दैनिक जनमत

  उजनी उस्मानाबाद समांतर पाणी योजनेचा मार्ग मोकळा 

उस्मानाबाद – 

उस्मानाबाद शहराला 2013 पासुन उजनी धरनातुन पिण्यासाठी पाणी आणले जाते. उजनी योजने अंतर्गत आनलेले पाणी शहराला पुरेशा प्रमाणात पुरत नव्हते शहराला या पुर्वी तेरणा व रुईभर धरनातुन पिण्यासाठी पाणी आनले जायचे पुरंतू आपल्या जिल्हयात कायम पडत असलेला दुष्काळ पाहता सदर दोन्ही धरणातुन पाणी मिळत नव्हते. 2016 साली अटल अमृत योजने  अंतर्गत उजनी धरणावरून दुप्पट क्षमतेने पाणी आणुण 8 एम एल डी ची पुर्वीची योजना दुप्पट क्षमतेने मंजुर करून 16 एम एल डी प्रमाने पाणी आणणे साठी उजनी योजनचे (upgradation) करून सदर योजना पुर्ण करुन  घेतली.  परंतु अटल अमृत योजना मंजुर करत असताना तत्कालीन सरकार ने शहरासाठी 2021 ची लोकसंख्या गृहीत धरुन एकुण 26 एम एल डी पाण्याचे नियोजन केले होते.  त्यामध्ये उजनी धराणातुन 16 एम एल डी तेरण धरणातुन 5 एम एल डी व रूईभर धरणातुन 5 एम एल डी असे  एकुण 26 एम एल डी पाणी 2021  पर्यंत शहराला  मिळणेसाठी सदर अटल अमृत योजना शहराला मिळाली.  परंतु तेरणा धरण व रूईभर धरणामध्ये दुष्काळामुळे पाणी नसल्याने शहराला पुर्ण क्षमतेने पाणी मिळत नव्हते म्हणजेच शहराच्या 2021  च्या लोकसंख्येप्रमाणे 10 एम एल डी पाणी कमी मिळत होते. व उजनी धरणावरुन जास्तीचे पाणी आनण्यासाठी उजनी धरणावरील पुर्वीचे असलेले 6.5 द.ल.घ.मी. पाणी आरक्षणामुळे मर्यादा येत होती.  हि बाब आमच्या लक्षात आल्या नंतर शिवसेना पक्षप्रमुख  मा.उध्दवजी ठाकरे साहेब मुख्यमंत्री झाल्या नंतर औरंगाबाद येथे मराठवाडयाच्या विविध प्रश्नावर आढावा बैठक घेण्यात आली होती त्यावेळी खासदार ओमप्रकाश राजेनिंबाळकर, आमदार कैलास पाटील व तत्कालीन नगराध्यक्ष मकरंद राजेनिंबाळकर यांनी   उध्दवजी ठाकरे  यांना उजनी धरणा वरून आरक्षणात वाढवून देणे याबाबत मागणी केली त्याप्रमाणे लागलीच  मुख्यमंत्री उध्दव ठाकरे  यांनी संबंधितांना आदेश देऊन उस्मानाबादकरांची पिण्याच्या पाण्याची अडचण कायम स्वरूपी दूर करण्यासाठी पुढील 30 वर्ष पुरेल एवढे पाणी उजनी धरणातून घेण्यासाठी पाणी आरक्षणात वाढ करण्याच्या सूचना दिल्या. 

 त्यानंतर नगरपरिषदेने 29 डिसेंबर 2020 रोजीच्या सर्वसाधारण सभेमध्ये उजनी धरानातुन वाढीव पाणी आरक्षणाचा ठराव घेतला होता त्यानुसार कृष्णा-खोरे महामंडळ यांच्याकडे रीतसर प्रस्ताव सादर करून त्याअनुषंगाने खासदार ओमप्रकाश राजेनिंबाळकर, आमदार कैलास पाटील व तत्कालीन नगराध्यक्ष मकरंद राजेनिंबाळकर यांनी पाठपुरावा केल्याने अखेर उस्मानाबाद शहराला 2052 सालापर्यंत पुरेल एवढे पाणी आरक्षण पूर्वीचे 6.622 द.ल.घ.मी. व  नवीन 15.558 द.ल.घ.मी. एकूण 20.390 द.ल.घ.मी. पाणी आरक्षण मंजूर झाले आहे.  सदर आरक्षणाच्या अनुषंगाने उजनी धरणावरून  अतीरिक्त पाणी आणण्यासाठी धरणावरून समांतर पाणीपुरवठा योजना करण्यासाठी 300 कोटींचा डी पी आर देखील नगर परिषदेने तयार करून ठेवला आहे. सदर आरक्षण मिळाल्याने सदर डी पी आर ला तांत्रिक मान्यता घेऊन अटल अमृत योजना टप्पा-2  किंवा इतर कोणत्याही शासकीय योजनेतून प्रशासकीय मान्यता घेता येईल व तात्काळ काम सुरु करुन 2052 सालापर्यंत उस्मानाबाद शहराला लागणारे पाणी आणण्यासाठी चा मार्ग मोकळा झाला आहे.

