धाराशिव, दि. ८ जून २०२५ : धाराशिव जिल्ह्यातील घरफोडी आणि चोरीच्या गुन्ह्यांना आळा घालण्यात स्थानिक गुन्हे शाखेने मोठे यश मिळवले आहे. कुख्यात आरोपी कृष्णा ऊर्फ पिंटू खडेल शिंदे (रा. मुरुड) याला अटक करून त्याच्याकडून साडेआठ तोळे (८४ ग्रॅम) सोन्याचे दागिने आणि गुन्ह्यात वापरलेली मोटरसायकल असा एकूण ३ लाख ८७ हजार रुपयांचा मुद्देमाल जप्त करण्यात आला आहे. या कारवाईत जिल्ह्यातील १५ घरफोडीचे गुन्हे उघडकीस आले आहेत.
पोलीस अधीक्षक रितु खोखर आणि अपर पोलीस अधीक्षक शफकत आमना यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद इज्जपवार यांच्या नेतृत्वाखालील पथकाने ही कारवाई केली. पथकात सहायक पोलीस निरीक्षक अमोल मोरे, सहायक पोलीस निरीक्षक सचिन खटके, सहायक पोलीस निरीक्षक सुधीर कराळे (अंगुलीमुद्रा शाखा), पोलीस हवालदार विनोद जानराव, पोलीस हवालदार प्रदीप वाघमारे, पोलीस हवालदार नितीन जाधव, पोलीस हवालदार मनोज जगताप (अंगुलीमुद्रा शाखा), पोलीस नाईक बबन जाधव, पोलीस नाईक योगेश कोळी, चालक पोलीस हवालदार महेबुब अरब, चालक पोलीस हवालदार प्रकाश बोईनवाड आणि चालक पोलीस हवालदार विनायक दहीहंडे यांचा समावेश होता.
पेट्रोलिंगदरम्यान गुप्त बातमीदाराकडून माहिती मिळाल्यानंतर वाठवडा शिवारातील एका हॉटेलजवळ आरोपीला ताब्यात घेण्यात आले. आरोपीने पळण्याचा प्रयत्न केला, परंतु पोलिसांनी शिताफीने त्याला पकडले. चौकशीत आरोपीने त्याच्या दोन साथीदारांसह धाराशिव शहर, ढोकी, वाशी, परंडा, लोहारा, आनंदनगर आणि धाराशिव ग्रामीण पोलीस ठाण्याच्या हद्दीत मागील एका वर्षात अनेक घरफोड्या केल्याची कबुली दिली. चोरलेले सोन्याचे दागिने आणि पैसे याची वाटणी करून त्याने स्वतःच्या वाट्याचे दागिने मुरुड येथील घरी ठेवल्याचे सांगितले, ज्याचा उपयोग प्लॉट खरेदी आणि घर बांधण्यासाठी करणार होता. पोलिसांनी त्याच्या घरातून साडेआठ तोळे सोन्याचे दागिने जप्त केले.
जप्त मुद्देमाल आणि आरोपीला पुढील कारवाईसाठी आनंदनगर पोलीस ठाण्यात हस्तांतरित करण्यात आले आहे. या यशस्वी कारवाईमुळे जिल्ह्यातील घरफोडीच्या गुन्ह्यांना आळा बसण्यास मदत होईल, असा विश्वास पोलीस प्रशासनाने व्यक्त केला आहे.
- धाराशिव : कुख्यात घरफोड्या आरोपीस स्थानिक गुन्हे शाखेने ठोकल्या बेड्या; १५ गुन्हे उघड, ३.८७ लाखांचा मुद्देमाल जप्त
- तामलवाडी एम.आय.डी.सी.,३० लाख एकरीच्या अमिषाला शेतकरी बधले नाहीत नाही, जमीन न देण्याच्या निर्णयावर ठाम
- आरडीसींच्या दालनाचे बांधकाम अवैध, अनधिकृत वातानुकूलित यंत्रणा बसवल्याची तक्रार
- धाराशिव-सोलापूर रेल्वे प्रकल्पासाठी अवैध मुरुम उत्खनन; लहू खंडागळे यांची पुराव्यानिशी जिल्हाधिकाऱ्यांकडे तक्रार
- मित्रा उपाध्यक्षांना ‘राज्यमंत्री दर्जा ‘ खोडसाळपणा की राजकारण