दैनिक जनमत

सोलापूर,  :- अण्णासाहेब पाटील आर्थिक मागास विकास महामंडळाच्या माध्यमातून विविध योजनांच्या अंतर्गत राज्यामध्ये जास्तीत -जास्त मराठा उद्योजक तयार होण्यासाठी बँक ऑफ इंडीयाबरोबर सामंजस्य करार करण्यात आला आहे.

            बैंक ऑफ इंडियाच्या पुणे येथील विभागीय कार्यालयात दिनांक 8 मे 2023 सामंजस्य करार करण्यात आला. यावेळी अण्णासाहेब पाटील आर्थिक मागास विकास महामंडळाचे अध्यक्ष नरेंद्र पाटील, विभागीय जनरल मॅनेजर राधाकांत बँक ऑफ इंडियाचे डेप्युटी जनरल मॅनेजर रवींद्र बोगा, डेप्युटी जनरल मॅनेजर लगणजीत दास, चीफ मॅनेजर समीर देशपांडे उपस्थित होते.

            बँकेच्या माध्यमातून व्यवसायासाठी कर्जावरचे व्याज अण्णासाहेब पाटील आर्थिक मागास विकास महामंडळाच्या माध्यमातून दिले जाते. पुणे, कोल्हापूर, सोलापूर, नाशिक, रत्नागिरी. नागपूर संपूर्ण विदर्भ या भागासाठी करार करण्यात आला असून, कराराची अंमलबजावणी सुरु करण्यात आली आहे. महामंडळाच्या लाभार्थ्यांना CGTMSE व CGFMU या दोन क्रिएट गॅरंटी देण्यात येणार आहेत. जे तरुण क्रेडिट गॅरंटी च्या माध्यमातून कर्ज मागणी करतील त्यांना याचा लाभ देण्यात येईल. जास्तीत जास्त तरुणांनी महामंडळाच्या योजनांचा लाभ घेऊन, राज्यात उद्योजक होतील या दृष्टीने शासन आणि महामंडळ प्रयत्नशील असल्याचे अण्णासाहेब पाटील आर्थिक मागास विकास महामंडळाचे अध्यक्ष नरेंद्र पाटील यांनी सांगितले.  सामजस्य कराराप्रमाणेच या अगोदर देखील मुंबई, मुंबई उपनगर, रायगड, ठाणे कोकण विभागासाठी या प्रकारचा करार करण्यात आला आहे. या पूर्वीच्या या कराराचा लाभ या विभागातील लाभार्थ्यांना झालेला आहे. मुख्यमंत्री एकनाथ  शिंदे , उपमुख्यमंत्री  देवेंद्र फडणवीस यांच्या मार्गर्शनाखाली राज्यात एक लाख मराठा उद्योजक होण्याच्या दृष्टीने या करारामुळे लाभ होणार असल्याची माहिती महामंडळाचे अध्यक्ष नरेंद्र पाटील यांनी दिली.

 सध्या दाक्षिणात्य चित्रपटांची भारतातच काय परदेशातही चलती आहे. चित्रपट चालतात म्हटल्यावर त्यातील अभिनेते, अभिनेत्री आवडत नसतील तर नवलच! आज अनेकजण या दाक्षिणात्य अभिनेत्रींना फॉलो करताना दिसत आहेत. त्यापैकीच एक अभिनेत्री आहे साई पल्लवी.

अभिनेत्री साई पल्लवी (Sai Pallavi) हिचा आज वाढदिवस. साई पल्लवीचा जन्म तामिळनाडूच्या, निलगिरी जिल्ह्यात कोटागिरी येथे झाला. सेंथमराई कन्नन आणि राधा असं तिच्या आई वडीलांचे नाव आहे. साई पल्लवीला एक लहान बहिणही आहे. तिने सुद्धा अभिनेत्री म्हणून काम केलं आहे. पल्लवी ही कोइम्बतूरमध्ये मोठी झाली आणि तिचं शालेय शिक्षणही तिथेच पूर्ण झालं. साई पल्लवीने जॉर्जिया येथून आपलं वैद्यकीय शिक्षण पूर्ण केलं आहे. तिच्या वाढदिवसानिमित्त खूप खूप शुभेच्छा

 राज्यस्तरीय वकिल परिषदेत न्यायमूर्ती भूषण गवई यांचे मत

 धाराशिव, दि. 5 –

न्यायव्यवस्थेवरील वाढता कामाचा ताण आणि न्यायासाठी लढा देणार्‍या पक्षकारांना वेळेत न्याय मिळणे गरजेचे आहे. त्यासाठी आधुनिक काळातील साधणे, तंत्रज्ञानाचा स्वीकार करून काम करणे गरजेचे आहे, असे मत सर्वोच्च न्यायालयातील न्यायमूर्ती भूषण गवई यांनी व्यक्त केले.

