाद शहरामध्ये सध्या एकही उद्यान सुस्थितीत नाही. त्यामुळे लहान मुले, ज्येष्ट नागरिकांना विरंगुळासाठी एकही ठिकाण नाही. उस्मानाबाद शहरात लहान मुलांपासून ज्येष्ट नागरिकांना विरंगुळा म्हणून उद्यानांची गरज होती. ही गरज ओळखून शहरात असलेली दोन उद्याने विकसित करण्यासाठी आणि नगरपालिका शाळा क्रमांक १८ जवळ नव्याने उद्यान विकसित करण्यात येणार आहे. शहरातील राष्ट्रमाता जिजामाता उद्यान हे सर्वात जुने उद्यान आहे. या उद्यानाची दुरावस्था झाल्याने त्याचा कायापालट करण्यासाठी नगरपालिकेने प्रयत्न सुरु केले होते. या उद्यानाचा विकास करावा, अशी मागणीही नागरिकांतून करण्यात येत होता समतानगरमधील छत्रपती संभाजी महाराज उद्यानाचीही दुरावस्था झाली आहे. त्यामुळे या उद्यानाचा विकास करण्यासाठी नगरपालिकेने नगर विकास विभागाकडे सातत्याने पाठपुरावा सुरु केला होता. पालकमंत्री गडाख, आमदार प्रा. सावंत, खासदार राजेनिंबाळकर, आमदार घाडगे -पाटील, नगराध्यक्ष राजेनिंबाळकर यांनी उद्यानांच्या विकासासाठी निधी उपलब्ध करुन द्यावा, यासाठी प्रयत्न केले. त्यांची ही मागणी लक्षात घेता नगर विकास मंत्री एकनाथ शिंदे यांनी उस्मानाबाद शहरातील तिन्ही उद्यानांसाठी सात कोटी रुपयांचा निधी मंजूर केला आहे. या निधीतून या तिन्ही उद्यानांचा कायापालट करण्यात येणार आहे.  निधी उपलब्ध करुन दिल्याबद्दल मुख्यमंत्री उद्धव ठाकरे, उपमुख्यमंत्री अजित पवार, नगरविकास मंत्री एकनाथ शिंदे यांचे आमदार कैलास पाटील यांनी आभार मानले आहेत.

उस्मानाबाद – कामावर रुजू करून घ्या या मागणीसाठी कोव्हिड १९ कंत्राटी कर्मचारी जिल्हाधिकारी कार्यालयासमोर बेमुदत उपोषणाला बसले आहेत. त्यांनी जिल्हाधिकाऱ्यांना निवेदन दिले या निवेदनात असे म्हटले आहे की कोविडच्या काळात जीवाची पर्वा न करता सेवा दिली आहे जिल्हा रूग्णालय यांच्याकडून जुलै, ऑगस्ट, ऑक्टोबर या तीन महिन्यांचा कामाचा मोबदला दिला नाही दिवाळीच्या तोंडावर तीन ते चार महिन्यांचा मोबदला न देता कामावरून कमी केले आहे त्यांना तात्काळ कामावर रुजू करावे.जीवाची पर्वा न मनोभावे सेवा केली आहे.

कुटुंबातील सदस्यांची पर्वा केली नाही.भविष्यात आमच्या रोजगाराचा प्रश्न मिटेल ते कर्तव्य निभावली.वेळेवर पेगार नाही निष्कर्ष जिल्हा शल्यचिकित्सक यांच्यामध्ये आमची अवस्था.अचानक पद मुक्त केल्यामुळे जगावे कसे असा प्रश्न असे विविध प्रश्न मांडले या निवेदनावर रोहित पांढरे, रणजीत ढवळे,मोहन शिंदे, तुकाराम मोरे,निखील बाहुबळ,सौरभ माळी,रहिम पटेल, अजिंक्य कांबळे, रविंद्र लोंढे, आण्णासाहेब ढोबळे, जगदीश बेंद्रे,सोहम पेठे, संदिप जाधव,अजित पवार , आकाश खंडागळे,अक्षय लांडगे, कृष्णा कुंभार आदींच्या स्वाक्षऱ्या आहेत.

