धाराशिव (प्रतिनिधी) : देशाच्या सुरक्षेच्या दृष्टिकोनातून अत्यंत महत्त्वाचा निर्णय घेत, धाराशिव जिल्ह्यात 3 जून 2025 पर्यंत ड्रोनसह सर्व प्रकारच्या उडत्या यंत्रांवर बंदी घालण्यात आली आहे. जिल्हाधिकारी कार्यालयाने जारी केलेल्या आदेशानुसार, धाराशिव जिल्हा संपूर्णपणे ‘नो फ्लायिंग झोन’ म्हणून घोषित करण्यात आला आहे.
हा निर्णय भारतीय लष्कराच्या ‘ऑपरेशन सिंदुर’ मोहिमेनंतर घेतला आहे. या मोहिमेद्वारे जैश-ए-मोहम्मद (JEM), लष्कर-ए-तय्यबा (LET) आणि हिज्बुल मुजाहिद्दीन (HM) या दहशतवादी संघटनांचे तळ उद्ध्वस्त करण्यात आले आहेत. या कारवाईचा सूड घेण्यासाठी संबंधित संघटना त्यांच्या स्लीपर सेलच्या माध्यमातून भारतातील विविध ठिकाणी, विशेषतः महाराष्ट्र राज्यात ड्रोनद्वारे दहशतवादी हल्ले करण्याची शक्यता वर्तवण्यात आली आहे.
पोलीस अधीक्षक, धाराशिव यांनी दिलेल्या माहितीच्या आधारे, जिल्ह्यात कायदा व सुव्यवस्था अबाधित ठेवण्याच्या तसेच सार्वजनिक सुरक्षेच्या दृष्टीने, कोणत्याही प्रकारचा ड्रोन, रिमोट-कंट्रोल मायक्रो एअरक्राफ्ट, पॅरा ग्लायडर, हँग ग्लायडर, हॉट एअर बलून आणि तत्सम उड्डाण करणाऱ्या यंत्रांचा वापर पूर्णपणे बंदी घालण्यात आली आहे.
जिल्ह्याच्या अपर जिल्हादंडाधिकारी शोभा जाधव यांनी भारतीय नागरिक सुरक्षा संहिता 2023 च्या कलम 163 अंतर्गत या आदेशाची तातडीने अंमलबजावणी केली आहे. आदेशानुसार, या निर्णयाचे उल्लंघन करणाऱ्या कोणत्याही व्यक्ती, संस्था किंवा संघटनेविरुद्ध भारतीय न्याय संहिता 2023 च्या कलम 223 अंतर्गत कठोर कायदेशीर कारवाई करण्यात येईल.
प्रशासनाने नागरिकांना या आदेशाचे पालन करण्याचे आवाहन केले असून, सुरक्षेच्या दृष्टीने कोणतीही शंका किंवा माहिती असल्यास तात्काळ पोलिसांशी संपर्क साधण्याचे आवाहनही करण्यात आले आहे.
या काळात कोणत्याही वैयक्तिक, व्यावसायिक, सामाजिक किंवा सरकारी कारणांसाठीही ड्रोन वा तत्सम यंत्रांच्या उड्डाणास परवानगी दिली जाणार नाही.
संपूर्ण जिल्ह्यात नो फ्लायिंग झोन लागू – काय बंदी आहे?
- ड्रोन
- रिमोट नियंत्रित मायक्रो एअरक्राफ्ट
- पॅरा ग्लायडर्स
- हँग ग्लायडर्स
- हॉट एअर बलून
- तत्सम कोणतीही उडणारी वस्तू
बंदी कालावधी : आदेश दिनांकापासून 3 जून 2025 पर्यंत
कायदेशीर कारवाई : भारतीय न्याय संहिता 2023 चे कलम 223 अन्वये शिक्षेस पात्र
सूचना : जिल्ह्यातील नागरिकांनी सुरक्षेच्या दृष्टीने सजग राहून, कोणतीही संशयास्पद हालचाल आढळल्यास स्थानिक पोलिसांना कळवावी, असे आवाहन प्रशासनाकडून करण्यात आले आहे.
- येत्या नवरात्र उत्सवात तुळजापूर विकास प्रकल्पाचे भूमिपूजन -परिवहन मंत्री प्रताप सरनाईक
- महाळुंग येथील अपघातात हुंडाई कंपनीच्या वेणीव गाडीचा चक्काचूर
- बोंबला!! लोकसेवक बनले मालक
- मुंबईकडे नेत असलेला ८.२७ किलो गांजा येडशी येथे जप्त
- पहिली शादी हुइ नहीं तब तक तिसरी शादी मुबारक, कृष्णा मराठवाडा सिंचन प्रकल्पातून येणाऱ्या पाण्याची अवस्था, काल्पनिक पात्रांची चर्चा…