शहरातील छत्रपती शिवाजी महाराज नाट्यगृहात महाराष्ट्र आणि गोवा वकिल परिषदेच्यावतीने शुक्रवारी आयोजित करण्यात आलेल्या राज्यस्तरीय वकिल परिषदेच्या उद्घाटनप्रसंगी ते बोलत होते. अध्यक्षस्थानी  महाराष्ट्र व गोवा वकिल परिषदेचे अध्यक्ष अ‍ॅड. मिलिंद पाटील होते. यावेळी व्यासपीठावर मुंबई उच्च न्यायालयाचे न्यायमूर्ती एस. व्ही. गंगापूरवाला, न्यायमूर्ती नितीन सांबरे, पालक न्यायमूर्ती अरूण पेडनेकर, ई-कमिटीचे माजी उपाध्यक्ष तथा माजी न्यायमूर्ती आर. सी. चव्हाणा, भारताचे अतिरिक्त सॉलिसिटर अनिल सिंग, राज्याचे अ‍ॅडव्होकेट जनरल डॉ. बिरेंद्र सराफ, बार कौन्सिल ऑफ इंडियाचे चेअरमन मनन कुमार मिश्रा, माजी न्यायमूर्ती व्ही. के. जाधव, कर्नाटक उच्च न्यायालयाचे मुख्य न्यायमूर्ती प्रसन्न वराळे, राज्य ग्राहक आयोगाचे अध्यक्ष सुरेंद्र तावडे, प्रमुख जिल्हा व सत्र न्यायाधीश अंजू शेंडे यांची प्रमुख उपस्थिती होती.  

पुढे बोलताना न्यायमूर्ती गवई म्हणाले की, सर्व कायद्यांची भूमि असलेल्या भारतीय राज्यघटनेमुळे आपला देश एकसंघ आहे. राज्यघटनेच्या निर्मितीत महत्वाचे योगदान असलेले महामानव डॉ. बाबासाहेब आंबेडकर यांच्या आंबवडे गावाचा तालुका असलेल्या मंडणगड येथे अजूनही न्यायालय नाही. डॉ. आंबेडकर यांच्या वकिली व्यवसायाला 3 एप्रिलला शंभरी पूर्ण झाली. देशाचे अमृतमहोत्सवी वर्ष साजरे होत आहे. याचेच औचित्य साधून न्यायव्यवस्थेत सकारात्मक आणि आधुनिकता आणली जात आहे. राज्यातील कोल्हापूर येथे खंडपीठाची निर्मिती आणि डॉ. आंबेडकर यांच्या गावाचा तालुका असलेल्या मंडणगड येथे न्यायालय सुरू होण्यासाठी कार्यवाही सुरू आहे, असे नमुद केले.

कार्यक्रमाचे प्रास्ताविक अ‍ॅड. मिलींद पाटील यांनी केले. यावेळी त्यांनी धाराशिवच्या 60 वर्षांच्या इतिहासात पहिल्यांदाच सर्वोच्च न्यायालय व उच्च न्यायालयांच्या न्यायमूर्तींच्या उपस्थितीत वकिल परिषद घेण्याचा मान बार कौन्सिलला मिळाला असल्याचे समाधान व्यक्त केले. यावेळी अ‍ॅड. जयंत जायभावे, भारताचे अतिरिक्त सॉलिसिटर अनिल सिंग यांनीही आपले मनोगत व्यक्त केले. कार्यक्रमात राज्यातील 14 ज्येष्ठ विधीज्ञांचा मान्यवरांच्या हस्ते सत्कार करण्यात आला. तसेच महाराष्ट्र व गोवा वकिल परिषदेच्यावतीने 384 विधीज्ञ मंडळांतील वकिलांना ई-फायलिंगची अडचण दूर करण्यासाठी देण्यात येणार्‍या संगणक संचाचे मान्यवरांच्या हस्ते प्रातिनिधीक स्वरूपात वाटप करण्यात आले. दरम्यान मान्यवरांच्या हस्ते परिषदेच्या स्मरणिकेचे प्रकाशन करण्यात आले. कार्यक्रमास राज्यातील जवळपास दोन हजार वकिल बांधव उपस्थित होते.

