तुळजापूर (प्रतिनिधी):
शिक्षणासाठी जाणाऱ्या एका अल्पवयीन मुलीचा पाठलाग करून, तिला गुंगीचे औषध देऊन अत्याचार केल्याची धक्कादायक घटना तुळजापूर पोलीस ठाण्याच्या हद्दीत उघडकीस आली आहे. आरोपीने पीडितेचे आक्षेपार्ह फोटो काढून तिला लग्नाचे आमिष दाखवले आणि ब्लॅकमेल करण्यास सुरुवात केली. या प्रकरणी तुळजापूर पोलिसांनी २० वर्षीय आरोपीला बेड्या ठोकल्या असून त्याच्यावर ‘पोक्सो’सह विविध कलमान्वये गुन्हा दाखल केला आहे. संबंधित आरोपीकडे आणखी काही व्हिडिओ असून अनेक प्रतिष्ठित महिलांचे संपर्क क्रमांक त्यात असल्याची माहिती आहे मात्र पोलिस प्रशासनाकडून याबाबत अधिकृत माहिती देण्यात आली नसून आरोपीला न्यायालयासमोर हजार केल्यानंतर ही माहिती समोर येणार आहे.
नेमकी घटना काय?
मिळालेल्या माहितीनुसार, पीडित मुलगी तुळजापूर शहरातील एका सायन्स अकॅडमीमध्ये शिकवणीसाठी (क्लासेस) जात होती. याच काळात आरोपी साहिल सलीम शेख (वय २० वर्षे) हा तिचा सतत पाठलाग करत असे. त्याने पीडितेकडे अनेकदा मोबाईल नंबरची मागणी केली, मात्र मुलीने त्याला दाद दिली नाही. त्यानंतर आरोपीने सोशल मीडियाचा वापर करत ‘स्नॅपचॅट’वर (Snapchat) तिला फ्रेंड रिक्वेस्ट पाठवली आणि मेसेज करून जाळ्यात ओढण्याचा प्रयत्न केला.
गुंगीचे औषध देऊन अत्याचार
काही काळानंतर, जुने प्रकरण मिटवून घेण्याच्या बहाण्याने आरोपीने पीडितेशी संवाद साधला. तिला विश्वासात घेऊन तो लातूर येथील बसस्थानक परिसरातील एका कॅफेमध्ये घेऊन गेला. तिथे त्याने पीडितेच्या मँगो ज्यूसमध्ये गुंगीचे औषध मिसळले. मुलगी बेशुद्ध पडल्यानंतर त्याने तिच्यावर लैंगिक अत्याचार केले आणि तिचे आक्षेपार्ह फोटो काढले.
फोटोच्या जोरावर ब्लॅकमेलिंग
अत्याचार केल्यानंतर आरोपी साहिल शेख याने पीडितेच्या फोटोंचा वापर करून तिला ब्लॅकमेल करण्यास सुरुवात केली. तिला लग्नाचे आमिष दाखवून सातत्याने त्रास दिला जात होता. अखेर या मानसिक आणि शारीरिक त्रासाला कंटाळून पीडितेने धाडस करून कुटुंबीयांना हा प्रकार सांगितला.