दैनिक जनमत

नाशिक | प्रतिनिधी
राजकारणाच्या रंगमंचावर ठाकरे बंधू – राज ठाकरे आणि उद्धव ठाकरे – पुन्हा एकत्र येण्याच्या चर्चेला चालना मिळाल्याने, वरिष्ठ नेते तथा माजी उपमुख्यमंत्री छगन भुजबळ यांनी यावर उत्स्फूर्त प्रतिक्रिया दिली आहे. “ठाकरे बंधू एकत्र आले, तर मला सर्वाधिक आनंद होईल,” असे भुजबळ यांनी स्पष्टपणे सांगितले.

एका कार्यक्रमानंतर माध्यमांशी संवाद साधताना भुजबळ म्हणाले, “मी बाळासाहेब ठाकरे यांच्यासोबत जवळून काम केले आहे. जेव्हा राज ठाकरे वेगळे होण्याच्या निर्णयावर होते, तेव्हा मी स्वतः पुढाकार घेऊन राज आणि उद्धव या दोघांनाही फोन केला होता. त्यांना काही दिवस शांत राहण्याचा सल्ला दिला होता, कारण कधी कधी भावना शांत झाल्यावर निर्णय बदलू शकतो. दुर्दैवाने तसे झाले नाही.”

“आजही जर ते दोघे एकत्र आले, तर त्यांच्या शक्तीला गती मिळेल. दोघेही स्वतंत्र पक्षाचे प्रमुख असले, तरी त्यांची ओळख संपूर्ण महाराष्ट्रात आणि देशात आहे. शिवसेनेची ताकद निश्चितच वाढेल,” असेही ते म्हणाले.

मराठी सक्तीबाबत विचारले असता, भुजबळ यांनी विचारपूर्वक भूमिका मांडली. “मराठी भाषा शिकवलीच पाहिजे, हे बिनविवाद आहे. पण भाषा सक्तीने शिकवण्याऐवजी प्रेरणेने शिकवली गेली पाहिजे. आजच्या काळात विज्ञान, गणित, माहिती तंत्रज्ञान यासारख्या विषयांमध्ये प्रावीण्य मिळवणे आवश्यक आहे. मुलांनी एकाच वेळी अनेक भाषा शिकणे हे त्यांच्या शैक्षणिक भारात भर घालू शकते. म्हणून, सक्तीऐवजी समतोल विचार आवश्यक आहे,” असे त्यांनी स्पष्ट केले.

दरम्यान, अजित पवार यांच्या नाशिक दौऱ्याच्या पार्श्वभूमीवर राष्ट्रवादी युवक काँग्रेसने लावलेल्या फलकावरही भुजबळांनी प्रतिक्रिया दिली. “भुजबळ साहेबांना मंत्रिमंडळात स्थान द्यावे,” अशी मागणी त्या फलकावर होती. यावर ते म्हणाले, “कार्यकर्त्यांचं प्रेम आहे, त्यामुळे त्यांनी अशी मागणी फलकाद्वारे व्यक्त केली असावी. त्यावर फारसा अर्थ काढण्याची आवश्यकता नाही.”

मुंबई | प्रतिनिधी

शिवसेना (उद्धव बाळासाहेब ठाकरे) पक्षाचे खासदार आणि मुख्य प्रवक्ते संजय राऊत यांनी शनिवारी आयोजित पत्रकार परिषदेत राज्यातील राजकारणात नवा रंग भरला. त्यांनी पहिल्यांदाच खुलेपणाने मान्य केले की, “राज्याच्या हितासाठी उद्धव ठाकरे आणि राज ठाकरे हे बंधू एकत्र येऊ शकतात.” त्यांच्या या विधानामुळे राजकीय वर्तुळात चर्चेला उधाण आले आहे.

“ठाकरे बंधूंच्या एकतेत कोणतीही अट नाही”

पत्रकारांनी विचारलेल्या प्रश्नाला उत्तर देताना संजय राऊत म्हणाले, “राज ठाकरे आमचे बंधू आहेत. उद्धव ठाकरे आणि राज ठाकरे यांच्यातील संबंध व्यक्तिगत आणि रक्ताचे आहेत. हे दोन नेते जर राज्याच्या भवितव्यासाठी एकत्र येण्याचा निर्णय घेतात, तर त्यामध्ये कोणत्याही प्रकारची अट नसावी, हे आम्हाला वाटते.”