सलगरा, (प्रतिक भोसले)

तुळजापूर तालुक्यातील किलज येथे प्रतिवर्षाप्रमाणे साजरा करण्यात येणारा श्री.खंडोबा याञा पालखी सोहळा महोत्सव यावर्षी ही साजरा करण्यात येणार असल्याचे याञा कमिटीच्या वतीने कळविण्यात आले आहे.     डिसेंबर महिन्यातील दि. ०१ ते १५ तारखेच्या दरम्यान यात्रा व पालखी उत्सव साजरा होणार असून याकरिता किलज ग्रामपंचायतने सहकार्य करावे असे आवाहन याञा कमिटीने ग्रामपंचायतकडे केले आहे. यासाठी श्रमदान व साफसफाई करून ज्या मार्गावर पालखी मार्गस्थ होणार आहे त्या ठिकाणी तात्पुरते स्वरूपाचे लाईटचे फोकस लावून किंवा दिवा बत्ती करून सदर पालखी उत्सवाच्या दरम्यान आपल्याकडील ग्रामस्थांना सहकार्य करण्यास आपल्या माध्यमातून आवाहन करावे तसेच स्वतः व ग्रामपंचायत सर्व सदस्य हजर राहून सहकार्य करावे. सदरचा पालखी उत्सव शांततेत पार पाडण्यात आम्हाला सहकार्य करावे असे खंडोबा याञा उत्सव कमिटीने किलज ग्रामपंचायतला आवाहन केले आहे, तसेच उत्सवा दरम्यान लाईटच्या समस्येबाबत विद्युत मंडळास अगोदरच पूर्व कल्पना द्यावी गावातील गटारे स्वच्छ करावेत असेही कळविण्यात आले आहे.

सलगरा,दि.१३(प्रतिनिधी)

तुळजापूर तालुक्यातील किलज येथे बळीराजा चॅरिटेबल ट्रस्ट किलज आणि पशुसंवर्धन दवाखाना श्रेणी – २ होर्टी यांच्या संयुक्त विद्यमाने दि.१३ नोव्हेंबर रोजी किलज गावातील सर्व पशु, जनावरे यांच्यासाठी लाळ्या खुरकूत लसीकरण व सर्व रोग निदान मोफत शिबीर पार पडले. या शिबिरात पशुसंवर्धन दवाखाना होर्टी येथील डॉ.एन.जे.वागदकर हे उपस्थित होते, डॉ.वागदकर यांनी यासाठी अथक परिश्रम घेतले, या मोफत शिबिरात गावातील एकूण २०० पशु, जनावरे यांची तपासणी पार पडली, या कार्यक्रमाचे आयोजन बळीराजा चॅरिटेबल ट्रस्ट च्या अध्यक्षा संगीता राठोड, उपाध्यक्ष तुकाराम शिंदे, सचिव आनंद निर्मळे यांनी केले होते, तर या कार्यक्रम प्रसंगी पंचायत समिती सदस्य खंडूराज शिंदे,आनंद निर्मळे, तुकाराम शिंदे, नागनाथ शिंदे, दत्ता सोमवंशी, शरद शिंदे, धनराज येलुरे, अशोक शेळके, दयानंद कुठार, जनार्धन शिंदे, सचिन बिडवे, धनराज शिंदे, हनुमंत मोजगे, शिवाजी पांचाळ, राम भोसले, साहेबराव दुधंबे यांच्या सह ग्रामस्थ उपस्थित होते.