शेवटच्या घटकापर्यंत न्याय पोहचावा

न्याय सर्वांसाठी या तत्वाला साजेसे काम न्यायव्यवस्थेतील सर्व घटकाकडून अपेक्षित आहे. न्यायालयात असंख्य प्रकरणे प्रलंबित आहेत. त्याला आधुनिकतेची जोड म्हणून ई-फायलिंगचा पर्याय अंमलात आला आहे. त्यामुळे याचा फायदा न्यायापासून वंचित असलेल्या समाजातील शेवटच्या घटकाला होणे गरजेचे आहे, असे मत मुंबई उच्च न्यायालयाचे न्यायमूर्ती एस. व्ही. गंगापूरवाला यांनी व्यक्त केले.

तंत्रज्ञानाचा नकारात्मक वापर निरर्थक

समाजात तंत्रज्ञानाचा चांगल्या आणि चुकीच्या गोष्टींसाठी वापर होत आहे. दुर्दैवाने चुकीच्या गोष्टीसाठी याचा अधिक वापर होत आहे. परिणामी मानवी बुध्दीमता कृत्रिम तंत्रज्ञानाच्या वापराने अधिक कमकुवत होत आहे. नवीन तंत्रज्ञानाचा वाईट वापर होत असल्यामुळे गूगलचे सहसंचालक डॉ. हिन्टेन यांंना राजीनामा द्यावा लागला. तर सकारात्मक बाबतीत स्वातंत्र्य संग्रामाचा लढा अधिक विस्ताराने मांडण्यासाठी तंत्रज्ञानाची मदत घेतली असती तर ती अधिक विस्ताराने आणि नवीन माहितीच्या आधारे मांडता आली असती. परंतु आजही स्वातंत्र्य संग्रामाच्या लढ्याबाबत लिहिलेल्या पुस्तकांच्या प्रत्येक आवृत्तीत तोच मर्यादीत मजकूर आढळतो आहे. त्यामुळे चांगल्या गोष्टीसाठी, बुध्दीमत्तेच्या विकासासाठी तंत्रज्ञानाचा वापर व्हावा, असे आवाहन कर्नाटक उच्च न्यायालयाचे मुख्य न्यायमूर्ती प्रसन्ना वराळे यांनी केले.

वडापाव अनेकांसाठी भूक भागवण्यासाठीचा पदार्थ तर आहेच सोबत तो अनेकांना रोजगार देखील देत असतो. महाराष्ट्रामध्ये एकही असे शहर सापडणार नाही जिथे वडापाव मिळत नाही. वडापाव विकून अनेकजण श्रीमंत देखील झाले आहेत. तरुण तरुणी असतील किंवा अबालवृद्ध अनेकांना हा पदार्थ आवडतोच. वडापाव हा काही प्राचीन काळापासून महाराष्ट्रात आहे असं नाही त्याचा शोध महाराष्ट्रातील आहे. महाराष्ट्राची निर्मिती झाल्यानंतर या पदार्थाचा शोध लागला आहे मात्र या वडापावचा शोध नेमका कोणी लावला हे अनेकांना माहिती नाही. दादरच्या अशोक वैद्य यांना 1966 मध्ये दादर रेल्वे स्थानकाबाहेर पहिला वडा पाव स्टॉल सुरू करण्याचे श्रेय दिले जाते.मुंबईच्या पूर्वीच्या मिल-हार्टलँडमध्ये झाला होता. दादरच्या अशोक वैद्य यांना 1966 मध्ये दादर रेल्वे स्थानकाबाहेर पहिला वडा पाव स्टॉल सुरू करण्याचे श्रेय दिले जाते. कामगारांना भूक भागविण्यासाठी तात्काळ उपलब्ध होणारा हा पदार्थ पुढे महाराष्ट्राची, मुंबईची ओळख झाला.

