धाराशिव – तालुक्यात १४ ऑगस्टपासून झालेल्या मुसळधार पावसामुळे व नद्यांना आलेल्या पुरामुळे शेतकऱ्यांच्या पिकांचे मोठ्या प्रमाणावर नुकसान झाले आहे. याबाबत तहसील कार्यालय, धाराशिव (महसूल शाखा) यांनी १८ ऑगस्ट रोजी आदेश काढत सर्व महसूल मंडळातील ग्रामस्तरीय अधिकाऱ्यांना तात्काळ पंचनामे करण्याचे निर्देश दिले आहेत.
या आदेशानुसार धाराशिव ग्रामीण, ढोकी, तेर व जागजी महसूल मंडळातील पिकांच्या नुकसानीची पाहणी करून पंचनामे करणे अत्यावश्यक करण्यात आले आहे. प्राथमिक अहवालानुसार खरीप हंगामातील पिकांचे मोठे नुकसान झाले असून शेतकऱ्यांना दिलासा देण्यासाठी पंचनाम्याची प्रक्रिया वेगाने राबविण्याचा निर्णय तहसील प्रशासनाने घेतला आहे.
📌 आदेशातील महत्त्वाचे मुद्दे
तहसीलदार मृणाल जाधव यांच्या स्वाक्षरीने जारी केलेल्या आदेशात विविध अधिकाऱ्यांची जबाबदारी निश्चित करण्यात आली आहे –
- तलाठी : नुकसान झालेल्या शेतजमिनीचे/पिकांचे सर्व्हे नंबर व गट क्रमांक पथकास दाखवून ७/१२ उताऱ्याशी जुळविणे.
- ग्रामसेवक : ग्राम महसूल अधिकारी, ग्रामपंचायत अधिकारी, कृषि सहाय्यक व शेतकरी यांच्या उपस्थितीत GPS सक्षम मोबाईल अॅपद्वारे नुकसानग्रस्त शेतजमिनीचे व पिकांचे फोटो घेणे.
- कृषि सहाय्यक : प्रत्यक्ष शेतजमिनीवर जाऊन पिकांची पाहणी करून झालेल्या नुकसानीचे टक्केवारीनुसार मूल्यमापन करणे.
तयार झालेल्या पंचनाम्याचे प्रपत्र (अ, ब, क) व Annexure-१, Annexure-७ यामध्ये माहिती नमूद करून त्यासोबत जिओ-टॅगिंग केलेले फोटो संलग्न करणे बंधनकारक आहे. हे अहवाल तालुका कृषी अधिकारी यांच्याकडे सुपूर्द केले जातील. त्यानंतर तालुका कृषी अधिकारी मंडळनिहाय एकत्रित अहवाल तयार करून तालुका स्तरीय समितीकडे सादर करतील.
📌 निष्काळजीपणाबद्दल कडक इशारा
आदेशात नमूद करण्यात आले आहे की, पंचनाम्याच्या कामात हलगर्जीपणा केल्यास संबंधित अधिकारी व कर्मचाऱ्यांवर आपत्ती व्यवस्थापन अधिनियम २००५ च्या कलम ५२ अंतर्गत कारवाई करण्यात येईल. तसेच खोटे किंवा चुकीचे पंचनामे केल्याचे आढळल्यास महाराष्ट्र नागरी सेवा (शिस्त व अपिल) नियम १९७९ अंतर्गत कठोर कारवाई केली जाणार आहे.
📌 प्रशासनाची भूमिका
तहसील कार्यालयाने स्पष्ट केले आहे की, शेतकऱ्यांना लवकरात लवकर शासकीय मदत मिळण्यासाठी पंचनामे काटेकोर, वस्तुनिष्ठ व वेळेत पूर्ण व्हावेत. अतिवृष्टी व पुरामुळे मोठ्या प्रमाणात झालेल्या पिकांच्या नुकसानीची योग्य नोंद होणे हे शेतकऱ्यांच्या मदतीसाठी अत्यंत महत्त्वाचे असल्याचे आदेशात म्हटले आहे.
धाराशिव तालुक्यात अतिवृष्टी व पुरामुळे पिकांचे मोठे नुकसान झाले असून पंचनामे तातडीने करून अहवाल सादर करण्यासाठी ग्रामस्तरीय अधिकाऱ्यांना आदेशित करण्यात आले आहे. प्रशासनाने शेतकऱ्यांना दिलासा देण्यासाठी यंत्रणा युद्धपातळीवर कामाला लावली आहे.