Home Blog Page 12

प्रिया मराठेचे निधन – कॅन्सरशी झुंज देत ३८व्या वर्षी अखेरचा श्वास

Dainik Janmat
-
0
प्रिया मराठेचे निधन – कॅन्सरशी झुंज देत ३८व्या वर्षी अखेरचा श्वास

मुंबई – मराठी तसेच हिंदी मालिकांमधून आपल्या अभिनयाची छाप सोडणारी लोकप्रिय अभिनेत्री प्रिया मराठे यांचे ३१ ऑगस्ट २०२५ रोजी, सकाळी चार वाजता निधन झाले. त्या अवघ्या ३८ वर्षांच्या होत्या. गेल्या काही काळापासून त्या कॅन्सरशी लढा देत होत्या, मात्र अखेरीस आजारावर मात करता आली नाही.

अभिनय प्रवास

प्रिया मराठे यांनी २००६ मध्ये या सुखांनो या या मालिकेतून छोट्या पडद्यावर पदार्पण केले. त्यानंतर त्यांनी मराठी मालिकांमध्ये चार दिवस सासूचे, तू तिथे मी, तुझेच मी गीत गात आहे यांसारख्या मालिकांमध्ये प्रभावी भूमिका केल्या. हिंदी मालिकांमध्ये कसम से, पवित्र रिश्ता आणि बडे अच्छे लगते है या लोकप्रिय कार्यक्रमांमधून त्या प्रेक्षकांच्या मनात घर करून गेल्या.

चित्रपटसृष्टीतदेखील त्यांनी आपले स्थान निर्माण केले. विघ्नहर्ता महागणपती (२०१६) आणि किरण कुलकर्णी व्हर्सेस किरण कुलकर्णी (२०१६) या मराठी चित्रपटांत त्यांच्या भूमिका प्रेक्षकांनी आवडल्या.

वैयक्तिक आयुष्य

२३ एप्रिल १९८७ रोजी ठाण्यात जन्मलेल्या प्रियाने २४ एप्रिल २०१२ रोजी अभिनेता शंतनु मोघे (अभिनेता श्रीकांत मोघे यांचा मुलगा) याच्यासोबत विवाह केला. लग्नानंतरही त्यांनी अभिनय क्षेत्रात सक्रिय राहून अनेक संस्मरणीय भूमिका साकारल्या.

आजाराशी संघर्ष

काही वर्षांपूर्वी प्रियाला कॅन्सरचे निदान झाले होते. उपचार सुरू असतानाही त्यांनी धैर्याने आजाराशी सामना केला. मात्र आजाराने अखेरीस पुन्हा जोर धरला आणि मीरारोड येथील त्यांच्या निवासस्थानी त्यांनी अखेरचा श्वास घेतला.

कलाविश्वातील प्रतिक्रिया

प्रिया मराठे यांच्या निधनाची वार्ता समजताच संपूर्ण कलाविश्वावर शोककळा पसरली. चाहत्यांनी व सहकलाकारांनी सोशल मीडियावरून श्रद्धांजली वाहिली. अभिनेता सुबोध भावे यांनी भावनिक शब्दांत त्यांना आठवत लिहिले की, “माझी बहीण लढवय्या होती, पण कॅन्सरच्या लढाईत ती हरली.”

प्रिया मराठे या मराठी-हिंदी मालिकांतून प्रेक्षकांच्या मनात कायमस्वरूपी घर करून गेल्या. त्यांचा अभिनय प्रवास, त्यांची जिद्द आणि कलेप्रती असलेलं प्रेम हे नेहमीच स्मरणात राहील. त्यांच्या अकाली निधनाने कलाविश्वातील एक उज्वल तारा हरपला आहे.

“मराठा आरक्षण आंदोलन: उपसमिती जरांगे पाटील यांच्याशी चर्चा करणार – विखे पाटील”

Dainik Janmat
-
0
“मराठा आरक्षण आंदोलन: उपसमिती जरांगे पाटील यांच्याशी चर्चा करणार – विखे पाटील”

मुंबई, ३० ऑगस्ट २०२५: मराठा आरक्षणाच्या मुद्द्यावर सुरू असलेल्या आंदोलनाच्या पार्श्वभूमीवर आज उपसमितीच्या बैठकीत सविस्तर चर्चा झाली. या बैठकीत सर्व सदस्य उपस्थित होते, तर काही नेते ऑनलाइन सहभागी झाले. याबाबत बोलताना महसूल मंत्री राधाकृष्ण विखे पाटील यांनी सकारात्मक भूमिका व्यक्त केली आणि आंदोलन सोडवण्यासाठी न्यायमूर्ती शिंदे यांच्यासह समितीचे सदस्य आंदोलक नेते मनोज जरांगे पाटील यांच्याशी चर्चा करणार असल्याची माहिती दिली.

