दैनिक जनमत

उस्मानाबाद दि.२२ (प्रतिनिधी) – तत्कालीन मुख्यमंत्री देवेंद्र फडणवीस यांनी २०१६ मध्ये  विद्यापीठ कायद्यामध्ये बदल करून  आरएसएस व भाजपच्या मंडळींना पात्रता नसताना विद्यापीठाच्या कुलगुरुपदी नियुक्या दिल्या. त्या माध्यमातून फडणवीस यांनी भाजप व आरएसएस पदाधिकाऱ्यांच्या महामंडळाचे अड्डे निर्माण केले होते. मात्र महाविकास आघाडी सरकारने महाराष्ट्र सार्वजनिक विद्यापीठ अधिनियम २०१६ मधील विवेकवादी सुधारणा विधेयकाच्या माध्यमातून त्यात सुधारणा केल्या आहेत. त्यामुळे आरएसएस व भाजपने चुकीच्या व नियमबाह्य पद्धतीने केलेल्या कुलगुरुंच्या नियुक्त्या रद्द होणार असून ते अड्डे उद्ध्वस्त होणार आहेत. विशेष म्हणजे फडणवीस यांनी केलेले पाप उघड होत असल्यामुळेच भाजपच्या बुडाला आग लागली असल्याचा घणाघाती प्रहार युवा सेनेचे राज्य विस्तारक अविनाश खापे-पाटील व जिल्हा समन्वयक अॅड.संजय भोरे यांनी आयोजित संयुक्त पत्रकार परिषदेत दि. २२ जानेवारी रोजी केला आहे. 

येथील शासकीय विश्रामगृहात आयोजित करण्यात आलेल्या पत्रकार परिषदेत ते बोलत होते. पुढे बोलताना अविनाश खापे-पाटील व ॲड. संजय भोरे म्हणाले की, विद्यापीठ कुलगुरुंसाठी जे निकष व अर्हता आहेत. त्या डावलून डॉ.बाबासाहेब आंबेडकर मराठवाडा विद्यापीठाचे कुलगुरु डॉ प्रमोद येवले यांची तर सोलापूर येथील पुण्यश्लोक अहिल्यादेवी होळकर विद्यापीठाच्या कुलगुरू डॉ.मृणालिणी फडणवीस यांच्यासह राज्यातील १२ विद्यापीठापैकी ८ कुलगुरुंच्या नियुक्त्या या राजकीय प्रभावाखाली केलेल्या आहेत. त्यामुळे महाविकास आघाडी सरकारने या कायद्यामध्ये विवेकवादी सुधारणा केल्या असून राज्यातील सर्व विद्यापीठे, आरोग्य विज्ञान विद्यापीठ, पशु व मस्त्य विद्यापीठ यांच्या प्र-कुलपतीपदी संबंधित खात्याचे मंत्री असतील. विशेष म्हणजे भाजपा सरकार असलेल्या उत्तर प्रदेश, कर्नाटक यासह इतर राज्यात प्र-कुलपदी आहेत. त्याला भाजपची मंडळी विरोध करीत नाहीत. ते महाराष्ट्रातील भाजपच्या मंडळींना चालते. मात्र त्यांच्या विरोधातील सरकारने हा कायदा केल्यामुळे केवळ विरोधासाठी विरोध म्हणून भाजपची मंडळी या विरोधात संभ्रम निर्माण करण्याचे काम करीत आहे. सर्वात महत्त्वाचे म्हणजे कुलगुरुंचे कोणतेही अधिकार कमी करण्यात आलेले नसून कुलगुरूंची निवड प्रकिया करण्यासाठी पूर्वी ३ सदस्य समिती होती. नवीन धोरणानुसार ती सदस्य संख्या ५ करण्यात आली आहे. या ५ सदस्यांनी शिफारस केलेल्या २ उमेदवारांपैकी एकाची निवड कुलपत म्हणून केली जाणार आहे. मात्र त्यासाठी आवश्यक असलेली शैक्षणीक अर्हता व इतर अत्यावश्यक नियम लागू असतील. त्यामुळे ‌यापुढे कोणत्याही परिस्थितीत शिक्षण क्षेत्रातील भाजपने निर्माण केलेली एकाधिकारशाही नष्ट होणार असून  अधिसभेच्या सदस्य संख्यमध्ये ९ सदस्यांची वाढ करण्यात आली असून त्यापैकी १ प्र-कुलपती, एक मराठी भाषा मंडळाचा संचालक व ७ शासनाद्वारे नियुक्त केलेल्या

