नावात ‘मारुती’ असल्यानं कोणी उड्डाण घेतलं, तर त्यात नवल नाही! पण वर्दीतला माणूस जर खाकीच्या शपथेऐवजी लाचखोरीच्या वाटेवर निघाला, तर तो दिवस दूर नसतो, जेव्हा त्याच्या मागे हातात बडगा घेऊन आपलेच सहकारी धावत असतात! धाराशिव ग्रामीणचे पोलीस निरीक्षक मारोती शेळके यांना लाचलुचपत प्रतिबंधक विभागाने रंगेहात पकडलं, पण पकडलं तरी काय झालं? शेळके साहेबांनी आपली इज्जत वाचवण्यासाठी थेट पळ काढला! मात्र पळून सुटावं तर शप्पथ! खाकीवाल्यांनी पाठलाग करत शेवटी लेडीज क्लबपर्यंत त्यांचा पाठलाग करून त्यांना पकडलंच!
खरं तर प्रकरण काही साधं नव्हतं. आत्महत्या प्रकरणात आरोपीवर कारवाई न करण्यासाठी १ लाखाची लाच मागितल्याचा आरोप होता. पैशांची डील झाली – थेट ९५ हजारांवर! आणि त्यातही धक्कादायक गोष्ट म्हणजे, ही लाच घेतली गेली एका महिला पोलीस कर्मचाऱ्याच्या हस्ते! हो, सहकारी महिला अंमलदार मुक्ता लोखंडे यांचाही यात सहभाग होता. एकीकडे आत्महत्येसारखा संवेदनशील गुन्हा, दुसरीकडे त्यात लाचखोरीचा काळा हात – हे सगळं ऐकूनच सामान्य माणसाच्या अंगावर शहारे यायला हवेत!
लाचलुचपत विभागाच्या अधिकाऱ्यांनी कारवाई केली. मारोती शेळके आणि मुक्ता लोखंडे या दोघांना रंगेहात पकडून त्यांना कार्यालयात आणण्यात आलं. इथवर सगळं ठिक होतं. पण खरी ड्रामा सुरुवात झाली त्यानंतर! लाचलुचपत कार्यालयात आणल्यानंतर काही क्षणातच शेळके यांनी संधी साधली आणि नजर चुकवत थेट पळ काढला. छत्रपती संभाजी महाराज चौक, आर. पी. कॉलेज रोड, अगदी लेडीज क्लबपर्यंत – धावपळ सुरू झाली. आरडाओरड, सायरन, आणि लोकांची गर्दी… संपूर्ण परिसरात गोष्टी एखाद्या मराठी सिनेमातल्या क्लायमॅक्स सीनसारख्या घडत होत्या!
शेवटी पोलिसांनी त्याला पकडलं आणि दुचाकीवरून पुन्हा कार्यालयात आणलं. भररस्त्यात, सगळ्या शहराच्या नजरेसमोर खाकीचा माज उतरलेला दिसला! ‘उतनार नाही, मातनार नाही’ म्हणणाऱ्याने, शपथ विसरली की काय, असाच प्रश्न शहरवासीयांना पडलाय. सध्या या संपूर्ण घटनेचा सीसीटीव्ही फुटेजही समोर आलाय आणि सोशल मीडियावर याची जोरदार चर्चा सुरू आहे.
- धाराशिव पोलिसांची मोठी कामगिरी : १७ गुन्ह्यांतील कुख्यात आरोपी ‘कुक्या’ अखेर गजाआड
- ट्रॅप मध्ये अडकलेल्या पोलिस निरीक्षकाचे पलायन, सिने स्टाईल पाठलाग करत पकडले
- श्री तुळजाभवानी सैनिक शाळेतील भ्रष्टाचार व मारहाणीप्रकरणी चौकशी करा – शिवसेना तालुकाप्रमुख अमोल जाधव यांची मागणी
- एक लाख रुपयांच्या लाचेची मागणी – पोलिस निरीक्षक व महिला पोलीस कर्मचाऱ्या विरोधात ए.सी.बी.ची कारवाई
- पारगाव हायवेवरील सोनसाखळी चोरी उघडकीस — वाशी पोलिसांचा आठ तासांत तपास, दोन आरोपी अटकेत