विखे पाटील यांनी माध्यमांना दिलेल्या प्रतिक्रियेत सांगितले की, “आज उपसमितीच्या बैठकीमध्ये आम्ही सर्व सदस्य उपस्थित होतो. सन्माननीय चंद्रकांत दादा पाटील, माननीय आशिष शेलारजी, शिवेंद्रजी आणि शंभूराजे ऑनलाइन होते. उदय सामंत होते. आम्ही सगळ्या सदस्यांनी आणि समितीच्या बरोबर आमचे समवेत न्यायमूर्ती शिंदे साहेब आणि बाकी सर्व अधिकारी होते. सविस्तर चर्चा झाली सगळ्या मुद्द्यांवर आणि अतिशय एक सकारात्मक भूमिका आमची सर्वांची आहे आणि सरकारची सुद्धा या बाबतीमध्ये या प्रश्नाची सोडवणूक झाली पाहिजे हीच भूमिका आहे.”

आंदोलकांच्या गैरसोयीबाबत बोलताना त्यांनी सांगितले की, मुंबईत आलेल्या आंदोलकांसाठी प्रशासनाने योग्य व्यवस्था केली आहे. “आता पाऊस जास्त होता तरी नंतर रात्री माननीय मुख्यमंत्र्यांच्या चर्चा झाली आणि मग मला वाटत आता बऱ्यापैकी तिथे लाईटची, पाण्याची सोय करण्यात आली. त्या ठिकाणी सॅनिटेशन वाढवण्यात आलय. ज्या ठिकाणी जागा उपलब्ध आहे मग तिथे खड्डे भरावेत त्यामुळे आंदोलन जे आहे त्यांना त्रास होणार नाही,” असे ते म्हणाले. महापालिका आयुक्तांना याबाबत सूचना देण्यात आल्याचेही त्यांनी नमूद केले.

जरांगे पाटील यांच्या आक्रमक भूमिकेबाबत विचारले असता विखे पाटील म्हणाले, “न्यायमूर्ती शिंदे साहेब आणि आमचे विभागीय आयुक्त त्यांच्याशी चर्चा करायला जाणार आहे आणि त्यांनी उपस्थित केलेल्या मुद्द्यां संदर्भात आम्ही जी आज चर्चा केली आणि काही निर्णय केलेत त्याची माहिती त्यांना देतील.” ते पुढे म्हणाले की, चर्चेनंतर आणखी मुद्दे उपस्थित झाल्यास समिती पुन्हा बसणार आहे.

महायुतीच्या एकतेसंदर्भात बोलताना त्यांनी विरोधाभास नाकारला. “महायुती म्हणून आमची भूमिका एकत्रच आहे. आम्ही सगळे एकत्रच आहोत. आता काही बाबतीमध्ये काही त्या स्थानिक परिस्थितीरूप काही मंडळी त्यांच्या स्टेजवर गेले त्यांना त्यांच्याशी चर्चा केली. आणि शेवटी सर्वांचा एकच भूमिका आहे की हा प्रश्न सुटला पाहिजे,” असे ते म्हणाले. राष्ट्रवादीच्या आमदारांच्या भूमिकेबाबतही ते म्हणाले की, सर्वजण एकत्र आहेत आणि राजकारण करण्यापेक्षा प्रश्न सोडवण्यावर भर आहे.

विरोधी पक्षाच्या टीकेबाबत विखे पाटील यांनी संजय राऊत यांना प्रत्युत्तर देत म्हटले, “संजय रावतांच्या शिफारशीची काय सूचनांची आम्हाला आवश्यकता नाहीये. आमची कमिटी त्या समितीसाठी सक्षम आहे.” तसेच महाविकास आघाडीच्या काळात हा प्रश्न का सोडवला नाही, असा प्रश्नही त्यांनी उपस्थित केला. रोहित पवार यांच्या आरोपांबाबत ते म्हणाले, “अशी कुठे वीज तोडलेली नाहीय. मागे माननीय हायकोर्टाचा एक निर्णय आहे की आझाद मैदाना सहा नंतर देऊ नये तिथं लाईटची व्यवस्था होत नाही. तरी आपण पर्याय व्यवस्था म्हणून तिथ त्या ठिकाणी विजेची रात्र केली.”

आंदोलनाच्या पार्श्वभूमीवर मुंबईतील वाहतूक आणि आर्थिक प्रभावाबाबत बोलताना विखे पाटील म्हणाले की, आंदोलन हा प्रत्येकाचा लोकशाही अधिकार आहे आणि मराठा समाजाच्या भावनांचा आदर करणे गरजेचे आहे. “प्रत्येकाचा अधिकार आहे लोकशाही त्यांना दिलेला अधिकार आहे ते आंदोलन करतायत. मला वाटतं त्यांची भूमिका आहे शासन ऐकून घेत त्यापेक्षा त्यांच्या भावनेचा आदर करण्याची गरज आहे,” असे ते म्हणाले. तसेच आंदोलन शांततेने चालू राहावे आणि समाजकंटकांनी त्यात हस्तक्षेप करू नये, असे आवाहनही त्यांनी केले.