राऊतांनी स्पष्ट केले की, ही भावना केवळ पक्षाची नाही तर संपूर्ण महाराष्ट्रातील लोकांची आहे. “महाराष्ट्राच्या अस्मितेवर वार करणाऱ्यांना प्रत्युत्तर देण्यासाठी जर ठाकरे बंधू एकत्र आले, तर ते महाराष्ट्रासाठी लाभदायक ठरेल,” असेही त्यांनी नमूद केले.

भाजपवर तीव्र शब्दांत हल्ला

भाजपवर निशाणा साधताना राऊत म्हणाले, “जे महाराष्ट्राच्या हिताच्या आड येतात, ते या राज्याचे शत्रू आहेत. त्यांनी कितीही सत्ता वापरली, तरी आम्ही त्यांच्या पंक्तीत बसणार नाही.” त्यांनी भाजपवर “महाराष्ट्रद्रोह” केल्याचा आरोप करत म्हटले की, “या लोकांनी महाराष्ट्राचा आत्मसन्मान पायदळी तुडवला आहे. आम्ही त्यांचा फोटोही सरकारी कार्यालयात लावणार नाही.”

यावेळी त्यांनी अप्रत्यक्षपणे पंतप्रधान नरेंद्र मोदी आणि केंद्रीय गृहमंत्री अमित शहा यांच्यावरही टीका केली. “जे राज्यातील न्यायसंस्था, प्रशासन, आणि लोकशाही संस्थांवर वार करत आहेत, त्यांना महाराष्ट्रात स्थान नसावे,” असेही ते म्हणाले.

अजित पवारांच्या भूमिकेचे समर्थन, पण हिंदीला विरोध

हिंदी विषय सक्तीने शिकवण्याच्या मुद्द्यावरून सत्ताधाऱ्यांमध्ये गोंधळ सुरू असताना, संजय राऊतांनी अजित पवारांच्या भूमिकेचे समर्थन केले. “हिंदी शिकण्यास आम्हाला विरोध नाही. पण शालेय अभ्यासक्रमात सक्ती केली जाऊ नये. महाराष्ट्रात मराठीचे स्थान सर्वोच्च असले पाहिजे,” असे राऊतांनी ठामपणे सांगितले.

राजकारणातील ‘मस्का’ टोळीवर टीका

“आजकाल काहीजण सतत दिल्लीला मस्का लावत आहेत. त्यांना ना महाराष्ट्राची चिंता आहे, ना लोकशाही मूल्यांची,” असा घणाघात करत त्यांनी भाजप-शिंदे गटाचे नाव न घेता त्यांच्यावर टीका केली. “पवार, ठाकरे, राजे यांच्या मुळाशी लागणाऱ्या कोणत्याही शक्तींना महाराष्ट्रात स्थान नाही,” असाही इशारा त्यांनी दिला.

न्यायालयाचा अवमान करणाऱ्यांवर कारवाईची मागणी

सुप्रीम कोर्टाच्या निर्णयांवर शंका घेणाऱ्यांवर टीका करताना राऊत म्हणाले, “देशात अनेक संवैधानिक संस्था आज संकटात आहेत. सर्वोच्च न्यायालयाचे आदेश न पाळणाऱ्यांवर तातडीने कठोर कारवाई झाली पाहिजे. लोकशाही वाचवण्यासाठी न्यायपालिका सक्षम असली पाहिजे.”

राजकीय भूकंपाचे संकेत?

संजय राऊतांच्या या पत्रकार परिषदेमुळे राज्याच्या राजकारणात मोठा भूकंप होण्याची शक्यता वर्तवली जात आहे. आगामी लोकसभा आणि विधानसभा निवडणुकांच्या पार्श्वभूमीवर ठाकरे-राज युती होईल का, याकडे संपूर्ण राज्याचे लक्ष लागले आहे.

पुणे | प्रतिनिधी
गर्भवती महिलेच्या संशयास्पद मृत्यूप्रकरणी केवळ संबंधित डॉक्टरांवर गुन्हा दाखल करण्यात आला असून रुग्णालय प्रशासनावर कोणतीही कारवाई न झाल्याने शासन त्यांना वाचवण्याचा प्रयत्न करत आहे, असा गंभीर आरोप खासदार सुप्रिया सुळे यांनी केला आहे.