ओबीसीचे अज्ञान हेच भाजप व आरएसएसचे राजकीय भांडवल

ओबीसी आरक्षणाबाबत भाजपची दुटप्पी भूमिका उघड

उस्मानाबाद दि.१३ (प्रतिनिधी) – देवेंद्र फडणवीस यांना हॉस्पिटल मध्ये दाखल करून उपचार करण्याची गरज असल्याचा खोचक सल्ला प्रा. हरी नरके यांनी पत्रकार परिषदेत दिला. ओबीसी आरक्षणाबाबत देवेंद्र फडणवीस ओबीसी आरक्षणाच्या बाबतीत चर्चेला येत नाहीत. हरी नरके मोठे विचारवंत आहेत. कधी कधी ते राष्ट्रवादीचे प्रवक्ते असल्याचा भास होतो असे म्हणतात. अभ्यासू आणि तरुण नेत्याला कमी वयात भास होत असतील तर त्यांना हॉस्पिटल मध्ये दाखल करून उपचार घेण्याची आहे. ओबीसी समाजाचे राजकीय आरक्षण हे तत्कालीन देवेंद्र फडणवीस सरकारच्या काळात केलेल्या कुटिल कारस्थानामुळे गेलेले आहे. ओबीसींच्या जनगणनेची माहिती केंद्र सरकारकडे आहे. ती माहिती त्यांनी दिल्ली उच्च न्यायालयाच्या निवृत्त न्यायाधीश न्यायमूर्ती रोहिणी आयोगास दिली. मात्र तीच माहिती सर्वोच्च न्यायालयाच्या न्यायाधीशाला देण्यास केंद्र सरकार जाणीवपूर्वक टाळाटाळ करीत आहे. कारण राष्ट्रीय स्वयंसेवक संघ व भाजपला ओबीसी जनगणना मान्य नाही. जर ओबीसी समाज जागा झाला तर तो सत्तेवर येईल याची भीती भाजप व आरएसएसला आहे. त्यामुळे ओबीसींना देव व देवतांमध्ये अडकविण्यात भाजपची मंडळी प्रयत्न करीत असून त्यांना त्यामध्ये यश आलेले आहे. ओबीसीचे अज्ञान हेच भाजप व आरएसएसचे राजकीय भांडवल असल्याचा घणाघाती आरोप देखील प्रा. हरी नरके यांनी यावेळी केला.

येथील यशराज लॉन्समध्ये ओबीसी प्रबोधन कार्यक्रमाचे आयोजन केले होते. त्यासाठी ते आले असता आयोजित पत्रकार परिषदेत ते बोलत होते. यावेळी समता परिषदेचे जिल्हाध्यक्ष महादेव माळी, कोषाध्यक्ष कुणाल निंबाळकर आदी उपस्थित होते.

पुढे बोलताना प्रा नरके म्हणाले की, ओबीसी आरक्षणासंदर्भात न्यायालयात इंपिरियल डाटा दाखल करण्यासाठी तत्कालीन मुख्यमंत्री फडणवीस यांनी दि. १८ सप्टेंबर २०१९ व दि.१८ नोव्हेंबर २०१९ रोजी पत्राद्वारे केंद्र सरकारकडे मागणी केली होती. केंद्राने माहिती न दिल्यामुळे ओबीसींचे आरक्षण रद्द झाले आहे. विशेष म्हणजे फडणवीस यांच्या बरोबरच राज्याचे सचिव असीम गुप्ता यांनी देखील तब्बल २० वेळा पत्राद्वारे मागणी केलेली आहे. स्वतः मुख्यमंत्री असताना फडणवीस यांनी केंद्राकडे मागणी केली होती. मग आता ते केंद्राकडे विद्यमान राज्य सरकारला मागणी करू नका ? असे सांगत आहेत असा सवाल विचारीत फडणवीस खोटे बोलतात असा आरोपही त्यांनी केला आहे. सर्वात महत्वाचे म्हणजे इम्पेरियल डेटा द्यायचा नाही असा निर्णय दि.१२ जुन २०१८ साली मोदी सरकारने घेतला आहे. मात्र देशातील जनतेला हा निर्णय तत्कालीन प्रधानमंत्री मनमोहन सिंग यांच्या काळात झाला असल्याचा कांगावा करून जनतेची भाजपवाले एक प्रकारे फसवणूक करीत असल्याचा टोलाही त्यांनी लगावला. सर्वात महत्वाचे म्हणजे राज्य घटनेच्या कलम ४२ चा वापर करून ओबीसी आरक्षणाचा निकाल दिल्यामुळे हा निकाल संपूर्ण देशाला लागू होत आहे. ही सर्व बाब वकील असलेल्या फडणवीस यांना पुरेपूर माहीत असून ते खोटे बोलतात. त्यामुळे त्यांची वकिलीची पदवी बोगस असावी असा खोचक टोलाही त्यांनी लगावला. 

केंद्राने ओबीसी जनगणनेची माहिती दिल्यास ९० टक्के काम होऊ शकते. मात्र त्यामध्ये आठ कोटी चूका असल्याचा डांगोरा फडणवीस पिटत आहेत. वास्तवामध्ये या चुकापैकी साडेसहा कोटी चुकांची दुरुस्ती झालेली आहे.  जागतिक स्तरावर अशा चुका १० ते १२ टक्के ग्राह्य धरल्या जातात. कारण देशांमध्ये २६०० जाती असून त्यांच्या अनेक भाषा असल्यामुळे या चुका होणे स्वाभाविक आहे. मात्र दुरुस्ती नंतर चुकांचे हे प्रमाण केवळ सव्वा टक्के आहे. 