या चर्चेनंतर न्यायमूर्ती शिंदे यांच्या नेतृत्वाखालील शिष्टमंडळ जरांगे पाटील यांच्याशी भेट घेऊन मुद्द्यांवर तोडगा काढण्याचा प्रयत्न करेल, अशी अपेक्षा आहे. मराठा आरक्षणाच्या मुद्द्यावर ओबीसीमधून आरक्षण देण्याबाबत विखे पाटील यांनी सविस्तर चर्चेनंतरच निर्णय घेतला जाईल, असे स्पष्ट केले.

ऊर्जा मंत्रालयाने प्रसिद्ध केला ‘राज्य ऊर्जा कार्यक्षमता निर्देशांक 2024’: महाराष्ट्र, आंध्र प्रदेश, आसाम आणि त्रिपुरा अव्वल

Dainik Janmat
-
0
ऊर्जा मंत्रालयाने प्रसिद्ध केला ‘राज्य ऊर्जा कार्यक्षमता निर्देशांक 2024’: महाराष्ट्र, आंध्र प्रदेश, आसाम आणि त्रिपुरा अव्वल

नवी दिल्ली, 29 ऑगस्ट 2025

ऊर्जा मंत्रालयाने ब्युरो ऑफ एनर्जी एफिशियन्सी (BEE) आणि अलायन्स फॉर एनर्जी एफिशियन्सी इकॉनॉमी (AEEE) यांच्या संयुक्त विद्यमाने ‘राज्य ऊर्जा कार्यक्षमता निर्देशांक (SEEI) 2024’ प्रसिद्ध केला आहे. या निर्देशांकात आर्थिक वर्ष 2023-24 मधील भारतातील 36 राज्ये आणि केंद्रशासित प्रदेशांच्या ऊर्जा कार्यक्षमता कामगिरीचे मूल्यांकन करण्यात आले आहे. यंदाच्या सहाव्या आवृत्तीत सात प्रमुख मागणी क्षेत्रांवर आधारित 66 निर्देशकांसह एक विस्तृत आणि अंमलबजावणी-केंद्रित चौकट तयार करण्यात आली आहे. यामुळे ऊर्जा कार्यक्षमता क्षेत्रात राज्य-स्तरीय डेटा संकलन, व्यवस्थापन आणि सर्वोत्तम पद्धतींना प्रोत्साहन देण्यास चालना मिळणार आहे.

प्रकाशन समारंभ आणि महत्त्व

ऊर्जा मंत्रालयाचे अतिरिक्त सचिव आणि BEE चे महासंचालक आकाश त्रिपाठी यांनी नवी दिल्लीत आयोजित एका समारंभात SEEI 2024 चे प्रकाशन केले. यावेळी बोलताना त्रिपाठी म्हणाले, “भारताचे ऊर्जा संक्रमण हे केवळ हवामान बदलाच्या आव्हानांना तोंड देण्याचे साधन नसून, नवोन्मेष, लवचिकता आणि समावेशक विकासाला चालना देणारी एक संधी आहे. 2070 पर्यंत निव्वळ शून्य उत्सर्जन आणि 2030 पर्यंत उत्सर्जन तीव्रतेत 45% कपात करण्याच्या उद्दिष्टाच्या दिशेने वाटचाल करताना ऊर्जा कार्यक्षमता हा एक महत्त्वाचा आधारस्तंभ आहे. SEEI 2024 हा या प्रवासातील एक महत्त्वाचा टप्पा आहे, जो प्रत्यक्ष अंमलबजावणी आणि मोजता येण्याजोग्या प्रगतीवर लक्ष केंद्रित करतो.”

निर्देशांकाची रचना आणि वर्गीकरण

SEEI 2024 मध्ये इमारती, उद्योग, नगरपालिका सेवा, वाहतूक, शेती, वीज वितरण कंपन्या आणि विविध क्षेत्रातील उपक्रम या सात मागणी क्षेत्रांचा समावेश आहे. राज्यांचे त्यांच्या एकूण अंतिम ऊर्जा वापर (Total Final Energy Consumption – TFEC) नुसार चार गटांत वर्गीकरण करण्यात आले आहे:

  • गट 1: > 15 MToE (मिलियन टन ऑफ ऑइल इक्विव्हॅलेंट)
  • गट 2: 5-15 MToE
  • गट 3: 1-5 MToE
  • गट 4: < 1 MToE

प्रत्येक गटातील सर्वोत्तम कामगिरी करणारी राज्ये खालीलप्रमाणे आहेत:

  • गट 1: महाराष्ट्र
  • गट 2: आंध्र प्रदेश
  • गट 3: आसाम
  • गट 4: त्रिपुरा

राज्यांचे मूल्यांकन गुणांच्या आधारे चार श्रेणींमध्ये विभागण्यात आले:

  • फ्रंट रनर्स (60% पेक्षा जास्त गुण)
  • अचिव्हर्स (50-60% गुण)
  • कन्टेंडर्स (30-50% गुण)
  • एस्पायरन्टस (30% पेक्षा कमी गुण)

SEEI 2023 च्या तुलनेत यंदा फ्रंट रनर राज्यांची संख्या सातवरून पाचवर घसरली आहे. आंध्र प्रदेश, कर्नाटक, महाराष्ट्र, तेलंगणा आणि तामिळनाडू यांनी आपले स्थान कायम ठेवले आहे. आसाम आणि केरळ यांनी अचिव्हर्स श्रेणीत स्थान मिळवले, तर हरियाणा, पंजाब, राजस्थान, ओडिशा आणि उत्तर प्रदेश यांना कन्टेंडर्स श्रेणीत स्थान मिळाले.