सलगरा,दि.५ (प्रतिक भोसले) 

घटनात्मक ५०% च्या आतील ओबीसीमधूनच‎ मराठा समाजाला आरक्षण मिळण्याच्या‎ मागणीसाठी सकल मराठा समाजाच्या वतीने‎ तुळजापूर ते मुंबई मंत्रालयापर्यंत ‘मराठा वनवास‎ यात्रा’ काढण्यात येणार आहे. या वनवास यात्रेस सलगरा (दि.) ग्रामपंचायतच्या पाठोपाठ आता गंधोरा, किलज आणि कनगरा ग्रामपंचायतने पण जाहीर पाठिंबा दिला आहे. या मध्ये श्री तुळजाभवानी भोपे पुजारी मंडळाने पण जाहीर पाठिंबा देऊन श्रीक्षेत्र तुळजापूरातील सर्व जातीधर्मातील मित्रपरिवार तसेच देविचे मुख्य भोपे पुजारी सदस्य हे मराठा जातीला आरक्षण मिळविण्यासाठी आयोजकास सर्वतोपरी सहकार्य करतील असे म्हणाले. 

सकल मराठा समाजाच्या वतीने येत्या ६ मे २०२३ रोजी तुळजापूर येथून ‘मराठा वनवास यात्रा’ निघणार आहे. मराठा समाजाला ५०% च्या आत ओबीसी मधूनच आरक्षण मिळाले पाहिजे यासाठी या वनवास यात्रेचे नियोजन केले गेले आहे. ही यात्रा तुळजापूर ते मुंबई मंत्रालय अशी पायी चालत जाणार आहे. ६ जून २०२३ रोजी सर्व मराठा बांधव मुंबई मध्ये पोचतील असे नियोजन ठरले आहे. आणि त्यात हजारो बांधव सहभागी होणार आहेत अशी माहिती आयोजकांकडून देण्यात आली आहे.

या मराठा वनवास यात्रेला आणि मराठा समाजाच्या आरक्षण मागणीला गंधोरा, किलज आणि कनगरा या ग्रामपंचायतींनी एकमताने मंजूर केले आहे. आमच्या ग्रामपंचायतीच्या वतीने व तसेच गावातील सर्व जातीपातीच्या नागरिकांच्या वतीने मराठा समाजाच्या प्रश्नांसाठी सर्व ते सहकार्य यापुढेही करण्यात येईल. असे  गंधोरा, किलज आणि कनगरा ग्रामपंचायतने काढलेल्या पत्रात म्हटले आहे. 

ग्रामपंचयतींच्या पाठिंब्या नंतर पाठोपाठ श्री तुळजाभवानी भोपे पुजारी मंडळाने पण जाहीर पाठिंबा दिला आहे. मंडळाने असे म्हंटले आहे की, मराठा समाजास ५०% मधील ओबीसी मधून आरक्षण मिळविण्याकरीता वनवास यात्रेचे सकल मराठा समाजातर्फे आयोजन करण्यात आलेले आहे. श्रीक्षेत्र तुळजापूर ते मुंबई ही यात्रा संपुर्ण महिनाभर मराठा समाजात जनजागृती करत निघणार आहे. या यात्रेची सुरूवात महाराष्ट्राची कुलस्वामिनी आई तुळजाभवानी मातेची पुजाअर्चा करून सर्व भोपे पुजारी हे आयोजकांना शुभार्शिवाद देऊन यात्रेची सुरूवात करणार आहेत. तरी सर्व भोपे पुजारी यांनी सकाळी ०९ वा.सु. श्री तुळजा भवानी मंदिरात वेळेवरती उपस्थित राहावे हि विनंती. श्रीक्षेत्र तुळजापूरातील सर्व जातीधर्मातील मित्रपरिवार तसेच देविचे मुख्य भोपे पुजारी सदस्य हे मराठा जातीला आरक्षण मिळविण्यासाठी आयोजकास सर्वतोपरी सहकार्य करतील.

