दैनिक जनमत

उस्मानाबाद/ प्रतिनिधी
तालुक्यातील बेंबळी ग्रामपंचायतीमध्ये १४ व्या वित्त आयोग व दलित वस्ती सुधार  निधीमध्ये झालेल्या एक कोटी ३८ लाख रुपयांच्या अनियमिततेप्रकरणी ग्रामविकास अधिकाऱ्यावर कारवाई करण्याचे आदेश अपर विभागिय आयुक्त क्र. २ यांच्या न्यायालयाने पारित केले आहेत. तसेच तत्कालिन सरपंचांवर सुनावणी घेऊन कारवाई करण्याबाबतही बजावण्यात आले आहे.   यासंदर्भात पंचायत समितीस्तरावरून कारवाईला टाळाटाळ होत असल्यामुळे विभागिय आयुक्तांकडे तक्रार करण्यात आली होती.
बेंबळी येथील शिवसैनिक शामसुंदर पाटील यांनी जिल्हाधिकाऱ्यांकडे तक्रार केली होती. यामध्ये बेंबळी ग्रामपंचायतीला प्राप्त १४ व्या वित्त आयोग व दलित वस्ती सुधार योजनेच्या  निधीमध्ये अपहार व अनियमितता झाल्याचा आरोप करण्यात आला होता. याप्रकरणी पंचायत समितीचे विस्तार अधिकारी बी. एच. देशमुख यांनी चौकशी करून गटविकास अधिकाऱ्यांना अहवाल सादर केला. या अहवालात नमुद केल्यानुसार ग्रामपंचायतने  वित्त आयोग व दलित वस्तीच्या निधीतून विविध विकास कामांसाठी एक कोटी २४ लाख १० हजार ४९१ रुपये खर्च झाल्याचे दाखवण्यात आले आहे. यामध्ये पाणीपुरवठा कामासाठी १२ लाख खर्च केला असून यामध्ये बेकायदेशिर फोड करण्यात आली आहे. तसेच याचे ई टेंडर न केल्यामुळे अनियमितता झाली आहे. रस्ते बांधकाम कामात ५४ लाख ७७ हजार ८२० खर्च दाखवण्यात आला आहे. परंतु, यामध्ये केवळ १७ लाखांचे अंदाज पत्रक तपासणीसाठी सादर करण्यात आले आहे. शाळा दुरूस्तीसाठी आठ लाख ८७ हजार खर्च करण्यात आले आहेत. याचाही तपशिल सादर करण्यात आलेला नाही. पाणीपुरवठा पंप खरेदी,आरोग्य विद्युतीकरण आरओ प्लांट, पाणी पंप दुरूस्ती, अंगणवाडी लाईट फिटींग, खेळणी, टीव्ही खरेदी, फर्निचर खरेदीचे कागदपत्र तपासणीसाठी देण्यात आलेले नाहीत. विद्युतीकरणाच्या कामावर १२ लाख, रस्ता दुरूस्तीसाठी सहा लाख, स्टोन क्रशरसाठी सहा लाखांची बिले दिले आहेत. परंतु, यामध्ये कसलीही नियमानुसार कारवाई न केल्याचा ठपका अहवालात ठेवण्यात आला आहे.
दलित वस्ती सुधार योजनेतून १४ लाख पाच हजार ७८५ रुपये खर्च दाखवण्यात आला आहे. यामध्ये सात लाख ७६ हजार खर्च कसा वर्ग केला, याचा बोध होत नसल्याचे अहवालात नमुद करण्यात आले आहे. फोड करून नियमबाह्य कामे करणे, कागदपत्र सादर न करण्याबाबत ठपका अहवालात ठेवण्यात आला आहे.
यासंदर्भात शिवसैनक शामसुंदर पाटील यांनी विभागिय अायुक्तांकडे तक्रार दाखल केली होती. त्यानुसार अपर विभागिय आयुक्त क्र. २ च्या न्यायालयाने तत्कालिन सरपंचांची सुनावणी घेऊन तसेच ग्रामविकास अधिकाऱ्यांवर नियमानुसार थेट कारवाई करण्याचे आदेश दिले आहेत. यासंदर्भात मुख्य कार्यकारी अधिकारी काय निर्णय घेणार याकडे सर्वांचे लक्ष लागले आहे.