क्षेत्रनिहाय प्रगती

SEEI 2024 मध्ये विविध क्षेत्रांमधील उल्लेखनीय प्रगती अधोरेखित करण्यात आली आहे:

  1. इमारती:
  • 24 राज्यांनी ऊर्जा संवर्धन इमारत संहिता (ECBC) 2017 अधिसूचित केली आहे.
  • 20 राज्यांनी ही संहिता नगरपालिका उपनियमांमध्ये समाविष्ट केली आहे, ज्यामुळे ऊर्जा-कार्यक्षम इमारतींच्या बांधकामाला चालना मिळाली आहे.
  1. उद्योग:
  • 10 राज्यांनी लघु आणि मध्यम उद्योगांसाठी (MSME) ऊर्जा कार्यक्षमता धोरणे स्वीकारली आहेत.
  • यामुळे औद्योगिक क्षेत्रात ऊर्जा वापर कमी करणे आणि शाश्वत उत्पादन पद्धतींना प्रोत्साहन मिळाले आहे.
  1. नगरपालिका सेवा:
  • 25 राज्यांनी हवामान कृती योजना किंवा उष्णता कृती योजना विकसित केल्या आहेत.
  • 12 राज्यांनी राज्य नियुक्त संस्था आणि शहरी स्थानिक संस्थांमधील सहकार्याला प्रोत्साहन दिले आहे, ज्यामुळे शहरी भागात शाश्वत पायाभूत सुविधांचा विकास होत आहे.
  1. वाहतूक:
  • 31 राज्यांनी विद्युत गतिशीलता धोरणे लागू केली आहेत, ज्यामुळे इलेक्ट्रिक वाहनांचा (EV) अवलंब वाढला आहे.
  • 14 राज्यांनी इमारतींमध्ये EV चार्जिंग पायाभूत सुविधा अनिवार्य केल्या आहेत, ज्यामुळे हरित वाहतुकीला चालना मिळाली आहे.
  1. शेती:
  • 13 राज्यांनी एकात्मिक शीतगृह साखळी आणि सौरऊर्जेवर चालणाऱ्या कृषी पंपांना प्रोत्साहन दिले आहे.
  • केरळने विशेष उल्लेखनीय कामगिरी केली असून, 74% ऊर्जा-कार्यक्षम किंवा सौरऊर्जेवर चालणारे कृषी पंप स्वीकारले आहेत.

महाराष्ट्राचे यश

महाराष्ट्राने गट 1 मध्ये अव्वल स्थान मिळवले आहे, जे राज्याच्या ऊर्जा कार्यक्षमता क्षेत्रातील सातत्यपूर्ण प्रयत्नांचे द्योतक आहे. इमारती, उद्योग आणि वाहतूक क्षेत्रातील धोरणात्मक उपाययोजनांमुळे महाराष्ट्राने ऊर्जा वापर व्यवस्थापन आणि शाश्वत विकासात आघाडी घेतली आहे.

निर्देशांकाचे महत्त्व

SEEI 2024 हा केवळ राज्यांची कामगिरी मोजण्याचे साधन नसून, ऊर्जा कार्यक्षमतेसाठी स्पर्धात्मक वातावरण निर्माण करणारा एक उपक्रम आहे. यामुळे राज्यांना त्यांच्या धोरणांचे मूल्यांकन करणे, कमतरता ओळखणे आणि सर्वोत्तम पद्धतींचा अवलंब करणे शक्य होते. तसेच, भारताच्या निव्वळ शून्य उत्सर्जनाच्या उद्दिष्टाला गती देण्यासाठी हा निर्देशांक महत्त्वाची भूमिका बजावतो.

पुढील दिशा

SEEI 2024 च्या प्रकाशनाने ऊर्जा कार्यक्षमता क्षेत्रात भारताच्या प्रगतीचा एक स्पष्ट आराखडा मांडला आहे. भविष्यात, अधिक राज्यांनी फ्रंट रनर श्रेणीत स्थान मिळवण्यासाठी आणि ऊर्जा कार्यक्षम धोरणांचा अवलंब वाढवण्यासाठी प्रयत्न करणे आवश्यक आहे. यामुळे भारताच्या हरित भविष्याला बळकटी मिळेल आणि जागतिक हवामान उद्दिष्टांमध्ये देशाचे योगदान वाढेल.

अंगणवाडी पाडली; दोघांवर गुन्हा दाखल

Dainik Janmat
-
0
अंगणवाडी पाडली; दोघांवर गुन्हा दाखल

येरमाळा (ता. कळंब) :
येरमाळा येथील अंगणवाडीची खोली कोणतीही शासकीय परवानगी किंवा निर्लेखन मंजुरी न घेता पाडल्याप्रकरणी ग्रामपंचायत अधिकारी आणि आणखी एका व्यक्तीवर गुन्हा दाखल करण्यात आला आहे.