खबरदारी घेण्याचे पोलिसांचे आवाहन

उस्मानाबाद – शहरातील जुना उपळा रोड, शिवसृष्टी नगर भागात रात्री चोरट्यांनी चोरी करण्याचा प्रयत्न केला मात्र नागरिकांनी तत्परता दाखवत पोलिसांना फोन केला शेजारच्या नागरिकांना जागे केले त्यामुळे चोरटे तेथून पसार झाले. यापूर्वी देखील याच परिसरात गेल्या महिन्यात चोरीच्या घटना घडल्या होत्या तेव्हा देखील नागरिकांमध्ये भीतीचे वातावरण पसरले होते. नागरिकांनी पुढाकार घेत दरवाज्याना लोखंडी गेट, घरासमोर सीसीटीव्ही कॅमेरे बसवून घेतले होते. पोलिसांनी देखील गस्त मोठ्या प्रमाणात वाढवली होती. आता देखील ग्रामसुरक्षा दल गस्त घालत असून  पोलीस योग्य खबरदारी घेत असल्याची प्रतिक्रिया आनंद नगरचे पोलीस निरीक्षक तानाजी दराडे यांनी दिली.

उस्मानाबाद – शेतीचा फेरफार मंजूर करुन घेण्यासाठी ३० हजारांची लाचेची मागणी करून त्यापैकी २५ हजार घेताना लोहारा तालुक्यातील अचलेर येथील लाचखोर तलाठ्यासह कोतवाल एसीबीच्या जाळ्यात अडकले आहेत. सोमवार दि. २३ मे रोजी एसबीच्या पथकाने ही कारवाई केली आहे. त्यामुळे महसूल विभागात खळबळ उडाली आहे.

याबाबत पोलिसांनी दिलेली माहिती अशी की, तक्रारदार यांचे वडिलांनी सन २००५ मध्ये घेतलेल्या शेतीचा फेर फार वरिष्ठकडून मंजूर करून देण्यासाठी यापूर्वी १० हजार रुपये लाच रक्कम स्विकारल्याचे मान्य करून तसेच आज रोजी सदर कामासाठीच वरिष्ठकडून फेर फार मंजूर करून देण्यासाठी आणि ऑनलाईन नमुना नंबर ९ ची नोटीस काढण्यासाठी तक्रारदारास अचलेर येथील आरोपी लोकसेवक तलाठी युवराज नामदेव पवार(३६) व कोतवाल प्रभाकर रुपनर (३७) यांनी सोमवारी ३० हजार रुपये लाचेची मागणी करुन त्यापैकी २५ हजार रुपये पंचासमक्ष स्वीकारली. हॅश व्हॅल्यू घेण्यात आली आहे.

सदरील सापळा लाचलुचपत प्रतिबंध विभागाचे पोलिस निरीक्षक अशोक हुलगे यांच्या मार्गदर्शनाखाली पोलिस अधीक्षक डॉ. राहुल खाडे, अपर पोलिस अधीक्षक विशाल खांबे, पोअ/ इफ्तेकर शेख, सिध्देश्वर तावसकर, विष्णु बेळे, अविनाश आचार्य, चालक दत्तात्रय करडे यांनी केली. या कारवाईमुळे महसूल विभागात खळबळ उडाली आहे.

विद्यार्थ्यांच्या जिवितला धोका असल्याने केली चौकशीची मागणी

उस्मानाबाद – श्री श्री रविशंकर विद्यालयाचे बांधकाम अनधिकृत असल्याची तक्रार माजी नगरसेवक चंद्रकांत काकडे यांनी जिल्हाधिकऱ्यांकडे केली असून चौकशीची मागणी केली आहे.

जिल्हाधिकाऱ्यांना देण्यात आलेल्या निवेदनात त्यांनी म्हटले आहे की, उस्मानाबाद नगर परिषद हद्दीतील सर्व्हे नंबर 679 मध्ये श्री श्री रविशंकर विद्यालयाची अंदाजे 25 खोल्याचे दोन मजली बांधकाम अनाधिकृत विनापरवाना करण्यात आलेले आहे. सदरील इमारतीचे ले आऊट, बांधकाम परवाना नगर परिषदेकडून घेण्यात आलेला नाही व कोणत्याही प्रकारची परवानगी नसताना सदरील दोन मजली अनाधिकृत इमारत उस्मानाबाद शहरात बांधण्यात आलेली आहे. सदरील इमारतीमध्ये शेकडो विद्यार्थी शिक्षण घेत असून अनाधिकृत इमारतीमुळे त्यांच्या जिवीतास धोका निर्माण झालेला आहे.

