सोलापूर, ५ एप्रिल – सोलापूर शहर व जिल्ह्यातील धर्मादाय कायद्यांतर्गत नोंदणीकृत रुग्णालयांनी रुग्णांना सवलतीच्या दरात उपचार न दिल्यास शिवसेना स्टाईलने कारवाई केली जाईल, असा कडक इशारा शिवसेनेचे जिल्हाप्रमुख मनिष काळजे यांनी दिला आहे. धर्मादाय रुग्णालयांकडून रुग्णांची आर्थिक लूट आणि उपचारास टाळाटाळ हे प्रकार आता सहन केले जाणार नाहीत, असा सज्जड दम त्यांनी दिला.
शहरातील अनेक रुग्णालये धर्मादाय आयुक्त कार्यालयाकडे नोंदणीकृत असून शासनाने निश्चित केलेल्या सवलतीच्या दरानुसार रुग्णांना उपचार देणे त्यांच्यावर बंधनकारक आहे. या रुग्णालयांनी गरजू रुग्णांसाठी ठरवलेला कोटा राखीव ठेवणेही आवश्यक आहे. मात्र, अनेक रुग्णालये या नियमांकडे दुर्लक्ष करून वैद्यकीय सेवेचा व्यवसाय करत आहेत. गरिबांपासून लाखो रुपये उकळणे, उपचार न देणे यासारखे प्रकार वाढीस लागले आहेत. पुण्यातील दीनानाथ मंगेशकर रुग्णालयात उपचार न मिळाल्याने एका निष्पाप महिलेचा मृत्यू झाल्याची घटना ताजी असतानाच मनिष काळजे यांनी सोलापुरात अशा घटना घडू नयेत यासाठी ठोस भूमिका घेतली आहे.
मनिष काळजे यांनी सांगितले की, “रुग्णसेवा ही ईश्वरसेवा आहे, हे विसरून अनेक रुग्णालये लुटीचे साधन बनली आहेत. ही स्थिती बदलण्यासाठी आता रस्त्यावर उतरावे लागणार आहे. धर्मादाय रुग्णालयांनी त्यांच्या मुख्य प्रवेशद्वारावर उपचाराच्या दरांचे डिजिटल फलक किंवा डॅशबोर्ड लावणे बंधनकारक आहे. जे रुग्णालये हे पालन करणार नाहीत त्यांना थेट शिवसेना स्टाईलने उत्तर दिलं जाईल.”
शिवसेनेने सर्व नागरिकांना आवाहन केले आहे की, धर्मादाय रुग्णालयांमध्ये जर कोणालाही सवलतीच्या दरात किंवा मोफत उपचार नाकारण्यात आले, तर त्यांनी त्वरित सात रस्ता परिसरातील शिवसेना भवन येथे संपर्क साधावा. अशा हॉस्पिटलविरुद्ध तात्काळ कारवाई करण्यात येईल, असेही त्यांनी स्पष्ट केले.
“धर्मादाय कायद्याचा अवमान करणाऱ्या कोणत्याही रुग्णालयाची गय केली जाणार नाही,” असे ठाम शब्दांत सांगत मनिष काळजे यांनी सोलापूरमधील सर्व रुग्णालयांना सजग राहण्याचा इशाराच दिला आहे.