Continue

जवळा नि दि 13 प्रतिनिधी

मौजे सांगवी काटी ता तुळजापुर जि उस्मानाबाद येथील मातंग समाजातील बांधकाम मिस्त्री सुधाकर शेंडगे यांच्या हत्येप्रकरणी तामलवाडी पोलीस स्टेशनमध्ये गुन्हा दाखल झाला असुन या गुन्ह्यातील आरोपींना कठोर शिक्षा होण्यासाठी नॅशनल दलीत मुव्हमेंट फाॅर जस्टिस या सामाजिक संघटनेच्या वतीने तहसिलदार व पोलीस निरीक्षक परांडा यांचे मार्फत महामहिम राज्यपाल महोदय यांना कायदेशीर मागण्यांचे निवेदन सादर करण्यात आले.

                   निवेदनात म्हटले आहे की तामलवाडी पोलीसात दाखल गुरनं 195/2021 मधील आरोपींकडे सुधाकर शेंडगे यांचे बांधकामाचे राहिलेले केवळ 7 ते 8 हजार रु मागीतल्याच्या कारणावरुन आरोपींनी सुधाकर शेंडगे व त्यांच्या पत्नीस जातीवाचक शिवीगाळ करुन सुधाकर शेंडगे यांच्या डोक्यात लोखंडी फावडे (खोऱ्याने) मारुन गंभीर जखमी केले होते. सदर प्रकरणी सांगवी काटी ता तुळजापुर सुरेखा शेंडगे यांनी दिलेल्या फिर्यादीवरून तामलवाडी ता. तुळजापूर जि उस्मानाबाद पोलीस स्टेशनमध्ये दि. 30/10/2021 रोजी गुरनं 195/2021 कलम भादवी 307,323 504,506,34 सह अनुसुचित जाती जमाती अत्याचार प्रतिबंधक कायदा कलम 3(2) va, 3(1) r,s, कलमान्वये गुन्हा दाखल झाला असुन तपास उपविभागीय पोलिस अधिकारी तुळजापूर हे करत आहेत. सुधाकर शेंडगे यांचे डोक्यास गंभीर मारहाण दुखापत झाल्यामुळे त्यांचेवर तुळजापूर येथील सरकारी दवाखान्यात उपचार करुन पुढील उपचार सिव्हील हॉस्पीटल सोलापुर येथे ICU विभागात चालु होते. उपचारादरम्यान अखेर त्यांचा सिव्हिल हॉस्पिटल सोलापूर येथे दुर्दैवी मृत्यू झाला आहे. सुधाकर शेंडगे यांनी केवळ बांधकामांचे राहिलेले पैसे मागीतल्यामुळे त्यांचे डोक्यात लोखंडी फावड्याडे गंभीर मारहाण करुन त्यांची निर्घृण हत्या केली आहे. ही घटना माणुसकीला काळिंबा फासणारी असून या गुन्ह्यातील आरोपींना फाशीची शिक्षा होण्यासाठी कायदेशीर विविध मागण्यांचे निवेदन परांड्याचे तहसिलदार रेणुकादास देवणीकर तसेच पोलीस निरीक्षक सुनील गिड्डे यांचे मार्फत राज्यपालांना देण्यात आले आहे निवेदनातील मागण्यांवर कारवाई न झाल्यास जिल्हाधिकारी कार्यालय उस्मानाबाद समोर दि 25 जानेवारी 2022 रोजी अमरण उपोषण करणार इशारा देण्यात आला आहे.

               निवेदनावर संघटनेचे जिल्हाध्यक्ष उस्मानाबाद अजिनाथ राऊत, जिल्हा उपाध्यक्ष कानिफनाथ सरपणे, जिल्हा कोषाध्यक्ष शिवाजी झोंबाडे, परांडा तालुकाध्यक्ष आकाश चव्हाण, परांडा तालुका संघटक आशोक चव्हाण, समता सैनिक दलाचे परंडा तालुकाध्यक्ष आश्रू वाघचौरे, सामाजिक कार्यकर्ते भारत भोसले, अक्षय गायकवाड यांच्या स्वाक्षऱ्या आहेत.