मिळालेल्या माहितीनुसार, दि. 09 ऑक्टोबर 2024 रोजी सकाळी 11 वाजता येरमाळा गावातील गट क्रमांक 377/254 मधील अंगणवाडीची खोली पाडण्यात आली. सदर अंगणवाडी ही शासनाच्या नावावर चालू असून, कोणतीही प्रक्रिया न राबविता खोली पाडल्यामुळे शासनाचे तब्बल 1,50,000 रुपये इतके नुकसान झाले आहे.

या संदर्भात विस्तार अधिकारी पंचायत समिती कळंब दत्तात्रय त्रंबक साळुंके (वय 55, रा. गौर-वाघोली, ता. कळंब) यांनी 28 ऑगस्ट 2025 रोजी येरमाळा पोलिस ठाण्यात तक्रार दिली. त्यानुसार आरोपी सौ. मंदाकिनी आबासाहेब बारकुल (रा. येरमाळा) आणि राजेंद्र एकनाथ हांडे (ग्रामपंचायत अधिकारी, येरमाळा) यांच्याविरुद्ध भा.न्या.सं. कलम 324(3), 324(5), भूमी महसूल कायदा कलम 50, 52 तसेच सार्वजनिक संपत्ती हानी प्रतिबंध कायदा कलम 3 अन्वये गुन्हा नोंदवला आहे.

या प्रकरणाचा पुढील तपास येरमाळा पोलिस ठाण्याचे पथक करीत आहे.

ताकविकी परिसरातील शेतकऱ्यांची मागणी : शेतीच्या नुकसानीसाठी हेक्टरमागे 50 हजार रुपये मदत द्यावी

Dainik Janmat
-
0
ताकविकी परिसरातील शेतकऱ्यांची मागणी : शेतीच्या नुकसानीसाठी हेक्टरमागे 50 हजार रुपये मदत द्यावी

धाराशिव तालुका │ धाराशिव तालुक्यातील ताकविकी परिसरातील शेतकऱ्यांनी यंदाच्या अतिवृष्टीमुळे झालेले प्रचंड शेती नुकसान लक्षात घेऊन हेक्टरमागे 50 हजार रुपये मदतीची मागणी केली आहे. या संदर्भात ग्रामस्थांनी ग्रामसभेत ठराव घेऊन शासनाकडे प्रस्ताव पाठवण्याची विनंती सरपंच व ग्रामसेवकांकडे केली आहे.

मे महिन्यापासून ताकविकी परिसरात संततधार पाऊस सुरू असल्याने शेतकऱ्यांच्या पिकांवर रोगांचा प्रादुर्भाव झाला. शेतकऱ्यांनी मोठ्या खर्चाने औषधोपचार, खते, बियाणे यावर खर्च केला; तरीही सततच्या पावसामुळे पिके उभे राहिले नाहीत. परिणामी शेतकऱ्यांच्या हाती काहीही न लागण्याची वेळ आली आहे.

ग्रामस्थांचे म्हणणे आहे की, “आम्ही कर्ज काढून शेती केली, परंतु अतिवृष्टीमुळे सर्व पिके हातची गेली. त्यामुळे शासनाने तात्काळ मदत जाहीर करून प्रत्यक्ष मदत पोहोचवावी. अन्यथा शेतकऱ्यांना मोठ्या आर्थिक संकटाला सामोरे जावे लागेल.”

या मागणीसाठी ग्रामस्थांनी सरपंच आणि ग्रामसेवक यांच्याकडे लेखी निवेदन दिले आहे. यात शासनाकडे ठराव पाठवावा अशी विनंती करण्यात आली आहे.

या निवेदनावर जेष्ठ नागरिक नागनाथ सिंगठाकूर, बलुसिंग अरणकर, सुखसिंग बायस, महादेव यादव, प्रतापसिंग राजपूत, श्रीधर तरंगे, कोंडीबा तरंगे, सोपान यादव, जनता सिंग ठाकूर, श्रीदेवी ठाकूर, दिलीपसिंग ठाकूर, छानू ढेपे, गुलाब शेख, गणूसिंग बायस, वैभव बायस, संभाजी सूर्यवंशी, विमल सूर्यवंशी, बालाजी बायस, मारुती जाधव, रोहित सूर्यवंशी, सोहेल तांबोळी, महेश बीटलकर, हनुमंतसिंग सुरतबन्सी, फारुक शेख, नारायण यादव, लिंबराज यादव, शैलेश प्रकाशसिंग ठाकूर, सुलोचना ठाकूर, नसरुद्दीन वाडकर, गिरीधरसिंह बायस, मारुती यादव, शंकर देवकर, शिवचरण ठाकूर, धरमसिंग ठाकूर आदींसह मोठ्या संख्येने ग्रामस्थांच्या सह्या आहेत.

ग्रामस्थांच्या या ठरावाकडे शासनाने सकारात्मक दृष्टीने पाहून तात्काळ मदत जाहीर करावी, अशी मागणी केली जात आहे.