सदरील इमारत ही श्री. श्री. रविशंकर विद्यालय या संस्थेची असून संस्थेचे विश्वस्त हे श्री. नितीन भोसले आहेत. संस्थेचे विश्वस्त हे जिल्हा परिषद उस्मानाबाद येथे कार्यकारी अभियंता (बा.) येथे कार्यरत असून सरकारी नौकरीत असताना सदरील संस्था चालवित आहेत. तथापी सदरील इमारत ही स्वतः सरकारी नौकरी असताना शासनाच्या नियमाप्रमाणे अधिकृतपणे बांधकाम करून उभारण्यात आलेली नाही, संस्थेचे विश्वस्त सरकारी अधिकारी असल्यामुळे संस्थेवर कोणीच आरोप करू शकत नाही असा आरोप देखील तक्रारीत करण्यात आला आहे.

याबाबत संस्थेचे विश्वस्त नितीन भोसले यांच्याशी भ्रमणध्वनिवरून संपर्क साधण्याचा प्रयत्न केला मात्र त्यांनी फोन न उचलल्याने त्यांची प्रतिक्रिया समजू शकली नाही

उकाड्यामुळे लहान थोरांचे अतोनात हाल

 पारा( राहुल शेळके ): दरवर्षी महावितरणकडून मान्सूनपूर्व कामे करण्यात येतात. मान्सून पूर्वी विद्युत यंत्रणेची देखभाल व दुरुस्तीची कामे केली जातात. परंतु यावर्षी वाशी तालुक्यातील पारा येथील 33के व्ही सबस्टेशन अंतर्गत येणाऱ्या सर्व गावातील मान्सूनपूर्व कामे महावितरणने न केल्यामुळे येणाऱ्या पावसाळ्यात सर्व वीज ग्राहकांना वारंवार लाईट जाण्याच्या समस्येला तोंड द्यावे लागणार हे मात्र निश्चित.

        मान्सूनपूर्व कामांमध्ये उंच वाढत असलेल्या झाडांच्या फांद्या विद्युत यंत्रणेला स्पर्श करीत असेल तर त्या फांद्या तोडणे, फुटलेले पिन आणि इंसुलेटर बदलणे, तपासणी व दुरुस्ती करणे, रोहित्रांचे ऑईल तपासणे, ऑईल गळती थांबवणे, वाहिनींचे खराब झालेले जम्पर बदलणे, जीर्ण झालेले वायर बदलणे, जळलेले तुटलेले वायर बदलणे, उपकेंद्रातील सर्व यांत्रिक बाबीची व यंत्रणेची तपासणी करणे व त्याची दुरुस्ती करणे, तसेच प्रत्यक्ष वेळेवर आढळणाऱ्या त्रुटी दूर करणे यासारखे कामे मान्सूनपूर्व कामांमध्ये येत असतात. मात्र ही कामे महावितरण यंत्रणेने न केल्यामुळे दि.20मे रोजी सायंकाळी सात वाजता गेलेली पारा येथील लाईट दुसऱ्या दिवशी दुपारी तीन वाजता आली.फक्त इंसुलेटर फुटल्यामुळे तब्बल 20 तास लाईट गेल्यामुळे सर्वांनाच अंधाराचा तसेच उकाड्याचा त्रास सहन करावा लागला. महावितरणने लवकरात लवकर पारा 33केव्ही अंतर्गत येणाऱ्या सर्व गावांतील झुकलेले पोल, लोम्बकळणाऱ्या तारा सह मान्सूनपूर्व कामे करावीत म्हणजे पावसाळ्यात येणाऱ्या वारंवार लाईट जाण्याच्या समस्येला तोंड द्यावे लागणार नाही अशी मागणी सर्व स्तरातून होत आहे.

उस्मानाबाद – स्वाधार योजेनेची अट शिथिल करा या मागणीचे निवेदन विद्यार्थी संघटनेच्या वतीने देण्यात आले आहे. निवेदनात म्हटले आहे की, राज्य सरकार तर्फे राबवली जाणारी स्वाधार योजना ही फक्त शहरी भागातील महाविद्यालयास लागू करण्यात आली आहे. परंतु अशी अनेक महाविद्यालये आहेत जी शहराजवळ आहेत परंतु शहरी भागात मोडत नाहीत. वास्तविक तिथे शिक्षण घेणाऱ्या विद्यार्थ्यांची खर्च शहरी भागातील महाविद्यालयासारखाच होतो. या बाबींचा विचार करून सर्वांना लाभ मिळावा व गरजू विद्यार्थी वंचित राहू नये यासाठी अट शिथिल करण्यात यावी अशी विद्यार्थ्यांची मागणी आहे.