उस्मानाबाद(प्रतिनिधी)दि.१३

रामकृष्ण परमहंस महाविद्यालय म्हणजे एक ज्ञानमंदीर असून या ज्ञानमंदीरातून सुसंस्कारित विद्यार्थी घडवावेत त्यातूनच संस्कारित माणसं घडतील फुले,शाहू,आंबेडकर व संतांचा विचार हाच डाॅ.बापूजींचा विचार आहे डाॅ,बापुजी साळुंखे यांचा त्याग डोळ्यासमोर ठेवून आजच्या शिक्षकांनी या महाविद्यालयातील विद्यार्थ्यांना संशोधक बनवावे व विद्यार्थ्यांची ज्ञानदृष्टी वाढवावी असे प्रतिपादन  रामकृष्ण परमहंस महाविद्यालयातील अतिथी गृहाचे उदघाटना प्रसंगी प्रमुख पाहुणे म्हणून बोलतांना १३नोव्हेंबर रोजी, प्राचार्य अभयकुमार साळुंखे(कार्याध्यक्ष श्री स्वामी विवेकानंद शिक्षण संस्था,कोल्हापूर)यांनी केले आहे.समारंभाच्या अध्यक्षस्थानी मकरंद राजेनिंबाळकर(नगराध्यक्ष न.प.उस्मानाबाद)हे होते.यावेळी कौस्तुभ गावडे(सी.ई.ओ श्री स्वामी विवेकानंद शिक्षण संस्था,) प्राचार्य व मराठवाडा विभाग प्रमुख डाॅ.जयसिंगराव देशमुख,श्रीराम साळुंखे( कोल्हापूर विभाग प्रमुख),माजी प्राचार्य डाॅ.युवराज भोसले,नानासाहेब पाटील,आदी मान्यवर उपस्थित होते. प्रारंभी प्रमुख मान्यवरांनी डाॅ.बापुजी साळुंखे,संस्थामाता सुशीलादेवी साळुंखे,श्री विवेकानंद यांचे प्रतिमांचे पुजन केले.प्राचार्य डाॅ.जयसिंगराव देशमुख यांनी मान्यवरांचे स्वागत केले.पुढे बोलतांना प्राचार्य अभयकुमार साळुंखे म्हणाले की,रामकृष्ण परमहंस महाविद्यालयाच्या ईमारतीची उभारणी करतांना उस्मानाबाद मधील अनेक दानशुरांनी एक एक दगड प्रेमाने दिला आणि हे महाविद्यालय उभारले त्यामुळे हे महाविद्यालय विद्यापीठात व संस्थेत नाव टिकवून आहे.आज कोरोना काळात माणुसकी हरवली आहे पुंन्हा चांगली संस्कृती उभारली पाहिजे,आजचे विद्यार्थी इंटरनेटचा वापर करत आहेत त्यामुळे आजच्या शिक्षकांनी अभ्यास करण्याची गरज आहे.त्यामुळे शिक्षकांनी तयारी करायला हवी व आपले ज्ञान बळकट करायला हवे.अध्यक्षीय समारोप करताना नगराध्यक्ष मकरंद राजेनिंबाळकर म्हणाले की,आपले महाविद्यालय नेहमीच नाविन्यपूर्ण समाजउपयोगी उपक्रम राबवत असते आपणास सहकार्य लागत असेल तर आंम्ही आपल्या पाठीशी आहोत.भविष्यात आपधास सहकार्य करू.प्रास्ताविक करतांना प्राचार्य डाॅ.जयसिंगराव देशमुख म्हणाले की,या महाविद्यालयात के.जी.टू पी.जी शिक्षण मिळाले पाहिजे यासाठी हायस्कूल सुरू करण्याची गरज आहे.या महाविद्यालयात संशोधन सेंटर झेप घेत आहे.त्याचा फायदा भविष्यात परिसरातील शेतक—यांना होईल.यावेळी नानासाहेब पाटील यांनी मनोगत व्यक्त केले.यावेळी प्राचार्या डाॅ.सुलभा देशमुख,प्र.प्राचार्य पवार,प्र.प्राचार्य शिंदे उपस्थित होते.यावेळी मराठवाडा येथील विविध शाखेतून मुख्याध्यापक,माजी प्राध्यापक उपस्थित होते.यावेळी महाविद्यालयातील विद्यार्थी,शिक्षक,शिक्षकेत्तर कर्मचारी व सेवक उपस्थित होते.सूञसंचालन प्रा.वैभव आगळे यांनी केले आभार प्रा.केशव क्षीरसागर यांनी मानले.