धाराशिव जिल्ह्यात चोरीच्या तीन घटना : बँकेतून 19 लाखांची रक्कम, शेळ्या व घरफोडीत सोनं-रोख लंपास

Dainik Janmat
-
0
धाराशिव जिल्ह्यात चोरीच्या तीन घटना : बँकेतून 19 लाखांची रक्कम, शेळ्या व घरफोडीत सोनं-रोख लंपास

धाराशिव जिल्ह्यात चोरीच्या घटना घडल्यामुळे परिसरात एकच खळबळ उडाली आहे. उमरगा, शिराढोण व नळदुर्ग या तीन वेगवेगळ्या पोलीस ठाण्यांमध्ये चोरी व घरफोडीचे गुन्हे नोंदवले गेले असून लाखोंचा माल चोरट्यांनी लंपास केला आहे.

उमरगा – ग्रामीण बॅकेवर डाका
दि. 26 ऑगस्ट 2025 रोजी पहाटे 01.00 ते 04.15 वाजेच्या सुमारास उमरगा तालुक्यातील नाईचाकुर येथील महाराष्ट्र ग्रामीण बॅक शाखेवर अज्ञात तिघा चोरट्यांनी धाड टाकली. बॅकेच्या चॅनेल गेटची कुलुपे तोडून आत प्रवेश करत त्यांनी तिजोरी गैस कटरने कापली व तब्बल ₹19,31,349 किंमतीचा रोख माल चोरून नेला. शाखाधिकारी अशिष नागनाथ बनसोडे (वय 30, रा. चिवरी, ता. तुळजापूर) यांनी दिलेल्या फिर्यादीवरून उमरगा पोलीस ठाण्यात भा.न्या.सं. कलम 331(1), 305(अ)(इ), 3(5) अंतर्गत गुन्हा नोंदविण्यात आला आहे.

शिराढोण – शेळ्या चोरीचा प्रकार उघड
कळंब तालुक्यातील ताडगाव येथील उत्रेश्वर रामा जाधवर (वय 32) यांचे घरासमोरून 22 ऑगस्टच्या रात्री 22.00 वाजता ते 23 ऑगस्टच्या पहाटे 05.30 वाजेच्या दरम्यान त्यांच्या तीन शेळ्या अंदाजे ₹30,000 किंमतीच्या चोरून नेण्यात आल्या. फिर्यादीनंतर शिराढोण पोलीसांनी तपास सुरू केला व संशयित आरोपींपैकी शिवराम सुभाष मुंडे याच्याकडून शेळ्या ताब्यात घेऊन चौकशी केली असता त्याने कबुली दिली की, पिंटु माणिक काळे (रा. शिराढोण पारधी पिंडी), दत्ता सिताराम काळे व स्वतः शिवराम मुंडे (दोघे रा. गोविंदपूर, ता. कळंब) यांनी मिळून ही चोरी केली. या प्रकरणी शिराढोण पोलीस ठाण्यात भा.न्या.सं. कलम 303(2) अंतर्गत गुन्हा नोंदविण्यात आला असून पुढील तपास सुरू आहे.

नळदुर्ग – घरफोडीत सोनं व रोख लंपास
तुळजापूर तालुक्यातील खानापूर गावातील शैलाबाई चंद्रकांत लुगडे (वय 66) यांच्या उघड्या घरात अज्ञात चोरट्याने प्रवेश करून स्टीलच्या डब्यात ठेवलेले सोन्याचे दागिने व रोख मिळून ₹69,000 किंमतीचा माल चोरून नेला. ही घटना 22 ऑगस्टच्या रात्री 21.00 ते 23 ऑगस्टच्या पहाटे 03.00 वाजेदरम्यान घडली. फिर्यादीनंतर नळदुर्ग पोलीस ठाण्यात भा.न्या.सं. कलम 305 अंतर्गत गुन्हा नोंदविण्यात आला आहे.

या सर्व घटनांमुळे धाराशिव जिल्ह्यातील नागरिकांमध्ये भीतीचे वातावरण निर्माण झाले असून पोलीसांनी चोरट्यांचा शोध अधिक गतीने सुरू केला आहे. तीन वेगवेगळ्या पोलीस ठाण्यांत मोठ्या प्रमाणावर मालमत्तेविरुद्ध गुन्हे नोंदवल्याने जिल्हा पोलीस यंत्रणेची कसोटी लागली आहे.

खोट्या विवाहाच्या आमिषाने तरुणाची १.२० लाखांची फसवणूक

Dainik Janmat
-
0
खोट्या विवाहाच्या आमिषाने तरुणाची १.२० लाखांची फसवणूक

धाराशिव :
धाराशिव शहर पोलीस ठाण्यात खोट्या विवाहाच्या आमिषाने तरुणाची तब्बल १ लाख २० हजार रुपयांची फसवणूक केल्याप्रकरणी पाच जणांविरुद्ध गुन्हा दाखल करण्यात आला आहे.

