परंडा (दि. २८ मार्च) : परंडा-सोनारी रोडवरील खानापूर पाटीजवळ शनिवार, दि. २८ मार्च रोजी दुपारी सव्वा दोनच्या सुमारास आयशर टेम्पो आणि मोटारसायकलचा भीषण अपघात झाला. या धडकेत दुचाकीस्वार आश्रुबा मांडवे (रा. कुक्कडगाव, ता. परंडा) यांचा जागीच दुर्दैवी मृत्यू झाला. धडक इतकी जोरात होती की मोटारसायकलचा अक्षरशः चक्काचूर झाला असून, या घटनेमुळे कुक्कडगावसह परिसरावर शोककळा पसरली आहे.
मिळालेल्या माहितीनुसार, आश्रुबा मांडवे हे आपल्या मोटारसायकल (क्र. MH25 BC 9079) वरून एकटेच परंड्याकडे येत होते. दुपारी २:२० च्या सुमारास ते खानापूर पाटीजवळ पोहोचले असता, समोरून येणाऱ्या आयशर टेम्पोने त्यांना जोरदार धडक दिली. संबंधित टेम्पोचे मालक गोविंद वाघ (रा. राळेसांगवी, ता. भूम) हे परंड्याकडून नान्नजजवळ कलिंगड भरण्यासाठी जात होते.
अपघाताची भीषणता इतकी होती की समोरासमोर झालेल्या या धडकेत दुचाकीचा पूर्णपणे चक्काचूर झाला. धडक बसल्यानंतर मांडवे गंभीर जखमी होऊन रस्त्यावर कोसळले आणि त्यांचा जागीच मृत्यू झाला. अपघातानंतर परिसरात बघ्यांची मोठी गर्दी जमली होती.
पोलिसांची कारवाई : घटनेची माहिती मिळताच परंडा पोलीस ठाण्याचे पोलीस निरीक्षक आसाराम चोरमले, पोलीस कॉन्स्टेबल शिंदे आणि क्षीरसागर यांच्या पथकाने तात्काळ घटनास्थळी धाव घेतली. पोलिसांनी घटनेचा पंचनामा करून मृतदेह ताब्यात घेतला आणि उत्तरीय तपासणीसाठी पाठवला. अपघातास कारणीभूत ठरलेला आयशर टेम्पो आणि चालकाला पोलिसांनी ताब्यात घेतले असून, याप्रकरणी पुढील कायदेशीर कारवाई सुरू आहे.
- परंडा-सोनारी रोडवर भीषण अपघात; आयशर टेम्पोच्या धडकेत कुक्कडगावचा मोटारसायकलस्वार जागीच ठार
- ईट नगरीत कडाडणार शड्डूचा आवाज! खोपेश्वर महादेवाच्या पावन भूमीत रंगणार कुस्तीचा महासंग्राम
- विभागीय आयुक्त खोटे? अनंत कुंभार यांचा ‘नोटीस चुकून’ आल्याचा अजब दावा
- घरगुती गॅस सिलेंडरचा वापर करणाऱ्या हॉटेलवर तहसील प्रशासनाची कारवाई, गुन्हा दाखल
- भाजप नेते धनंजय सावंत यांच्या गाडीला अपघात