जत:प्रतिनिधी:जत तालुक्यातील रेवनाळ ग्रामपंचायतीचे लोकनियुक्त  सरपंच धनाजी पाटील यांच्यावर अविश्वास ठराव दाखल करण्यात आला.शुक्रवार दि.१ रोजी मतदान प्रक्रिया पार पडली.यामध्ये १६ मतांची आघाडी घेत सरपंच पाटील यांनी अविश्वास ठराव जिंकला. विजयानंतर जत तालुका काँग्रेस कमिटीच्या वतीने आमदार विक्रमदादा सावंत व पदाधिकाऱ्यांनी सरपंच पाटील यांचा सत्कार करण्यात आला.

      याबाबत अधिक माहिती अशी की,रेवनाळ ग्रामपंचायतची निवडणूक २०१७मध्ये झाली.त्यावेळी धनाजी पाटील यांचा   लोकनियुक्त सरपंच म्हणून विजय झाला होता.   त्यांच्या गटाचे ४ सदस्य निवडून आले. गावाचा कारभार चांगला चालला होता.मात्र गावातील भाजपा व राष्ट्रवादी नेत्यांनी  सरपंचाच्या गटातील सदस्यांना आपल्याकडे वळविण्यात यश मिळवले.त्यामुळे अविश्वास ठराव डिसेंबर 2020 मध्ये पारित केला.हा  ठराव जिल्हा अधिकारी यांच्या कडे पाठवण्यात आला. जिल्हाधिकारी यांनी परत लोकनियुक्त सरपंचाच्या पदाविषयीचा निर्णय गावातील जनतेने मतदान प्रक्रिया  घेऊन करावा असे आदेश दिले. त्याप्रमाणे दि.१ जानेवारी २०२१ ला निवडणूक घेण्यात आली. गावातील नागरिकांनी  मतदान केले.त्यामध्ये परत विद्यमान सरपंच धनाजी पाटील १६ मतांनी आघाडी घेऊन निवडून आले.

       यामुळे विरोधकांचे मनसुबे धुळीस मिळाले.  गावातील काही माजी जि.प. व पं.स.सदस्य आणि  ग्रामपंचायत ९ सदस्य इतके मातब्बर  नेते असताना राष्ट्रीय काँग्रेस च्या कार्यकर्त्यानी मोठी ताकत लावली. विद्यमान सरपंचांच्या बाजूने कौल दिला. या निवडणुकीत काँग्रेसची ताकत जनतेने दाखवून दिली. यामुळे तालुक्यातील होणाऱ्या  ग्रामपंचायत निवडणुकीवर याचा  चांगला परिणाम होणार असल्याची  भावना काँग्रेसच्या नेत्यांना वाटत आहे.

      यावेळी सरपंच धनाजी पाटील यांचा जत तालुका काँग्रेस कमिटीच्या वतीने आमदार विक्रमदादा सावंत , जत तालुका काँग्रेस कमिटी अध्यक्ष आप्पाराया बिराजदार,माजी सभापती बाबासाहेब  कोडग यांच्या उपस्थितीत सत्कार करण्यात आला.

जत तालुक्यात ३० ग्रामपंचायत निवडणुकीचा रणसंग्राम सुरू आहे.या पार्श्वभूमीवर रेवनाळ येथील सरपंच धनाजी पाटील यांनी अविश्वास ठराव जिंकला.यामुळे तालुक्यातील काँग्रेसच्या कार्यकर्त्यांचा आत्मविश्वास वाढवणारा हा निकाल असल्याचे चित्र असून  रेवणाळच्या या राजकीय घडामोडीत माजी सभापती बाबासाहेब कोडग हे किंगमेकर ठरले आहेत.नवीन वर्षात कोडग यांनी काँग्रेसला न्यू इयर गिफ्ट दिल्याचे बोलले जात आहे.