 सदस्यांचा समावेश करण्यात येणार आहे. पूर्वीच्या अधिनियमात अर्हता निश्चित नसल्यामुळे राज्यातील विद्यापीठांच्या अधिसभा सदस्यांमध्ये ७९ सदस्य विशिष्ट विचारसरणीच्या आणि राजकीय पक्षाचे म्हणजेच आरएसएस व भाजपाच्या पदाधिकाऱ्यांचे महामंडळ असल्याचा आरोपही त्यांनी केला. तसेच केंद्राच्या राष्ट्रीय शैक्षणिक २०२० मधील मुद्दा ४.२२ च्या आधारे प्रत्येक विद्यापीठांमध्ये मराठी भाषेला प्रोत्साहन व समृद्धीसाठी प्रयत्न करण्यात येणार आहेत. तर रघुनाथ माशेलकर समितीच्या शिफारसनुसार अल्पसंख्यांक महिला दिव्यांग तृतीयपंथी या सर्व वंचित घटकांना समान संधी देण्यात येणार असल्याचे त्यांनी नमूद केले. यावेळी शिवसेनेचे कळंब तालुका सरचिटणीस दिपक जाधव, विद्यार्थी कक्ष कळंब तालुकाप्रमुख कृष्णा हुरगट, अक्षय नाईकवाडे, बापू थोरात आदींसह पदाधिकारी उपस्थित होते.

गुजरातमध्ये विद्यापीठाच्या १२ सिनेट सदस्यांची निवड राज्य शासन करते. या १२ सदस्यांनी कुलगुरुसाठी सुचविलेल्या नावापैकी एकाची राज्य सरकार कुलपतीपदी निवड करते. या परिस्थितीला हुकूमशाही म्हणावे लागेल. कारण ९९ टक्के जागेवर संघ व भाजपा पदाधिकाऱ्यांच्या नियुक्त केल्या जातात. याबाबत महाराष्ट्रातील भाजपच्या मंडळींना दिसत नाही का ? असा असे टोलाही त्यांनी लगावला. 

डॉ. प्रमोद येवले नागपूर विद्यापीठात प्र-कुलगुरू असताना त्यांच्या विद्यापीठ व महाविद्यालयीन सेवेचा किमान १५ वर्षाचा अनुभव नसताना देखील औषध निर्माण क्षेत्रातील पदविका ६ वर्षाचा अनुभव गृहीत धरून त्यांची कुलगुरूपदी वर्णी लावण्यात आली. त्यांच्या विरोधात न्यायालयीन खटला सुरू आहे. तर सोलापूर विद्यापीठाच्या कुलगुरू डॉ मृणालिनी फडणवीस यांच्याकडे अत्यावशक निकष असलेला मेजर रिसर्च प्रोजेक्ट नसताना देखील त्यांची कुलगुरूपदी नियुक्ती केली आहे. यासह पुणे येथील सावित्रीबाई फुले विद्यापीठाचे कुलगुरू डॉ नितीन करमळकर, नागपूर येथील राष्ट्रसंत तुकडोजी महाराज विद्यापीठाचे कुलगुरू डॉ सुभाष चौधरी, अमरावती येथील संत गाडगेबाबा विद्यापीठाचे कुलगुरू डॉ चांदेकर, मुंबई येथील श्रीमती नाथीबाई दामोदर ठाकरसी महिला विद्यापीठाच्या कुलगुरू डॉ शशिकला वंजारी, मुंबई विद्यापीठाचे कुलगुरू डॉ संजय देशमुख, रायगड जिल्ह्यातील लोणेरे येथील डॉ बाबासाहेब आंबेडकर तंत्र विद्यापीठाचे कुलगुरू डॉ. कारभारी काळे व औरंगाबाद येथील डॉ बाबासाहेब आंबेडकर मराठवाडा विद्यापीठाचे कुलगुरू डॉ. प्रमोद येवले आदींना पूर्वानुभव व अत्यावश्यक पात्रता नसताना त्यांना कुलगुरु म्हणून नियुक्त करण्यात आलेले आहे.

उस्मानाबाद – शाळा सुरू करण्याचा निर्णय स्थानिक प्रशासनाने परिस्थिती पाहून घ्यावा असे आदेश शासनाने दिले असल्याने आणि गेल्या काही दिवसात जिल्ह्यात कोव्हिड रुग्णांमध्ये वाढ होत असल्याने जिल्ह्यात  १० वी १२ वी वगळता शाळा २९ जानेवारी पर्यंत बंदच राहणार असल्याचे जिल्हा प्रशासनाच्या वतीने आदेशित केले आहे. जस जसे रुग्ण संख्या कमी होईल त्यानुसार निर्णय घेण्यात येणार आहे.