“या प्रकरणात डॉक्टरांवर गुन्हा दाखल होणं उशिरा का होईना, हे स्वागतार्ह आहे. मात्र केवळ डॉक्टरांना दोषी ठरवून रुग्णालय प्रशासनाला मोकळं करणं हे न्याय प्रक्रियेशी प्रतारणा आहे,” असं त्या म्हणाल्या.

प्रशासनालाच क्लीन चीट, दोष टाळण्याचा डाव?
सुळे यांनी स्पष्ट केलं की, “या घटनेत संबंधित रुग्णालयाच्या व्यवस्थापनाचीही तितकीच जबाबदारी आहे. पण त्यांच्या भूमिकेकडे जाणीवपूर्वक दुर्लक्ष केलं जातंय. ही महाराष्ट्राच्या एका लेकीवर झालेली अमानुष घटना आहे, आणि ती संपूर्ण राज्यासाठी लाजिरवाणी आहे.”

सरकारकडून भूमिकेतील विरोधाभास
सुप्रिया सुळे यांनी मुख्यमंत्री एकनाथ शिंदे यांच्या सुरुवातीच्या वक्तव्याची आठवण करून दिली. “मुख्यमंत्री म्हणाले होते की न्याय दिला जाईल, पण सध्याचं सरकारचं वर्तन पाहता सुरुवातीच्या त्या विश्वासाला तडा गेला आहे,” अशी तीव्र टीका त्यांनी केली.

‘सत्य समोर आलंच पाहिजे’
“पाच तास रुग्णालयात महिलेचं ब्लीडिंग होत असताना वेळेवर उपचार का दिले गेले नाहीत? कोण जबाबदार? हा माणुसकीचा प्रश्न आहे. या प्रकरणात कुणीही दोषी असतील, त्यांना शिक्षा झालीच पाहिजे. अहवालांमध्ये अडकण्यापेक्षा सत्य समोर आलं पाहिजे,” असंही त्या म्हणाल्या.

आयएमएच्या भूमिकेवरही संशय
इंडियन मेडिकल असोसिएशन (आयएमए) यांनी सुरुवातीच्या अहवालावरून डॉक्टरांना क्लीन चीट दिली होती. त्यानंतर अहवाल बदलल्यावर गुन्हा कसा काय दाखल झाला, असा सवाल त्यांनी उपस्थित केला आहे. सुळे यांनी आयएमएच्या या भूमिकेवरही प्रश्नचिन्ह उपस्थित करत, हे सत्य दडपण्याचा प्रयत्न असल्याचं सूचित केलं.

धाराशिव
केशेगाव (ता. धाराशिव) येथील रहिवासी आणि सामाजिक कार्यकर्ते लहु रामा खंडागळे यांनी धाराशिव जिल्हा पोलिस प्रशासनाविरोधात लेखी तक्रार सादर करत गंभीर आरोप केले आहेत. त्यांचा आरोप आहे की, महावीर जयंतीच्या सुट्टीच्या दिवशी त्यांना मोबाईलवरून नियमबाह्य पद्धतीने चौकशीसाठी बोलावण्यात आले, तसे पत्र पोलिस प्रशासनाने त्यांच्या व्हॉट्स ॲप वरती पाठवले.ज्यामुळे त्यांचा मानसिक छळ झाला.

खंडागळे यांनी आपल्या तक्रारीत स्पष्ट केले आहे की, दिनांक १७ मार्च २०२३ रोजी तत्कालीन जिल्हा सरकारी वकील शरद जाधवर यांच्यावर अनुसूचित जाती-जमाती अत्याचार प्रतिबंधक कायद्यान्वये गुन्हा दाखल झाला होता. त्या अनुषंगाने त्यांच्या शस्त्र परवाना रद्द करण्यासाठी जिल्हा पोलीस प्रशासनाकडून जिल्हाधिकाऱ्यांना आवश्यक रिपोर्ट पाठवणे गरजेचे होते, मात्र तो मुद्दाम टाळण्यात आला. त्या संदर्भात त्यांनी तक्रार केली आहे. त्याच तक्रारीच्या अनुषंगाने

लहू खंडागळे यांना अप्पर पोलिस अधीक्षक यांच्या आदेशानुसार महावीर जयंतीच्या सुट्टीच्या दिवशी मोबाईल नोटीसीद्वारे पोलिस अधीक्षक कार्यालयात चौकशीसाठी बोलावण्यात आले. ही प्रक्रिया बेकायदेशीर असून, यामागे त्यांच्यावर दबाव टाकण्याचा आणि चौकशीतील दोषींना वाचवण्याचा प्रयत्न असल्याचा दावा त्यांनी केला आहे.

