दैनिक जनमत

सलगरा : प्रतिक भोसले

 सलगरा (दि.), ता. तुळजापूर येथील प्रविण अशोक कुंभार हे दि. 06.03.2022 रोजी 02.30 वा. सु. औसा रस्त्यावरील समर्थ हॉटेलसमोर आपला मालवाहू ट्रक क्र. एम.एच. 01 डीआर 8000 हा उभा करुन ट्रकच्या केबीनमध्ये झोपले होते. दरम्यान तीन अनोळखी पुरुषांनी प्रविण कुंभार झोपलेल्या ट्रकच्या केबीनच्या चालक सिटच्या पाठीमागील कप्प्यात ठेवलेली 25,000 ₹ रक्कम चोरुन जवळच उभ्या असलेल्या ट्रक क्र. एम.एच. 18 एए 7377 व ट्रक क्र. एम.एच. 12 एफझेड 9137 मधून औसा रस्त्याने पसार झाले. यावर प्रविण कुंभार यांनी आपल्या ट्रकची पाहणी केली असता ट्रकच्या डिझेल टाकीचे कुलूपही तुटलेले त्यांना आढळले. यावर प्रविण यांनी तुळजापूर पोलीस ठाणे गाठून गुन्हा क्र. 70 / 2022 हा 379, 34 अंतर्गत नोंदवला आहे.

            सदर गुन्हा तपासादरम्यान तुळजापूर पोलीसांनी गतीमान तपास करुन मिळालेल्या गोपनीय माहितीच्या आधारे नमूद दोन्ही ट्रक खंडाळा – कार्ला रस्त्यालगत उभे असल्याचे पथकास आढळले. पथकाने त्या ट्रकजवळ जाउन ट्रकमध्ये असलेल्या दोन पुरुषांची विचारपुस केली असता त्यांनी त्यांची नावे 1) उमेश नाना पवार, रा. लोनखस, ता. वाशी 2) ज्ञानेश्वर भागवत शिंदे, रा. रामकुंड, ता. वाशी अशी सांगीतली. पथकाने त्यांच्या ट्रकची तपासणी केली असता वाहनातील इंधन चोरी संबंधीचे साहित्यही त्यांच्या जवळ मिळुन आले. यावर पथकाने त्या दोघांची झडती घेउन त्यांच्या ताब्यातून चोरीच्या नमूद रकमेपैकी 15,000 ₹ जप्त करुन त्या दोघांना अटक केली असून त्यांच्या उर्वरीत साथीदाराचा पोलीस शोध घेत आहेत.

रिधोरे- (अतुल गवळी)

तांदुळवाडी.ता.माढा येथील श्री. भगवान विश्‍वनाथ कदम यांच्या शेतात असलेल्या विजेचा पोलवरील कटपॉईंटवर झालेल्या शॉर्ट सर्किटमुळे,भगवान विश्‍वनाथ कदम,प्रकाश श्रीरंग गवळी,पोपट लंकेश्वर,दत्तात्रय निवृत्ती गवळी,दत्‍तात्रय रघुनाथ खबाले,सिद्धेश्वर श्रीरंग बचुटे यांच्या शेतातील ऊसाला आग लागल्याने जवळपास दहा ते बारा एकर जळून खाक झाला असून शेतकऱ्यांचे मोठ्या प्रमाणात आर्थिक नुकसान झाले आहे.भर दुपारच्यावेळी कडक उन्हात आग लागल्याने आगीने रौद्र रूप धारण केलं होतं.आग विझवण्यासाठी ग्रामस्थांनी मोठी कसरत करत व प्रयत्नांची पराकाष्ठा करून जवळपास ८० ते ९०एकर ऊस आगीपासून वाचविण्यामध्ये ग्रामस्थांना यश आले आहे.

ऊस वाचविण्यासाठी अमोल गवळी,मदन गवळी,प्रदीप गवळी,विष्णू अनपट,अतुल गवळी,सोनू परबत,सदानंद गवळी,पांडुरंग गवळी,बाळासाहेब गवळी,महादेव गवळी,प्रकाश कदम,तेजस परबत,बाळासाहेब कदम, निखील भोसले,संकेत गवळी,पिंटू कदम,अजित खबाले, शिवाजी गवळी,समाधान गवळी,लिंगराज शेटे,आदि ग्रामस्थांच्या सहकार्यामुळे पुढील अनर्थ टळला.

एकीकडे महावितरण विज बिलाचा तगादा लावत आहे.तर दुसरीकडे विजेच्या शॉर्ट सर्किटमुळे आग लागून मोठ्या प्रमाणावर झालेल्या पिक नुकसानीची भरपाई त्वरीत द्यावी अशी मागणी संबंधित शेतकऱ्यांनी प्रतिनिधीशी बोलताना केली आहे.

परंडा (दि ६ मार्च)  परंडा शहरातील जुनी भाजी मंडई येथिल विजय चौतमहाल यांची पानटपरी अज्ञात चोरट्याने फोडून टपरीतील १५ हजार रुपयाची रोख रक्कम चोरली आहे हि घटना दि ६ फ्रेबुवारी रोजी मध्यरात्रीच्या सुमारास घडली या प्रकरणी अज्ञात चोरा विरुद्ध गुन्हा दाखल करण्यात आला आहे .