फिर्यादी बाळासाहेब हरिभाऊ मोरे (वय ३३, रा. वडगाव सी., ता. व जि. धाराशिव) यांनी दिलेल्या तक्रारीनुसार, आरोपींनी विवाहाचे आमिष दाखवून त्यांचा खोटा विवाह लावून दिला. या विवाहाच्या नावाखाली फिर्यादीकडून एकूण रु. १,२०,००० इतकी रक्कम घेतली. मात्र नंतर हा विवाह फसवा व बनावट असल्याचे उघड झाले.

ही घटना २३ ऑगस्ट २०२५ रोजी संध्याकाळी सात वाजल्यापासून ते २६ ऑगस्ट २०२५ रोजी सकाळी आठ वाजेपर्यंत वडगाव सी. परिसरात घडली.

या गुन्ह्यात आरोपी म्हणून –

  • युवराज पाटील, दशरथ्ज्ञ जहागीरदार (दोघे रा. पाटण, ता. पाटण, जि. सातारा),
  • शांताबाई (रा. बैलबाजार, भारत पेट्रोल पंपाजवळ, कराड),
  • अविनाश मिलींद साळवे (रा. गणेश नगर, वडाळा ईस्ट, मुंबई, मुळ रा. देवळी, ता. मानगाव, जि. सातारा)
  • व त्याची पत्नी दिपाली अविनाश साळवे (रा. पाटण, ता. पाटण, जि. सातारा)

यांचा समावेश आहे.

फिर्यादीच्या प्रथम खबरेवरून धाराशिव शहर पोलीस ठाण्यात भारतीय न्याय संहिता कलम ३१६(२), ३१८(४), व ३(५) अन्वये गुन्हा दाखल करण्यात आला असून पुढील तपास पोलीस करत आहेत.

लोहाऱ्यात धक्कादायक घटना : घरगुती वादातून आईचा खून

Dainik Janmat
-
0
लोहाऱ्यात धक्कादायक घटना : घरगुती वादातून आईचा खून

लोहारा (जि. धाराशिव) – लोहारा शहरात कौटुंबिक वादातून आईचा खून झाल्याची धक्कादायक घटना समोर आली आहे. या प्रकरणी मुलगा आणि सुनाविरोधात खुनाचा गुन्हा दाखल करण्यात आला आहे.

मिळालेल्या माहितीनुसार, दि. 25 ऑगस्ट 2025 रोजी दुपारी 12 ते 1 वाजण्याच्या सुमारास उमाबाई सुरेश रणशुर (वय 55, रा. लोहारा) यांना घरगुती वादातून आरोपी सौदागर सुरेश रणशुर व त्याची पत्नी पूजा सौदागर रणशुर (दोघे रा. लोहारा) यांनी शिवीगाळ करून लाथाबुक्क्यांनी मारहाण केली. त्यानंतर उमाबाईंना ठार मारून, साडीने गळफास लावून आत्महत्येचा बनाव केला, असा आरोप आहे.

या घटनेची फिर्याद महेश सुरेश रणशुर (वय 35, रा. लोहारा, ह.मु. शिवहरी ग्रीन सिटी, वापी, जि. वलसाड, गुजरात) यांनी लोहारा पोलीस ठाण्यात नोंदवली. त्यांच्या तक्रारीवरून पोलिसांनी भा.न्या.सं. कलम 103(1), 352 तसेच 3(5) अन्वये गुन्हा नोंदवला आहे.

पोलिसांनी सांगितले की, घटनेनंतर उमाबाई रणशुर यांचा मृतदेह गळफास लावलेल्या अवस्थेत आढळला. परंतु चौकशीतून मारहाण व खुनाचे स्पष्ट झाले. या प्रकरणाचा पुढील तपास लोहारा पोलीस करत आहेत.

या घटनेमुळे लोहारा परिसरात मोठी खळबळ उडाली आहे.

रास्त भाव दुकानदारांच्या मार्जिनमध्ये वाढ; सरकारचा निर्णय तत्काळ लागू

Dainik Janmat
-
0
रास्त भाव दुकानदारांच्या मार्जिनमध्ये वाढ; सरकारचा निर्णय तत्काळ लागू

मुंबई – राज्यातील सार्वजनिक वितरण व्यवस्थेतून (PDS) अन्नधान्याचे वाटप करणाऱ्या रास्त भाव दुकानदारांच्या मार्जिनमध्ये वाढ करण्याचा महत्त्वाचा निर्णय महाराष्ट्र शासनाने घेतला आहे.

अन्न, नागरी पुरवठा व ग्राहक संरक्षण विभागाने मंगळवारी (दि. २६ ऑगस्ट २०२५) जारी केलेल्या शासन निर्णयानुसार, दुकानदारांना मिळणारे सध्याचे ₹१५०/- प्रति क्विंटल (₹१५००/- प्रति मेट्रिक टन) मार्जिन आता वाढवून ₹१७०/- प्रति क्विंटल (₹१७००/- प्रति मेट्रिक टन) करण्यात आले आहे.