“जर मोबाईलवरून नोटीस देणे कायदेशीर मानले जात असेल, तर सर्वसामान्य नागरिकांनीही मोबाईलवरूनच तक्रारी देणे आणि पोलीसांकडून स्वीकारणे ही प्रक्रिया रूढ करावी,” अशी ठाम भूमिका खंडागळे यांनी मांडली आहे.

या प्रकरणातील दोषींवर तत्काळ आणि कठोर कारवाई करण्यात यावी, अशी मागणी त्यांनी पोलिस महानिरीक्षक परिक्षेत्र, संभाजीनगर आणि,जिल्हाधिकारी, जिल्हा पोलिस अधीक्षक, धाराशिव यांच्याकडे केली आहे.

• राष्ट्रीय महामार्गावरून जाणाऱ्या वाहनांमधून माल लुटणाऱ्या दोन सराईत आरोपींना अटक
• जिल्हा परिषदेच्या पुरस्कार वितरणात राजकारण;निकष पूर्ण न करणाऱ्यांचा गौरव
• पारगावात अवैध वेश्याव्यवसायाचा पर्दाफाश हॉटेल पृथ्वीराज लॉजवर छापा; दोन पीडित मुलींची सुटका
• राजकीय राजधानीत गावगाडा विरुद्ध राजवाडा रंगत रंगणार,  इंजिनियर विरुद्ध इंजिनियर उभारणार
• राज्यातील १२ जिल्हा परिषदा व १२५ पंचायत समित्यांसाठी ५ फेब्रुवारीला मतदान; ७ फेब्रुवारीला मतमोजणी

उमरगा (जिल्हा धाराशिव), 16 एप्रिल 2025 – उमरगा तालुक्यातील ग्रामपंचायतींसाठी सन 2025 ते 2030 या पंचवार्षिक कालावधीसाठी सरपंच पदाच्या आरक्षण सोडतीचा कार्यक्रम उमरगा तहसील कार्यालयात पार पडला. या कार्यक्रमात अनुसूचित जाती, अनुसूचित जमाती, नागरीकांचा मागास प्रवर्ग (ना.मा.प्र.), तसेच महिलांसाठी आरक्षित झालेल्या ग्रामपंचायतींची यादी जाहीर करण्यात आली.

अनुसूचित जाती प्रवर्गासाठी 13 ग्रामपंचायती आरक्षित

या कालावधीत 13 ग्रामपंचायतींचे सरपंच पद अनुसूचित जाती प्रवर्गासाठी आरक्षित करण्यात आले आहे. त्यामध्ये खालील ग्रामपंचायतींचा समावेश आहे:

1. आष्टा (ज)
2. बेळंब
3. गुरुवाडी/चंडकाळ
4. बाबळसूर
5. त्रिकोळी
6. दाबका
7. कदमापूर/दुधनाळ
8. चिंचोली (ज)
9. कंटेकूर
10. जकेकूर
11. पेठसांगवी
12. येळी
13. चिंचोली (भु)

अनुसूचित जाती महिलांसाठी 7 सरपंच पदे राखीव

या पैकी 7 ग्रामपंचायतींचे सरपंच पद अनुसूचित जाती महिलांसाठी आरक्षित करण्यात आले असून, त्या ग्रामपंचायती पुढीलप्रमाणे आहेत:

1. आष्टा (ज)
2. गुरुवाडी/चंडकाळ
3. जकेकूर
4. बाबळसूर
5. येळी
6. कदमापूर/दुधनाळ
7. चिंचोली (भु)

अनुसूचित जमाती प्रवर्गासाठी 2 ग्रामपंचायती आरक्षित

अनुसूचित जमाती प्रवर्गासाठी खालील दोन ग्रामपंचायतींची निवड झाली आहे:

1. जवळगाबेट
2. कोळसूर गुं

यातील कोळसूर गुं ही ग्रामपंचायत अनुसूचित जमाती महिला प्रवर्गासाठी आरक्षित करण्यात आली आहे.