      या बाबत पोलिसांकडून मिळालेली माहिती अशी की, विजय चौतमहाल यांची जुनी भाजी मंडई येथे पाण टपरी असून विजय चौतमहाल यांनी टपरी मधील बरणीत १३ हजार ५०० रुपये ठेवले होते व गल्ल्यात १ हजार ५०० रूपये ठेवले होते . चौतमहाल यांनी नेहमी प्रमाने रात्री साडे दहा वाजेच्या सुमारास टपरी बंद करून घरी गेले होते .दि ६ रोजी मध्यरात्रीच्या सुमारास अज्ञात चोरटयाने टपरीचा सिलिंगचा पत्रा व प्लायवुड कापून टपरी मधील रोख रक्कम १५ हजाराची चोरी केली .टपरी समोरील दुकानदार संदिप पवार व नितीन पवार यांना चौतमहाल यांच्या टपरी ची खिडकी उघडी दिसल्याने त्यांना संशय आल्याने त्यांनी विजय चौतमहाल यांना माहिती दिल्याने चौतमहाल यांनी टपरी जाऊन पाहिले असता चोरी झाल्याचे दिसून आले .

    चौतमहाल यांच्या फिर्यादी वरून परंडा पोलिसात अज्ञात चोरा विरूध्द गुन्हा दाखल करन्यात आला आसुन पुढील तपास महिला पोलिस हवालदार शबाना मुल्ला करीत आहे.

उस्मानाबाद – वीज कंत्राटी कर्मचाऱ्यांचे पाच महिन्यापासून मानधन थकले असून जिल्ह्यातील वीज कंत्राटी कामगारांचे प्रलंबित प्रश्न मार्गी लावण्याबाबत महाराष्ट्र वीज कंत्राटी कामगार संघाच्या वतीने अधिक्षक अभियंता यांना निवेदन देण्यात आले आहे. परिपत्रक क्र. ५३६ प्रमाणे कंत्राटदारावर दंडात्मक कारवाई करुन ऑक्टोबर २०२१ पासून आजपर्यंतचे पेमेंट कामगारांच्या बँक खात्या जमा करण्यात यावे. वरिष्ठ कार्यालयाकडून आपणांस कोर्ट केस मधील जॉब सिक्युरिटी प्राप्त झालेल्या कंत्राटी कामगारांना तात्काळ कंत्राटदारांकडून पुढील नियुक्ती आदेश देण्यात यावा, उस्मानाबाद जिल्ह्यामध्ये वीज कंत्राटी कामगारांसाठी ईएसआयसी पॉलीसी चालू झाली असल्यामुळे नवीन कंत्राटदार / एजन्सीकडून पॉलीसी चालु करण्यात यावी,दि.०१ जानेवारी २०२२ पासून शासनाने निर्धारित केलेली किमान वेतनवाढ त्वरीत लागू करण्यात यावी.कामावर कार्यरत जुने व अनुभवी कंत्राटी कामगारांना तात्काळ नियुक्ती आदेश नवीन एजन्सीकडून देण्यात यावेत,

नवीन कंत्राटदारांकडून / एजन्सीकडून प्रति कंत्राटी कामगार रु.२०,०००/- प्रमाणे नियुक्तीसाठी (ऑर्डरसाठी) घेतले जात आहेत. तसेच नवीन बिगर अनुभवी (बोगस आय.टी.आय. प्रमाणपत्र ) कामगारांकडून ३०-४० हजार रुपये घेवून ऑर्डर देण्यात येत आहेत. तरी तो भ्रष्टाचार त्वरीत थांबविण्यात यावा,सर्व वीज कंत्राटी कामगारांचा विमा व पी.एफ. मुदतीत भरण्यात यावा.महावितरणच्या सांधिक कार्यालयाकडून निर्गमीत झालेल्या २३८८० परिपत्रकाप्रमाणे कंत्राटी कामगारांना सुरक्षा साधने देण्यात यावीत.मागील कंत्राटदार डी.एम. दहिफळे यांच्या एजन्सी विरोधात लाचलुचपत प्रतिबंधक विभागाकडून कारवाई केलेल्या वीज कंत्राटी कामगारांना अद्याप पर्यंत कामावर घेतलेले नाही. तरी त्यांना तात्काळ कामावर घेण्यात यावे.

 नवीन कंत्राटदारांना उस्मानाबाद जिल्ह्यातील दिलेल्या कार्यक्षेत्रातील कंत्राटी कामगारांच्या यादी संघटनेस देण्यात यावी,या मागण्या मान्य न झाल्यास येणाऱ्या काळात महाराष्ट्र वीज कंत्राटी कामगार संघाच्या वतीने आमरण उपोषणाचा इशारा देण्यात आला आहे या निवेदनावर जिल्हाध्यक्ष सुनील उपळकर, जिल्हा सचिव सचितानंद भराटे, जिल्हा कोषाध्यक्ष मारुती गुंड यांच्या स्वाक्षऱ्या आहेत.