सलगरा,दि.२०( प्रतिनिधी)

तुळजापूर तालुक्यातील किलज ग्रामपंचायत येथे किलज येथील विद्युत वीज पुरवठा विभागाचे वरीष्ठ तंत्रज्ञ गणेश सातपुते यांचा त्यांच्या क्षेत्रातील उत्कृष्ट कार्याबद्दल वाढदिनानिमित्ताने सत्कार करण्यात आला. गणेश सातपुते यांनी त्यांच्या क्षेत्रात करत असलेल्या कामाचे कौतुक होत असते. सातपुते हे किलज येथील विद्युत विभागाचे मुख्य असून त्यांनी त्यांच्या पथकासह आतापर्यंत गावातील वीजबिले भरपूर प्रमाणात वसुली केली आहेत, आणि एक प्रकारे प्रशासनास सहकार्य केले आहे, त्यानिमित्ताने त्यांचा सत्कार करण्यात आला.

यावेळी मनोज गायकवाड, भरत गवळी, किलज ग्रामसेवक सचिन चौधरी, प्रदीप शिंदे, बब्रुवान शिंदे, आनंद निर्मळे, गौतम गवळी, गणेश कुठार, इराणा स्वामी, प्रकाश गायकवाड, राजेंद्र स्वामी, उत्तम राठोड यांच्या सह गावातील ईतर नागरिक उपस्थित होते.

उस्मानाबाद,20(प्रतिनिधी):- विमुक्त जाती भटक्या जमाती, इतर मागासवर्ग व विशेष मागास प्रवर्ग कल्याण विभागाकडून महात्मा बसवेश्वर सामाजिक समता-शिव पुरस्काराकरिता इच्छुक व्यक्ती आणि संस्था यांच्याकडून अर्ज  मागविण्यात येत आहेत.

       विरशैव-लिंगायत सामाजिक, शैक्षणिक अर्थिकदृष्टया विकास होण्यासाठी सामाजिक, शैक्षणिक, कलात्मक, सांस्कृतिक, समाज प्रबोधन व साहित्यिक क्षेत्रात कार्य करणा-या कलावंत साहित्यिक,समाज प्रबोधन तसेच साहित्यिक क्षेत्रात कार्य करणा-या कलावंत साहित्यिक,समाज प्रबोधनकार, समाज सेवक व्यक्ती आणि संस्था यांच्या कार्याचा उचित सन्मान व्हावा तसेच त्यांच्या कार्याची प्रेरणा वृध्दीगत व्हावी म्हणून राज्य सरकारने या पुरस्काराने सन्मानीत करण्यात येणार आहे.

इच्छुक व्यक्ती आणि संस्था यांनी पुरस्कारासाठी त्यांच्या विहीत नमुन्यातील अर्ज सहाय्यक आयुक्त समाज कल्याण यांच्याकडे दि. ०४ फेब्रुवारी-२०२२ पर्यंत सर्व कागद पत्रासह  सादर करावेत, असे आवाहन समाज कल्याणचे सहाय्यक आयुक्त बी.जी. अरवत यांनी केले आहे.

विहीत नमुन्यातील अर्ज व पुरस्काराविषयी सविस्तर माहिती या कार्यालयाकडे तसेच महाराष्ट्र शासनाच्याwww.maharashtra.gov .in वेबसाईटवर उपलब्ध करण्यात आला आहे. त्याचा संगणक सांकेतांक क्रंमाक २०१९०३०८२०३९००३५२२ असा आहे.

उस्मानाबाद -महाविकास आघाडी सरकारने सरसकट शाळा, महाविद्यालये व कोचिंग क्लासेस बंदचा घेतलेला तुघलकी निर्णय अत्यंत चुकीचा व तितकाच दुर्दैवी आहे. या निर्णयामुळे विद्यार्थ्यांच्या मानसिकतेवर दुरगामी परिणाम होत आहेत. ऑनलाईन शिक्षण हे सर्वसामान्य गोरगरीब विद्यार्थी व दुर्गम/अतिदुर्गम खेड्यापाड्यातील विद्यार्थ्यांपर्यंत पोहचत नाही. दोन वर्षांपासून शाळा,महाविद्यालये बंद असल्याने ग्रामीण व शहरी भागातील शैक्षणिक दरी वाढुन सर्वसामान्य जनतेची मुले शिक्षणाच्या मुख्य प्रवाहापासून दूर फेकले जात आहेत. यामुळे मुलांचे शिक्षणाचे गांभीर्य नष्ट होत असून त्यांचे नुकसान होत आहे.

राज्यभरात सर्वच व्यवसाय कोरोना निर्बंधासहीत सुरु आहेत. तेव्हा सरकारने कोरोनाचे नियम लावून शाळा, महाविद्यालये व कोचिंग क्लासेस सुरू करण्याची परवानगी द्यावी अशी मागणी भाजपच्या वतीने करण्यात आली आहे.यावेळी शैक्षणिक संस्था जिल्हाध्यक्ष पांडूरंग लाटे,सुधीर पाटील,रामदास कोळगे, गणेश एडके,राजसिंहा राजेनिंबाळकर,प्रभाकर मुळे,विनोद राठोड यांच्यासह भाजपचे कार्यकर्ते मोठ्या संख्येने उपस्थित होते.