नागरिंकांचा मागास प्रवर्ग (ना.मा.प्र.) साठी 21 ग्रामपंचायती आरक्षित

या आरक्षणात 21 ग्रामपंचायती ना.मा.प्र. साठी निश्चित करण्यात आल्या आहेत. त्या पुढीलप्रमाणे:

1. आनंदनगर
2. कोरेगांव
3. एकोंडी (ज)
4. मुरळी
5. भुसणी / भूसणीवाडी
6. सावळसूर
7. कोथळी
8. तलमोड
9. मळगीवाडी
10. कलदेव निंबाळा
11. समुद्राळ
12. सांगवी (भि)
13. वागदरी
14. कदेर
15. कसगी
16. धाकटीवाडी
17. औराद
18. तुगांव
19. येणेगूर
20. एकूरगा
21. सुपतगाव

यापैकी 10 ग्रामपंचायती ना.मा.प्र. महिला प्रवर्गासाठी आरक्षित असून त्यामध्ये कलदेव निंबाळा, सांगवी (भि), कदेर, कसगी, समुद्राळ, धाकटीवाडी, औराद, तुगांव, एकरगा व मळगीवाडी यांचा समावेश आहे.

सर्वसाधारण प्रवर्गासाठी 44 ग्रामपंचायती आरक्षित

या यादीत सर्वसाधारण प्रवर्गासाठी 44 ग्रामपंचायतींची निवड करण्यात आली आहे, ज्यामध्ये कोराळ, नागराळ गुं, भगतवाडी, डिग्गी, नाईचाकूर, कराळी, गुजोंटी, चिंचकोटा, जकेकूरवाडी, बेडगा, मातोळा, हंद्राळ, नारंगवाडी, केसरजवळगा, आलूर, माडज, मळगी, वरनाळवाडी, सुंदरवाडी, महालिंगरायवाडी, दावलमलीकवाडी, अंबरनगर, तुरोरी, हिप्परगाराव, थोरलीवाडी, रामपूर, गणेशनगर, कोळसूर (क), बलसूर, कोरेगांववाडी, जगदाळवाडी, कवठा, कुन्हाळी, बोरी, काळानिंबाळा, दाळींब, मुळज, नाईकनगर (मु), गुगळगांव, पळसगांव, व्हंताळ, नाईकनगर (सू), कडदोरा यांचा समावेश आहे.

सर्वसाधारण महिला प्रवर्गासाठी 22 ग्रामपंचायतींची निवड

या प्रवर्गासाठी खालील ग्रामपंचायती आरक्षित आहेत:

1. कवठा
2. काळानिंबाळा
3. नारंगवाडी
4. नाईचाकूर
5. गुगळगाव
6. जकेकूरवाडी
7. कोरेगांववाडी
8. हिप्परगाराव
9. दाळींब
10. कडदोरा
11. कराळी
12. हंद्राळ
13. दावलमलीकवाडी
14. अंबरनगर
15. जगदाळवाडी
16. थोरलीवाडी
17. व्हंताळ
18. मातोळा
19. पळसगांव
20. नाईकनगर (सू)
21. नाईकनगर (मु)
22. भगतवाडी

.

• राष्ट्रीय महामार्गावरून जाणाऱ्या वाहनांमधून माल लुटणाऱ्या दोन सराईत आरोपींना अटक
• जिल्हा परिषदेच्या पुरस्कार वितरणात राजकारण;निकष पूर्ण न करणाऱ्यांचा गौरव
• पारगावात अवैध वेश्याव्यवसायाचा पर्दाफाश हॉटेल पृथ्वीराज लॉजवर छापा; दोन पीडित मुलींची सुटका
• राजकीय राजधानीत गावगाडा विरुद्ध राजवाडा रंगत रंगणार,  इंजिनियर विरुद्ध इंजिनियर उभारणार
• राज्यातील १२ जिल्हा परिषदा व १२५ पंचायत समित्यांसाठी ५ फेब्रुवारीला मतदान; ७ फेब्रुवारीला मतमोजणी