राजर्षी छत्रपती शाहू महाराज यांच्या पुण्यतिथीदिनी म्हणजेच दि.६ मे रोजी तुळजापूर येथून वनवास यात्रेस सुरुवात होईल. ही यात्रा गावागावात मराठा आरक्षणाबाबत जनजागृती करीत दि.६ जून रोजी शिवराज्याभिषेक सोहळादिनी जवळपास ५०० किलोमीटर पायी चालत जात मुंबई मध्ये पोहोचणार आहे. ५०% च्या आतले ओबीसी आरक्षण घेतल्याशिवाय आम्ही मुंबई सोडणार नाही, यंदाचा छत्रपती शिवराज्याभिषेक सोहळा आपले मराठा बांधव आझाद मैदानावरच साजरा करतील. त्या नंतर मुंबई येथे आझाद मैदानावर आंदोलन केले जाणार आहे. जोपर्यंत आरक्षण मिळत नाही तोपर्यंत‎ हे आंदोलन सुरूच राहणार आहे. जोपर्यंत मराठा समाजाचा समावेश ओबीसी आरक्षणात होत नाही, अधिकृत ‘जी आर’ निघत नाही, तोपर्यंत मुंबईतच ठाण मांडून बसणार, कोणत्याही परिस्थितीत माघार घेतली जाणार नाही. आता पर्यंत लेखी आश्वासने फार झाली, आता प्रत्यक्ष‎ आरक्षण दिल्याशिवाय माघार नाही. असे पदाधिकारी एका आयोजित पत्रकार परिषदेत म्हणाले.

येत्या ६ तारखेला मराठा वनवास यात्रा तुळजापूर येथून निघणार आहे. चळवळीतील शाहीर राजेंद्र कांबळे यांच्या पहाडी आवाजात जंगी पोवाड्यांचा कार्यक्रम सकाळी ०९ वा.सु. श्री तुळजाभवानी मातेच्या मंदिरासमोर होईल. अनेक गावांतील भजनी मंडळे, हलगी पथक, संभळ वादक, वासुदेव, ढोल पथक देखील सर्व आम्हाला सोडण्यासाठी येणार आहेत. वनवासाला निघालेल्या लोकांना पाठवण्याची ती सुद्धा एक पद्धत आहे. ज्या प्रमाणे प्रभू श्री राम वनवासाला निघाल्या नंतर त्यांना सोडण्यासाठी हजारोंच्या संख्येने अयोध्या वासिय उपस्थित होते. अगदी त्याच प्रमाणे वनवासाला निघालेल्या मराठा समाजातील बांधवांना, तरुणांना सोडण्यासाठी हजारोंच्या संख्येने समाज उपस्थित राहील. वाटेत देखील प्रत्येक गावातील ग्रामस्थ आमच्या राहण्याची – जेवणाची सोय करत आहेत. अशा प्रकारे जागोजागी जनजागृती करत ही वनवास यात्रा मुंबईत पोचेल.

रुग्णालयात उपचारासाठी गेलेल्या रुग्णांना जात विचारण्याचे प्रकार महाराष्ट्रात घडत असून त्यावर राज्याचे विरोधी पक्षनेते अजित पवार (Ajit Pawar) यांनी असे प्रकार थांबवण्याची मागणी सरकारकडे केली आहे.

शासकीय किंवा खाजगी रुग्णालयात उपचारासाठी येणाऱ्या कोणत्याही रुग्णाला त्याची जात विचारली जाऊ नये.मनमाड उपजिल्हा रुग्णालयासह राज्यात अन्यत्र कुठेही असे प्रकार सुरु असतील तर ते तत्काळ थांबवावेत, ताबडतोब निर्देश द्यावेत अशी मागणी अजित पवार यांनी केली आहे.

नाशिक जिल्ह्यातील मनमाड उपजिल्हा रुग्णालयात उपचारासाठी येणाऱ्या रुग्णांना त्यांची जात विचारण्याचा प्रकार जातीभेदाला खतपाणी घालणारा, घटनाविरोधी, मानवताविरोधी, राज्य शासनाची असंवेदनशीलता, आजारी मानसिकता दाखवणारा आहे. पिंपरी-चिंचवड महानगरपालिकेच्या रुग्णालयातही रुग्णांना जात विचारण्याचा प्रकार यापूर्वी घडला होता. शेतकऱ्यांना खतखरेदी करण्यासाठीही जात सांगणं अलिकडे बंधनकारक केलं होतं. त्यावेळीही भविष्यात असे प्रकार थांबवण्याचा आम्ही सरकारला इशारा दिला होता. त्यानंतर सुद्धा हा प्रकार घडला आहे. असं अजित पवार यांनी आपल्या फेसबुक पोस्ट वर म्हटले आहे.

#Ajit_pawar #Ajitpawarplatestnews

#NCP