२०१७ मध्ये निश्चित करण्यात आलेल्या जुन्या दरानुसार दुकानदारांना केंद्र शासनाचा ₹४५/- व राज्य शासनाचा ₹१०५/- असा मिळून एकूण ₹१५०/- मार्जिन मिळत होते. वाढीव खर्च लक्षात घेऊन रास्त भाव दुकानदार संघटनांकडून सातत्याने मागणी केली जात होती. त्यानंतर १२ ऑगस्ट २०२५ रोजी झालेल्या राज्य मंत्रिमंडळ बैठकीत या वाढीला मंजुरी देण्यात आली.

सुमारे ५३,९१० रास्त भाव दुकानदारांना या निर्णयाचा थेट लाभ होणार असून वाढीव खर्चाची तरतूद संबंधित अर्थसंकल्पीय शिर्षाखाली करण्यात आली आहे. शासन निर्णयानुसार ही वाढ तत्काळ लागू होणार आहे.

 

मोहा येथे दोन समाजामध्ये तणाव, तणावाचे रूपांतर दंगलीत व दगडफेकीत

Dainik Janmat
-
0
मोहा येथे दोन समाजामध्ये तणाव, तणावाचे रूपांतर दंगलीत व दगडफेकीत

दगडफेकीत अनेक पोलीस व ग्रामस्थ जखमी,  वरिष्ठ पोलीस अधिकारी यांच्या सतर्कतेने तणावपूर्ण शांतता


मोहा – दिनांक 25 ऑगस्ट रोजी सोमवारच्या सांयंकाळी
पारधी समाजातील व्यक्तीचे निधन झाले असता. दफन करण्यासाठी त्यांनी त्यांच्या स्मशान भूमिमध्ये घेऊन गेले परंतु वनविभागाने रेकॉर्डली स्मशानभूमीसाठी दिलेली पाच गुंठे जागा सोडून इतर जागेत दफन केले. आणि त्याच जागेत मोहा गावाचा सिमोलंघनाचा कार्यक्रम होत असतो. पारधी समाजाने स्मशानभूमीची जागा सोडून ज्याठिकाणी कार्यक्रम होतो त्याच ठिकाणी दफन केले. आणि इथेच दोन समाजातील तेढ निर्माण होण्याचे कारण बनले.
  
  

दंगलीचे कारण ठरले स्मशानभूमीची जमीन

वनविभागाच्या आखत्यारीत असलेली जमीनी पैकी कागदोपत्री पाच गुंढे जमीन ही पारधी समाजाच्या स्मशानभूमीसाठी देण्यात आलेली असताना. पारधी समाजाने उर्वरित जागा अतिक्रमित करण्याचा घाट घातल्याचे दिसून आल्याने गावातील नागरिकांनी त्यांना अटकावं केला. त्याला कारणही तसेच आहे. गेली अनेक वर्षांपासून मोहा गावातील सिमोलंघांनाचा कार्यक्रम त्या जागेत होत आहे. आणि त्याच जागेत मयत व्यक्तीचा अंत्यविधी केला त्यामुळे नागरिकांच्या भावना दुखावल्या.
त्यावेळी दोन्ही समाजाने चर्चेअंती नियमानुसार तोडगा काढू असे ठरवून सोमवारची रात्र घालवली. परंतु सोमवारची शांतता ही मंगळवारच्या वादळपूर्वीची शांतता ठरली.

कायदा सुव्यवस्थेसाठी तगडा पोलीस बंदोबस्त

मंगळवारी सकाळी कायदा सुव्यवस्था राखण्यासाठी पोलीस प्रशासनाने चोख बंदोबस्त केला व दोन्ही समाजातील वातावरण निवळण्याचा चांगला प्रयत्न झाला. पोलीस प्रशासन, तहसील प्रशासन व संबंधित विभागाचे वरिष्ठ अधिकारी घटनास्थळी दाखल झाले.
रेकॉर्डनुसार सर्वकाही चालू असताना अचानक पारधी समाजातील काही लोकांनी दगडफेक सुरु केली.
जवळच असलेल्या गलोलीने दगडाचा वर्षाव सुरु केला.
दरम्यान पोलीस प्रशानाने थांबवण्याचा प्रयत्न केला परंतु
दगडाचा वर्षाव व वेग भयानक असल्याने प्रयत्न निष्फळ ठरले. यामध्ये पोलीस प्रशासनाचे अधिकारी व शिपायी
जखमी झाले. तर गावातील नागरिकांची डोकी फुटली, काहींच्या हातांना, पायांना, इजा झाल्या. जखमीवर गावातीलच आरोग्य केंद्रात उपचार केले.
    

सध्या मोहा येथे तणावपूर्ण शांतता


दुपारी मोहा गावात दंगलीचे स्वरूप आले होते. परंतु सर्व परिस्थितीचे गांभीर्य लक्षात घेऊन पोलीस प्रशासनाने अधिकची कुमक मागवून घेतली. व परिस्थिती आटोक्यात आणण्याचा प्रयत्न केला. सद्या मोहा गावात तणावपूर्ण शांतता आहे.

1...111213...328Page 12 of 328
© Newspaper WordPress Theme by TagDiv